Monday, April 30, 2012

Joba Malsawmna Thuah-thum

Joba 2:3, Tin, LALPA chuan Setana hnenah chuan, “Ka chhiahhlawh Joba hi i ngaihtuah ngai em?Amah anga mi famkim, mi ngil Pathian țih mi, thil țha lo laka insum thei mi hi leiah tumah an awm lo asin, vang awm lova mi tihchhiattir chung pawhin a ngai reng a la ni” a ti a.

1. Thu Hmatheh:
Pathian pawhin ‘mi famkim’ a tih ngat Joba chanchin hi a lâr hle a, a chanchin chu sawi thui lo mai ila. Pathian hnen ațanga permission a lak thlap hnu-ah, mithianghim leh mifel Joba hi Setana’n duhtawkin a sawisa ta a. Amah thlamuantu ber tura ngaih a nupui lah chuan ‘Pathian sawichhia a, thi mai turin’ thurawn a pe zui! A țhian-te 3, Elifaza, Bildada leh Zofara tal an awm alawm kan tih laiin, a țhiante lah chuan, chhan awm lova a tuar ngawt chu thil dang vang ni thei turah an ngai lova, Joba sual vangah riak an puh bawk nen! Chhan leh vang awm hauh lova Joba’n taksa, rilru leh thlarauva a tuarna hi a râpthlakin a lainatawm hle a. Awmze ropui leh thûk tak a nei ngei ang tih a rin theih. Keini ringtute tan pawh hian zir tur a awm ngei ang.

2. Joba Chunga Thilthleng Leh A Tuarna:
Joba hian taksa, rilru leh thlarauva a tuarna-ah hian, hlawm lian tak tak 3 ațangin tuarna hi a hmachhawn a:-


2.1. Joba’n Amah Chauhvin A Tuar:
Joba tuarna hi a nâ hle a. Tuarpuitu leh khawngaihtu zawng nei sela, a nâ pawh a tuar nep deuh mahna le! Lainattu leh tuarpuitu tumah nei lovin amah chauhvin a Sepui ruah tuar tlawk tlawk mai a ni. Joba pawh hian han sawi vak ngaihna a hre bik lo a ni ang, amah leh amah pawh a in-khawngaih êm êm a, a in-hnem-chawp ta ringawt a, “Ka nu pum ata saruakin ka lo chhuak a, saruak vekin ka kir leh dawn a nih hi” a ti chuai raih mai a. A tuarna hi hriatthiampui a, thinlung chhungril ber ațanga lainat taka tuarpuitu leh khawngaihtu reng a nei lo.

2.2. A Nupui Ațangin A Tuar Belhchhah:
Tuarna kan chunga a lo thlen hian, chhung ten min hriatthiampuiin, min tawrhpui hle a ni tih hriat chuan, a thlamuan thlak a, kan dam sawng sawng țhin. Joba hi a vanduai hle mai. Duhtaka a neih a nupuiin, a chunga tuarna leh harsatna a lo thlen hian a thlamuantu-ah țang lovin, a deuhsawhtu-ah a țang ta tlat mai a nih chu!  A nupuiin thurawn a pek chhun lah chu, “I Pathian sawichhia la, thi la a ni mai alawm!” tih a ni. Joba nupui sawitum hi a chiang kek kawk hle. Joba hian Pathian sawichhe vak sela, Pathian thinrimin Joba hi chawp leh chilh-in rawn tihhlum nghal sela, a ti niin alang. A nupui diriamna hi Joba tana tuar har ber a ni hialin a rinawm.

Ţhenkhat chuan, Joba nupui hian a pasal nâ tuar chu en hrehawm a tih êm avangin thi hma sela tih a duhsak vang zawk a ni, an ti. He ngaihdan hi a vai vai chuan a dik lo a nih pawhin, ngaihtuah chu a ti-thui hle. A nupui hian Joba fel zia leh Pathian-a a innghah pumhlum zia a hmu-in a hria a. Chutichung pawh-a heti khawpa nâ a Pathianin a hrem duh mai chu mak a ti a, a pasal han hnem chu sawi loh, Pathian chu biak tlakah a ngai tawh lo hial pawh a ni mai thei. Mahni chanah han indah chhin ila, har tak tur a ni.

