Friday, April 13, 2012

Charles Darwin A Piangthar An Ti Maw!?

Charles Darwin
…Tih Theih Nise Ka Va’n Chak Em!…
Thi mai tawh tur, țawng pawh țawng ring hlei thei tawh lo, aw chau em em chung chuan, amah enkawltu Nurse hnenah chuan, “Theory of evolution ka hmuh-chhuah kha, ka hmuh-chhuah dan dik tak angin ka sawifiah hman ta lova, pawi ka va’n ti tak em! Ka hmuh-chhuah dan dik tak anga sawifiah theih ka va chak tehlul em ve aw!” a ti vawng vawng mai a.  A ngenna leh duhthusam angin, Rom 8:1-2,Tunah zawng Krista Isuaa awm te tan chuan thiam loh chantirna reng a awm tawh lo. Kristaa Nunna Thlarau dan chuan sualna leh thihna dan ata chu min tichhuak tawh si a,” tih thu chu Nurse chuan a chhiar chhuah sak hnu ah, Pathian hla “There is a green hill far away, Without a city wall, Where the dear Lord was crucified, Who died to save us all(S.S.S. No.1134) tih chu a sak sak leh a. Tichuan, thlamuang takin a chawl ta a ni. He a chanchin kan sawi mek hi Theory of Evolution hmuchhuaktu Charles Darwin a ni.

…Evangelist James Fegan Hnena Charles Darwin-a Lehkhathawn…
Evangelist James Fegan chu rawngbawl tura sawm a nih avangin Darwin-a te awmna-ah hian rawngbawlin thla 3 vel a awm a. A rawngbawlna hian rah a chhuah țha em em a. Darwin-a hian Evan. James hi lehkha hial thawnin lawmthu a va sawi nghe nghe a, Thla tlemte chhunga i rawngbawlna khan kum tam tak chhunga kan rawngbawlna leh tih ve theih zawng zawng a rawn khum vek a ni. Zu leh sa-a saltang mek-te hi tuman kan chhanchhuak thei ngai lova. Mahse, i rawngbawlna ropui tak avangin, tunah chuan kan khuaah zurui pakhat mah hmuh tur an awm ta lo! Kan va lawm em! tiin, ama mimal-in Charles Darwin-a hian Evangelist James Fegan hnenah hian lawmthu a va sawi a ni.

Charles Darwin-a pianthar chungchang hi Evan. James Fegan ngei hian hetiang hian a sawi a, “Darwin hian a thih hma thla 6 ah khan ama in-ah ngei, a hranpa ngat-a min sawmin, “Isua Krista leh a Chhandamna chungchang” sawi turin min ngen a. Rawngbawlna hlawhtling tak kan nei a, țawngțaina hun țha tak kan hmang a. In neitupa bakah, a awmpui (servants) te chu an piangthar deuh vek a, Darwin-a awmpui zinga hlun ber leh a țhian-țha ni tel bawk a piangthar phei chu Darwin-a tilawmtu ber a ni a, mittui nen kut-thing meuhvin lawmna chibai a buk hial a ni” tiin. He thu hi (Charles Darwin-a nupui Mrs. Emma Wedgwood remtihna-in) Christian Herald, December 21, 1881-ah chhuah a ni nghe nghe a ni.

…Charles Darwin Pianthar Thu Hi A Chiang Chiah Maw?…
Darwin-a pianthar thu hi chiang taka hretu an awm nual a. Mrs. Evans, Darwin-a ten an chhungkaw enkawltu bik atana an hman Nurse, a thih thlenga enkawltu hian chiang takin Darwin-a pianthar thu hi a hria a, a sawichhuak bawk. Mrs. Evans hi Nurse a ni a, Gospel Hall Congregational Church-ah Naupang Sunday school zirtirtu a ni. Kohhran mi tak leh Pathian țih mi a nih mai bakah, Darwin-a te chhungkaw țhian țha tak a bawk.

Darwin-a pianthar thu hi Mrs. Emma Wedgwood, Darwin-a nupuiin chiang takin a sawi a. Evangelist James Fegan pawhin a sawi bawk. Mr. Ismael Jones (editor) chuan Christian Herald chanchinbu-ah a chhuah nghal. Mr. Booth Tucker (Salvation Army) pawhin a sawi chhuak ve a. Mr. A.N. Nichols pawhin Darwin-a sawi ngei a hriat thu a sawi bawk. Darwin-a awmpui (old family butler) pawhin a mit ngeia Darwin-a piangthar lai a hmuh thu leh a beng ngeia a thusawi-te a hriat thu a sawi bawk.

