Friday, May 18, 2012

Mara Ram-a Sap-hote Thiltih Mak


Thu Hmatheh:
Sap ram, London atanga Mara rama lo kal Sap-hote Rev. Reginald Arthur Lorrain leh a nupui Mrs. Maud Louise Ulander Lorrain te khan September 26, 1907, tlai 4:00 PM ah Serkawr khua an lut a.  Mara Lal Thylai Hlychho In hmun pekah, an mahni kutkawih ngeiin an chenna tur in an sa a. Hemi hnu hian an lo kal chhan ang takin tisa leh thlarauva Mara fate dawmkanna leh hmasawnna turte ngaihtuahin an hun pum an hmang chho ta a ni.

Heng Sap-hote tum ber hi Mara fate thlarau chhandam ni mahse, tisa leh thlarauva an dinhmun chawikan chu hnapui berah an rawn nei a. Tunah chuan Mara ram pawhin September 26, 2007 khan Chanchin Tha thlen atanga Kum 100-na (Maraland Gospel Centenary) hial a lawm ta. Mara fate chu tisa leh thlarauvah khawvelah rual el phakin an chherchhuak a ni. Mara rama Sap-hote Thiltih Mak hi tawite-te in kawng hrang hrangin lo chhui ila:


1. Ziak leh Chhiar (Literature Work)
Mara rama lo kal Sap hote khan Mara ram an lo thlen veleh Mara tawng A, AW, B an siam hmasaber a. Hemi hnu hian Bible thu zirtir nan he A, AW, B hi tangkai takin an hmang chho nghal a. He A, AW, B hmang vek hian Mara hote chu an inbiakpawhtir ta a ni. Mara hote chu tawng (oral) leh zaizir (signs) te hmanga lo inbepawp thin an nih avangin, lehkha te, thingphek te, vaivut leh lungpheka Thuziak hmanga an han inbe-pawp thei ta mai chu atirah chuan mak an ti nasa a, ramhuai hnathawh-ah hial an ngai a ni.

Bible lehlin hi December 1908 ah an tan a, Thuthlung Thar chu kum 1928 khan zawhfel a ni a, Bible pumpui hi kum 1951 khan zawhfel a ni.  Mara Dictionary leh Grammar te, Chanchinbu -  Krizyhpa Chiamie (The Christian Trumpet) te, Hlabu te an siam bawk. An aia Chanchin Tha dawng hmasa zawk, thenawm Mizo tawng hmang hote aiin Bible pumpui hi an nei hmasa zawk nghe nghe a ni.


2. Damdawi Thiamna (Medical Care)
Missionary te hian Damdawi thiamna hmangin Mara fate an lo chawikang nasa hle bawk a. Atirah chuan Mara fate hian Sap-hoten Damdawi an pek chu “in dawina chikhat” nia an hriat avangin an hlau em em a, an hmang ngam meuh lo. Mahse, hun a lo kal zel a, Damdawi thiltihtheihna chu an lo hre chho ve ta zel a, Sap hoten Mara rama kum 10 an awm hnu-ah chuan Sap-hote Tawngtaina leh Damdawi chu an rinpui ber alo ni ta a ni.

Sap-hote hian Damdawi leh enkawlna dang reng reng hi a thlawn vekin an pe a. Mr. Calow (London-a awm) chuan heng damdawi te hi a thlawnin a rawn tum a. Tlailam dar 4:00 apiangah Missionary Bungalow ah Mara fate natna nei chi hrang hrangin an pan thin a, tawngtaina te neiin, damdawi hi a thlawnin an sem a, an natna te chu a tul dan angin an enkawl zui ta thin a.  Sap-hote record-ah chuan kum 1963 chhung ringawt pawh khan damlo mi 4739 an enkawl hman a ni.

Kum 1971 khan Rev.A.B. Foxall chuan Mara rama Hospital Din a dil a, mahse Mara Kohhran Hruaituten an remti lova, mahse, vanneihthlak takin tunah chuan CCI(M) chuan London atanga tanpuina kaltlangin Tlôsaih khuaah (Serkawr khua)-ah tunah hian Hospital an sa mek a. ECM pawhin Hospital an nei ve tawh a. Kum 1971 khan lo phalin, lo sa tawh nise chuan, Presbyterian Kohhran leh Baptist Kohhran-te angin, tunah chuan Mara Kohhran-in Hospital changtlung tak an nei ve tawh tur a nia le! 