2.3. A Thianten A Tuarna An Belhchhah:
Joba hian a chunga tuarna râpthlak tak lo thleng chu ama mimal-in a tuar tlawk tlawk a. A thai lungmawl chuan a hrethiam pha lo a nih pawhin,  a thiamna te, a tawnhriat te, an suangtuahna-ten a phak lo pawh a ni thei e. Mahse, a țhian țha ber ber-te, amah ang maia fing leh dai-zau, tawn-hriat ngah, thil thlir-thui êm êm tura a ngaih-te pawhin, Joba sual vang leh thiltih dik loh a neih avanga heng tuarna-te hi a chunga thleng anga an puh vek a, diriam tak leh thiam loh chang hliah hliah (mocked and condemned) anga an han chhuahchhal ta mai hi… Joba tan tuar a har ngawt ang le!  Patling mah nise, pachang taka ngaihtuahna sen a har ngawtin a rinawm. An ti nasa bawk a ni ang, atawpah phei chuan Joba pawh a țawngvai ve ta hial a, a thiltih țhat-te a sawichhuak ve ta hial a nih kha…

3. Joba Malsawmna Thuah-thum-te:
Joba chuan a thil tuar chu a tuar chhuak ta! Joba’n taksa, rilru leh thlarauva a tuarna zawng zawng te, hmuhsit, deuhsawh leh thiam loh chantir fai vek a nihna zawng zawng kha Pathianin a hre reng a. Chhan leh vang awm hauh lova tuar a, lungawih taka Pathian chunga vuina nei miah lo Joba chuan Pathian hnen ațangin Malsawmna Thuah-thum (three-fold blessings) a dawng ve ta thung a ni:

3.1. Joba Mimal Taksa & Thlarauva Malsawmna:
Joba chuan tisa leh thlarauvah malsawmna ropui tak Pathian hnen ațangin a dawng leh ta. Pathianin a dam kum (longevity) a pawhsei sak a, Joba chuan kum 140 zet a dam phah a, tu pawh chhuan-li thlengin a hmuh phah ta. Hei bakah, Thlarau lamah pawh malsawmna a dawng leh a. Harsatna hmuna amah ringawt in-en a, Pathian lam en na-chang a lo hre lo țhin kha a inthlak ta! Pathianin a hmuh angin a inhmu a, Pathianin a hriat angin a in-hre ve ta a ni (sees himself as God sees him, knows himself as God knows him). Hei mai ni lovin, Pathianin a fiah thlap (vindicated) hnu -a midangte tana malsawmna ni tura a rin ber a ni ta bawk a ni.

3.2. Chhungkuaah Malsawmna Ropui:
Joba khan a chhungkaw hlutna leh ropuina (a nupui tih loh) a hloh fai vek a. A fate leh a thilneih zawng zawng chu hun reilote chhungin a chan vek a nih kha. Mahse, Pathian ringtu, Pathian mihriat chu Pathianin a hmuh-țhelh lova, a hre reng. Joba’n a hloh tawh zawng zawng kha Pathianin a pe let leh vek a ni. Pathianin Joba chu Fapa 7 leh fanu 3 lai a pe leh a. A hmaa a fa neih zat nen a tam lam a inzah tho laiin, a hlut dan (quality) erawh a dang ta hle! Hei hian Pathian Malsawm rim a nam bik zia a tichiang hle.

Joba fanu 3 te chu an chheh vel ram zawng zawngah nula hmelțha ber an ni ta a ni. Bible-ah pawh hetiang êm êm hi chu a vang khawp mai. Esther-i kha ram khat chhunga hmelțha ber a ni mai a. Joba fate erawh hi chu an chheh vela hnam zawng zawng (surrounding nations)-ah an hmelțha lawr-lak a nih chu! A chungchuang hle mai. Hei mai bakah hian, an hnam tihdan phung (cultural practice) sawi danglam lawih khawpin Pathianin Malsawmna hmangin hna a thawk tlat bawk. Joba-te hunlai hian an hmeichhia ten rochan an nei ve ngai lo. Mahse, Pathian malsawmna tharah chuan Joba fanu-te pawhin a pa hnen ațangin rochan (inherit their fathers’ property) an nei ve tawh dawn a ni. Pathian rinngamna leh innghahna tak takah chuan Pathian hian thil ropui leh thil mak hi a ti lo thei lo.

3.3. A Ţhian-te Ngaidam-tu Leh Malsawm-tu:
Joba țhian-te 3 hian, Pathian aw ngaithla lovin, anmahni mihring finna hmangin Joba hi an fiah a, an chhui a, an thil hmuhchhuah kha ‘Joba sual avangin a chungah tuarna a thleng a ni’ tih a nih kha. Hemi avang hian thiam loh chantirin, hmusit tak leh nâ tak takin an țawngkhum a, a sual sim tur te-in an ti a ni. Thil hi a nihna tak tak a lo thlen a, a nihna dik tak han chhuichhuah chuan, a hniak tam lam hi a lo dik ber lem lo tih hi a rawn ti-chiang hle. Ţantu pawh nei lo, sawipuitu pawh nei lo, insawifiah thiam tawh chuang si lo Joba kha… Pathianin a chawisang ta a, a thiltih te, a thusawi te chu ‘dik’ tiin a rawn nemnghet ta a ni.

