Friday, June 24, 2011

Mara Rama Evangelist Lâr Evan. Upa L.V. Sazi Ropuina Ramah A Chawl Ta!

Mara rama Evangelist lâr leh, IKK (Bualpui NG) Fulltime Evangelist Upa L.V. Sazi chu June 23, 2011 (Thursday), tlai 2:30 PM vel khan Saiha tlangkawn-ah thisen sang natna avangin a thi.

Thudawn danin, Evan.Upa.L.V. Sazi hian nat lawkna engmah a nei lova, an khua Bualpui NG atangin a tupa Damdawi in-a entir tura rawn hruaiin Saiha-ah an lo kal a. A thih dawn darkar tlem-te chhungin Thisen sang natna hian tlakbuak-in a thi zui ta nghal mai nia thudawn a ni. Tunhma atangin Thisen sang natna hi a lo nei tawh a, rawngbawlna hi a tui em avang leh a ngaih pawimawh em avangin a in enkawl tha meuh lo thin nia thudawn a ni.
Evan.Upa LV. Sazi (Rachho Paw) hian fapa hlir 6 a kalsan a. A fate zinga pakhat, Evangelist missionary Pu Joel Lava chu tunah hian Restoration Mission of India hnuai-ah, Odhisa (formerly Orissa) State ah Missionary-in rawng a bawl mek a ni. Pu Pawsa Lava, Bangalore-a awm mek hi Evan.LV.Sazi u fapa a ni.
Evan.Upa L.V. Sazi hian kum 1990- vel atang khan Mara ramah rawngbawl-in, Evangelist lâr leh rawih hlawh ber pawl a ni a, rawngbawlna hlawhtling tak tak a nei ţhin a ni. He article ziaktu nen pawh hian rawngbawlin an lo inzui nasa ţhin hle a ni. "Mara fa zingah chuan Mi pakhat a ni tak meuh meuh a ni."


Evan.Upa L.V. Sazi hi Isua Krista Kohhran (IKK) Bualpui NG-ah Fulltime Evangelist-a thawk mek a ni a. IKK Kohran pawh-in an tangkaipui hle a, malsawmna an dawn phah nasa hle a ni. Hetianga a hun lo taka Ropuina ram a lo pansan ta mai hi an tuar em em a ni. Thudawnna-in a sawi dan chuan, Evan. Upa LV. Sazi thi ta an ui zia leh an hlut-zia entir nan, Evan. Upa LV. Sazi aiawh tur hian a fapa Tv.Beiryrao chu a IKK Hqrs Office-ah rawngbawlna (hna) an pek tur thu leh Pension pawh siam sak a, thlatin Rs.5000/-PM an pek tan tur thu chu an rawngbawlpui an thlah-liam ni, a ruang chungah ngei hian Rev. Vanlalchhuanga, Gen. Secy. IKK (Bualpui NG) chuan a puang nghal a ni.



IKK Kohhran hian Lal Isua Zirtirna leh Bible zirtirna hi an lo zawm chiang hle mai, an rawngbawlpui Evan.Upa LVSazi-an a kalsan tak a nupui leh fate lungngai-manganga awm mek-te tan Pa nih an tling zo ngei mai, Innghahna tlak pawh an lo ni ngei e. IKK Kohhran thiltih hi a ropuiin an rawngbawlpui an chawimawi zia leh an hlutzia a lang chiang hle a ni, Kohhran Dinchhan hi "Pachhia, rethei, hmeithai leh rah-beh-a awm-te, sualna khura awm mek te, lungngai-mangang te chu deusawh mai lova Chhanchhuak a, Pathian Hmangaihna nen-a siam tha a, tungding zel turin Lal Isua'n khawvelah hian Kohhran hi a din a ni" tia Rev.Dr.Michael Green sawi angin, Pathian leh Lal Isua dinchhan ang taka IKK Kohhran-in rawng an bawl hi a ropui hle a ni. 


Evan.Upa LV. Sazi a thi tih an hriat hian, a seilenna leh a fapa upaber Pu LV.Beirachho awmna kohhran leh khawtlang Chhuarlung khua chuan Upa 3 leh a fapa Pu LV.Beirachho chu rawn tir-in, Chhuarlunga vui turin an rawn dil a. Mahse, IKK kohhran chuan, "Kan rawngbawlpui a ni a, IKK kohran min hmangaihtu a ni a" tiin, an lo phal lova, Pi Rachhonu (w/o Evan.Upa LV Sazi) pawhin an duhsakna chu a hlut viau laiin, Bualpui NG IKK kohran-a vui chu tha a tih zawk avangin, Bualpui NG IKK kohran hian ropui takin an vui ta a ni.


Evan. Upa LV. Sazi hian lainat-tu leh thlah-liamtu a ngah em em a, an khaw chhehvel Chhuarlung, Lungbun, etc. leh Saiha atangin mi thahnem tawk takin a ruang hi an thlah-liam a. Motor pawh 30 chuang lai Bualpui khua-ah hian a lut a ni. Mikhua rawn kal-te ei leh in zawng zawng chu IKK Hqrs chuan an tum vek bawk a, "Kan rawngbawlpui Evan.Upa LV.Sazi ruang rawn thlahtute leh a hnu-a rawn raltute zawng zawng ei leh in sen so hi IKK Hqrs-in kan tum vek dawn a ni" an ti nghe nghe a ni. Evan.Upa LV Sazi an chawimawi thiam dan leh a tana an inpekna leh an inphalna hi a ropui tak zet zet a ni.   

Evan. Upa LV.Sazi hi Parawn tlak, pa zaidam, pa ţawngkam thiam, Pathian tih mi, Mi rinawm, Fiamthu thiam tak, Thlarau mi leh Pathian rawngbawl bak ngaihsak nei lo a ni. A nun-a entawn tlak em em mai pakhat chu, Miin Dawta Sual tinrenga an hek pawh-a khing let ve duh lova, an hrethiam lo chung pawh-a ngaidam zel thei Pastor leh Evangelist a nihna hi a ni. PATHIAN THU LEH THLARAU THIANGHLIM HRUAINA HI A SAWI-A SAWI MAI LOVIN, A TAK TAK-IN EVAN.LV. SAZI HIAN A HMANG THIN A NI.

Mara ram leh Mara fate chuan, Miropui leh chhuanawm, Krista tana Pasaltha Duhawm tak pakhat a chan a, Mara Lei Arsi lian a her liam a ni.

“A Mithianghlimte Thihna chu Lalpa ngaih chuan Hlu tak a ni”
(Ps.116:15)

Hmangaih Pathian leh Thlamuanna Pathian-in Evan.Upa.LV.Sazi kalsan tak a nupui leh fate, chhungte, leh Kohhran-te awmpui zel rawhse tih hi kan Tawngtaina a ni.

SOURCE: drjohnhamlethlychho.wordpress.com/ Maraland.net

1 comments :

lapi said...

Va pawi ve, Pu Sazi chu,,, Lalpan a kalsan tak Kohhran leh Chhungte thlamuan mawlh rawhse.

Popular Posts