Monday, March 26, 2012

You Are Not Home Yet!

…Kum 18 liam taa mi kha March 18, 2012, Sunday-ah…
March 18, 2012 (Sunday) Chawhnu inkhawmah, Thuchahsawitu hnen ațangin tui ti takin thu ka ngaihthlak laiin, mak tak maiin ka thinlungah Thlarau Thanghlimin, kum 18 liam taa ka thu hriat  hmangin thu a rawn sawi ta tlat mai!  Ka hun kal tawh leh ka rawngbawlna ho te-te ka chhui kir a. Lalpa hnathawh dan hi a lo va Mak țhin em aw!?  Kum 18 liam taa ka thu hriat kha ka tan a lo ni reng a ni tih ka hrechhuak a!  Rilru-a hlim ru tak siin, pawnlam lang thei-ah erawhchuan awm ngaihna reng reng ka hre ta lo, ka taksa zawng zawng chu a sa up-up hian ka hria a. Biak in chhungah chuan, Pathianin min hruaina lamtluang chhui letin, lawm avanga bianga mittui luang chungin ka țhu ta reng mai a ni.

…Kum 1994 June 30-ah Ka Hre Daih Tawh…
Kum 1994 June 30 khan, Pathian thu zir turin Union Biblical Seminary, Pune-ah ka kal a. Ka thlen thlak hnu reilote-ah, kan Professor zinga 1, London ațanga lo kal hian Chapel-ah thu a sawi a. “Ringtute hian rawngbawlnaah hian a nuam leh a hahdam lam ringawt zawng lova, tuar huam leh chan huam leh mualpho huama Lal Isua kan zui a ngai a ni” tiin, Africa rama kum 40 zet missionary-a awm tawh Henry Morrison chungchang chu tehkhin nan a rawn sawi chhuak a. A sawi lai hian a ropui ka tiin, pawimawh ka ti ve em em tho naa, ka rilru-ah a lut em em lem lo. He thu ngei hmang hian kum 18 zet a liam hnu-ah, March 18, 2012-ah chuan, Thlarau Thianghlim-in na em em-in min rawn khawih ta a ni!

…Missionary Henry Morrison Leh US President Theodore Roosevelt…
Henry C. Morrison chu Africa-ah missionary-a kum 40 zet a awm hnu-ah, a haw dawn ta a. A chhungte leh kohhran chu, a hawn tur thu leh a thlen ni tur nen lam hril-in ‘thirhrui’ a thawn thlap a, New York Lawngchawlhna (harbor)-ah hmuak turin an inhrilh a.  A hun takah Morrison chuanna pawh chuan New York lawngchawlhna chu a thleng a.  Kum 40 chhung zet ram pilril a, harsatna tinreng kara a rawngbawlna-te a ngaihtuah let a, a chhungte leh kohhran miten an lo hmuak ang a, an hlim tur zia te, an ngaihsan tur zia te a ngaihtuah a, a thinlung a hlim em em a ni.

Amaherawhchu, a rinloh tak maiin, Lawng ațang a han chhuak chu, hmuaktu hmel reng reng an lang ta lova, tumahin an lo hmuak ta lo a nih chu!  Lawng ațang chuan a han thlir a, mipui tam em em hian mi an hmuak lai hi a va hmu a. Lawnga hnathawk pakhat chu a zawt ta chawt a. Chupa chuan, “Ekhai, i lawng chuanna-ah tho hian US President, Theodore Roosevelt kha a chuang ve alawm, President hmuaktute an nih saw. I chhungte leh kohhran member-te pawhin US President an hmuahna-ah sawn an tel ve vek a ni ang ” tiin a hrilh ta a ni.

Chu thu a hriat chuan Morrison thinlung chu chhun angin a lo na ta a. Pathian hnenah nasa takin a vui ta a ni. Hetiang hian Pathian hnenah a țawngțai ta hial a, “Lalpa, Roosevelt hi ka class-mate a ni a, ka aia lehkhathiam thei lo zawk a ni. Kei chuan kan class-ah khan 1st position zel ka hauh laiin, Roosevelt-a hi chuan 3rd position bak a hauh pha ngai lo tih i hriat kha. Tunah hian, ka aia lehkha thiam thei lo zawk leh i rawngbawlna aia politics ngaisang zawk chu, mi zawng zawngin an ngaisang a, an lo hmuak a ni. Kei erawhchuan, ka hlawkna tur leh ka ropuina tur zawng zawngte ka kalsan a, I thu hnial ngam lovin, nangmah avangin Africa ram pilril-ah ka kal a, kum 40 chhung hrehawm takin i rawng ka bawl a. Tunah hian chawl hahdam tura ka lo hawn ve chhunah pawh, hmuaktu pawh nei lovin ka awm a, kum 40 chhung teh meuh rinawm taka I rawng ka bawl chung pawh-a chawimawina pakhat mah ka dawng lo hi, ka rilru a na a, I chungah ka vui tak zet zet a ni” tiin, a thawmhnaw țhenkhat leh a thir-thingrem lian tak chu put pawh pu zo lovin, hruia thlungin, thlantui leh mittui nen, rilru na em em-in a hnuk țaih țaih a.  