Pathian rorel dan leh thil chinfel dan hi a mak țhin hle. Joba țhian-te hian, ‘kan lo tisual deuh a ni maw?’ tia an tawmbo mai mai hi Pathianin a phal tlat lo. An thiltih sual, an țawng sual, mi rilru an tihnat leh dik lo taka mifel thiam loh an chan tir kha ‘ngaihdam dil turin a tir lui’ ngat. Israel faten Sinai tlanga Pathian duhloh zawng ti-a Rangkachak bawng no lem an lo biak lai pawh khan, Mosia Sinai tlang ațanga a lo chhuk leh khan, Rangkachak bawng no lem kha a rawt-dip vek a, tuiah phulin Israel fate a in-tir vek a nih kha!

Joba țhian-te pawh hian Pathian tirh ang chiah-in an va kal a, Joba hnenah ngaihdam an va dil a. Joba hian a țhian-te hi a ngaihdam mai bakah an tan Malsawmna dilin a țawngțai sak nghe nghe a ni. Pathianin, rawngbawlpuite, țhiante, ringtu-puite nen hian in-hriatthiamloh chang neiin, kan karah harsatna te awm țhin mahse, inngaidam-tawn a, in-hrethiam-tawn a, boruak țha siam zel turin min duh tih a lang chiang hle.

4. Tlipna:
Joba Malsawmna Thuah-thum hian thil tam tak a kawk thei awm e! Hmanah Mizo Pastor, ‘sazu meibul 3’ tia koh-te kha Jail-ah an tâng a, Saiha Jail-ah pawh Thlarau fa 3 an tâng tawh bawk! Kohhran-te hi leia awm kan la nih tlat avangin a chhungah harsatna a kiang lo. A kotu leh a dintu a thianghlim anga a in tih thianghlim zel a țul. Politics-ah pawh (mifel tak tak an awm tho laiin) a sum ngah ngah, a țawng chak chak, dawtsawi thiam thiam an ding chang zel zawkin a lang! Khawtlangah pawh, a sum ngah ngah hmelțha, țantu nei țha țha an vannei zel bawkin alang. Hetiang hunah tak mai hian ringtu kan nihna kan pholan zel a țul. Ringtute hi khawvel êng kan nihna te, ringtu chuan tuar tur leh tuar loh tur thlengin kan tuar a țul zia te, kan dikna leh chanvo ngawih ngawih pawh min lak sak hunah pawh chhel taka kan tuar zel a țul dawn a ni.

Kan dikna ngawih ngawih-ah pawh, kan dikna rapbet chunga dik lo taka kan chunga thuneihna an hman hun pawh a awm ang, hetih hunah chiah hian, Pathian hnena vui mai lova, Joba anga Pathian hnena kan innghah ngam a ngai a, “Pathian hnen ațangin thil tha kan hmu a, thil țha lo pawh kan hmu lovang emni?” kan tih theih zel chuan, Lalpa’n Joba hnena Malsawmna thuah-thum a pek kha kan nun-ah a rawn parchhuah tir ve dawn a ni. Pathian ropuina tura tuar kan huam phawt chuan, Pathian hi a thutiam-ah a ding a, a thutiam hi a rawn tihlawhtling ngei ngei dawn a, Mal min sawm ngei ngei dawn a ni, “Keini rinawm lovin awm mah ila Ani chu a rinawm a ni, Amah leh Amah a inphat thei silova.” (Cf. Ex.32:20, Job.1:6-11, 2:7-10, 42:1-16, Mt.5:10-12, 43-6:1, Mk.10:29-30, 2Tim.2:13, 1Pet.2:19-23, 4:1-19).

(Dictionary- Joba-Heb.jo’bab/yobhabh. persecuted/howler. Elifaza-Heb.el’i'faz. God of gold/God is fine goldBildada-Heb.bil’dad. Son of contention(disputes/quarrelsome)/Bel has lovedZofara-Heb.Tsphar. Sparrow/Shaggy/Chirper/To whistle/Twittering bird/To leap).

2 comments :

Ma-i Mizo said...

A va tha em.. Joba ang hian heng tuarna hi ka chungah thleng se Pathian malsawm leh tlak in ka tuar theih ka ring lo.. A ropui e..
Habakuk te.. Lalpa a vui ve ngai lo, "Ka lawm zel ang Lalpa ah chuan" ti thei nun hi a va ropui tak em..

Pathian rorel ah hian ka vui ngam lo, mahse ka lawm reng thei thin lo a chang chuan.. mahse Pathian remruat ka hriatthiam loh vang a lo ni fo.. I ziak tha hle mai e.

dr john hlychho said...

Thanks Pi Ma-i, Ni e ti rawh! Lawm reng thei lo mahila Vui Miah Lo Thung ila Lalpa'n kan chak lohna a hria alawm... "Ka Lawm zel ang" tih hi sawi thei lo mahila, "Ka Vui Ngam lo" tih pawh a ropui lutuk alawm! Pathian nihna i hrechiang a, nangma nihna i in-hrechiang a, Lalpa a lawm thovin ka ring tlat!

Popular Posts