Bromley and Kentish Times (ed., A.N. Nichols)-ah, Darwin-a pianthar thu hi an chhuah bawk. Darwin-a pianthar thu lehkhabu lama tlangzarh-tu pawimawh tak dang chu, Lady Hope a ni. Lady Hope hi Admiral Sir James Hope-a nupui a ni a, General Sir Arthur Cotton-a fanu a ni. Lady Jope hian lehkhabu 37 lai a ziak nghe nghe. Dr. L.R. Croft, Salford University-a professor chuan amah ngeiin a dik zia a fiah thlap thu a sawi. Sir H. Atkins, President of Royal College of Sugeons pawhin Darwin-a pianthar thu hi a confirmed ngei thu a sawi bawk.

…A Lo Ni Maw!…
A chunga kan tarlan tawh atang khian, Charles Darwin kha, a thih hma kum 6 velah, chiang takin Pathian khawngaihna a chang a ni tih a lang a. A thih dawn darkar-a amah enkawltu Nurse hnena Bible chang chhiar tur a ngen te, Pathian hla sak sak tura a ngen te hian a thlarau lam dinhmun a rawn ti-chiang lehzual a. Tin, Darwin-a chanchin hrechiangtu, mifel leh rintlak tak tak ten țawngkam mai bakah, Chanchinbu leh lehkhabu-ah a pianthar thu hi an chhuah bawk a ni.

Mrs. Evans (Nurse) hian Darwin-a Pianthar thu leh Bible chang duhzawng leh Pathian hla duhzawng chauh a hre lova. Evolutionist-te rilru țhawng em em, vawiin thlenga an thup tlat, Darwin-a sawi ngei a hre bawk. Chu chu hei hi a ni, “Ka lehkhabu Origin of Species-ah khan fossil ațangin thil zawng zawg a insiam angin ziak ka tum lova, fossil hi Pathian thilsiam danglam tak pakhat anga tarlan ka tum mai chauh a ni. Theory of Evolution ka hmuhchhuah dan angin ka sawifiah hman ta lo. Ka hmuh-chhuah loh dan angin an sawi a, thil pawi a thleng zo ta hi pawi ka ti!  Ka theory sawifiah nan a, Karl Marx, Haeckel, etc. te ka lo hmang kha ka inchhir tawp thei lo” tih thu hi Darwin-a khan a thih dawn darker-ah a sawi a ni. He thu hi Mr. A.H. Nichols (editor)-an Darwin hnen ațang ngeia a lo hriat daih tawh avangin (Mrs. Evans thu hriat nen la kawp-in), Bromley and Kentish Times-ah a chhuah nghe nghe a ni.

…Charles Robert Darwin Chanchin Tawi…
Charles Robert Darwin hi British scientist (founder of modern evolutionary theory) a ni a. Shrewsbury, Shropshire, England-ah February 12, 1809, khan a piang a. A nu leh pate hi mi hausa tak an ni. A graduate hnu-ah, University of Edinburgh (1825)-ah damdawi lam zir turin a lut a. Mahse, a hlawhchham (dropped out). University of Cambridge-ah, Church of England Pastor nih tumin a lut leh a. Cambridge-a zirna a zawh hnu hian Pastor lama kal ta lovin, Natural History Projects a buaipui daih a. Kum 1839 khan Emma Wedgwood (first cousin) chu nupui-ah a nei a. Fa pawh 10 lai an nei a, an fate zinga 3 chu an naupan laiin an boral.

Emma, w/o Charles Darwin
A lehkhabu hmasaber On the Origin of Species chu kum 1859 khan a chhuah a. He lehkhabu hi “book that shook the world,” tih hiala koh a ni. A published ni hian an hralh zo nghal vek a, vawi 6 an chhut-nawn zawng zawng chu an hralh zo zel bawk! A theory țanpui tur leh ti-nghet tur hian, lehkhabu a ziak nual a- The Variation of Animals and Plants Under Domestication (1868), The Descent of Man (1871), The Expression of the Emotions in Man and Animals (1872), etc. Darwin chu Royal Society (1839) leh French Academy of Sciences (1878) ah te member a ni a. April 19, 1882 khan, Downe, Kent-ah a thi a, chawimawina famkim nen Westminster Abbey-ah phum a ni. +

(Further Reading:- Dr.LR.Croft, How Life Began, Salford University: Evangelical Press, 1988; A.H. Nichols, Bromley & Kentish Times; Christian Herald, December 21, 1881, Garland E. Allen & Randy Bird, Charles Robert Darwin (1809-1882), Microsoft Encarta: 1993-2002).


0 comments :

Popular Posts