A țawngțai zawh veleh chuan Lal Isua a rawn inlar a, “Henry, i mittui a tla elo? I țap elo? Lei leh Van Lal meuh ni mahila, ka tuarna leh ka kalkawng kha i theihnghilh ta emni? Engah nge i vui? Roosevelt chu he khawvel mi a ni a, khawvel hi a in a ni a, khawvel ta a ni. Khawvelin a chawimawi tur a ni a, khawvela nuam zawng zawng hi a neih a thiang alawm! Nang erawhchu, i in leh i khua chu Vanram a ni alawm! He khawvel hi i khualzinna leh i mikhualna ram mai a ni. Nakinah, i in-a i lo hawn hunah chuan, Vantirhkoh chhiar sen loh ten chawimawina famkim nen, ropui takin an lo hmuak ve dawn che a ni. Henry, nang chuan i in i la thleng lo asin!” (Henry, you are not home yet) tiin, Morrison-a thinlungah chuan thu a rawn sawi ta a ni. Morrison chu a harh chhuak nghal zawk mai a, a hrehawmna leh a tuarna-te avanga vui tawh lovin, hlim tak leh hlawhtling takin a hun a hmang chho thei ta a ni.

…Khawvelah Hian Mikhual Leh Khualzin Kan Ni…
Bible-in, “leiah hian mikhual leh khualzin mai an ni tih an inhriattir tawh” (Heb.11:13) a tih hi ringtuten kan thinlung pheka ziaka, a taka kan hman a pawimawh hle. Mikhual tih hi Grk. Zenos, “ama ram (khua) dik tak chhuahsan a, ramdanga reilote atana zin zawk” tihna a ni a. Khualzin tih hi Grk. Parepidemos, “khaw hmun nghet nei lo” tihna a ni. He țawngkam pawimawh tak hi Abraham (Gen.23:4), Jokoba (Gen.47:9), Davida (Ps.39:12), etc. ten an lo hmang nual tawh. Mikhual kan nih avangin, khawvel thilte hi i ngaina lutuk lovang u. Khawvel thilte hmangin i in la-muk lutuk suh ang u. Khawvel thilah hian i duham lutuk lovang u. Kan hmangaih takte min țhentu Thihna avanga Lungngaihna leh harsatna, elrelna leh sawichhiatna, dawta sual tinrenga hekna-te kan tawh chang pawhin, “lei hrehawmah leng mahila, he lei ram mi kan ni lo, kan ramhlun tur chu Vanram a ni” tih hi a Thunawn atan i hmang fo ang u. Lawmna leh malsawmna kan tawn chang pawhin, midangte mit ti-khamtu leh ti-lungngaitu ni lovin, midangte chawikan nan i hmang ang u. “He lei ram mi kan ni lo, mikhual kan ni, kan in kan la thleng lo”

*Bawngkawn Kohhran Zaipawl hian “Puan Var Sin-te” tih Hla Hmangin Sermon hi Chhunzawm Sela, i lo ngaithla ang u*


PUAN VAR SIN-TE

Khawvelah hian ringtute chuan, harsatna kan tawk țhin a,
Kan tan chuan-in lei mawina ten awmzia reng a nei si lo.

“He Puan var sin hi tute nge ni?
Khawi ațanga lo kal nge an nih?” tih mi bia a,
“Heng mite hi hrehawm tam tak tuartute kha an ni,
An puan te Beramno thisenin an su fai si a.”


Ka lei hringnun a ral hunin Lal hnenah ka thlen hun chuan,
Ka lungngaihna zawng zawngte chu, aw ka Lal ka hrilh ve ang.

Ka mit ata mittui zawng zawng min hruk-hul sak hun chuanin,
Nunna thing chungah ngei chuanin, thu ka nei ve tawh ang a.

Lei hrehawm-ah leng mah ila he lei ram mi kan ni lo,
Kan ram hlun tur Lalram ropui, aw ngaiin ka rum vawng vawng.
===========================================



0 comments :

Popular Posts