3. Chanchin Tha Hrilh (Evangelism)
Sap-hoten London-a an In nuam tak kalsan a, Mara ram kil taka an lo kalna chhan ber chu Lal Isua Chanchin Tha hrilh a ni. Rev. R. A Lorrain khan Mara ram alo thlen hnu-in Mara tawng te a zir a, tawng a thiam hnu ah, Mara Lal (Tlôsaih Lal) Thylai Hlychho tualah he Chanchin Tha Hrilh rawngbawlna hi a tan a. Kum 1908, October thla-ah Tlôsaih Lal  chuan a lal khual – Saiha Lal nupa te lawm nan leh chawimawi nan ruai ropui tak a theh sak a.  Ruaitheh a, hlim taka nula tlangval an lâm bung bung lai chuan, Mara Lal Thylai Hlychho chuan Saiha Lalnu chu thusawi turin a sawm a. Mahse, Saiha Lalnu chuan Tlôsaih Lal Thylai Hlychho hnenah chuan, “He Mingopa hi kan ramah kum khat chuang zet a awm tawh a, lo kal chhan a nei ngei awm si a, sawi tur a neih te sawitir ve ta zawk che?” tiin a ngen ta zawk a.

Tichuan, Rev. Lorrain hian he hun hlu tak hi hmang tangkaiin, Mara fate pungkhawm hnenah chuan a lo kal chhan leh Pathianin Mara fate a duhsakna thu – “Thyu ula, Khaih teh u, Marahpa sawzy! Nama Khaihna cha avaw tlô haw (Arise and shine the Maras! Your light has come)” tiin, Mara tawng ngeiin a tlangau ta a ni. Mi thenkhat chuan Saiha Lalnu-in a thusawi hun ai Rev. R.A. Lorrain a ken phal avangin Pathianin a chawimawi a, Saiha khua hi Mara ram khawpui  a lo nih phah a, Mara hmeichhiate pawh lehkhathiam leh sorkar hnathawk an lo pun phah a ni an ti hial nghe nghe.

He Ruaithehnaa pungkhawm Mara fa mi 400 vel chuan Mingopa (Sap)-in Mara tawnga thu a sawi ta mai an hriat chuan mak an ti nasa em em a. An chung-en (tluk loh en) tan nghal niin an sawi bawk. Hemi hnu hian Sap-hote hian Mara ram khawtin leh In tin fang chhuakin thu mawl tak – “Zu in bansan tawh ula, inthawina awmze nei lo bansan ula, Lal Isua lo ring rawh u, tichuan van ramah in kal thei ang,” tiin.

4. Ramhuai Beihna (Power Encounter)
Mizoram hmar lama Sap missionary lo kal ten ahring ahrana Ramhuai an sual thu hi kan hre lova, mahse, Mizoram Chhimlam Mara rama lo kal Sap-hote kha chu a hring ahranin Ramhuai nen an inbei a ni. Mara faten Chanchin Tha an pawm hma kha chuan Mara ram hi a thim hle a, ramhuai thiltihtheihna hnuaiah an kun a, ramhuai tihlungawi nan inthawina an hlan reng thin a. Ramhuai awmna nia an hriat – thingbul-lungbul te, tlang lian leh lui lian te, thil engkim deuhthawh mai chu ramhuai ta leh ramhuai awmna nia an hriat avangin tihlungawi nan an inthawi thin.

Rev.A.B.Foxall chuan Mara Bible a lehlin laiin Ramhuai chuan rawn beiin, nasa takin an insual a, atawpah chuan Lal Isua hmingin Rev.A.B.Foxall chuan Ramhuai hi a um tlan a ni.  Rev.R.A.Lorrain pawhin tumkhat chu hriat loh avangin tûr a in palh hlauh mai a, a hmutute chuan a thih nghal an rin laiin engmah tilovin a awm a, he thil mak hi an hmuh avangin he mite chhungkua chu Kristianah an lo inpe nghe nghe a ni. Ramhuai hnehna hi ramthim-ah chuan Chanchin Tha hrilhna hmanraw ropui leh pawimawh tak a ni a. An hlauh em em Ramhuai aia chak zawk Pathian chu biak an duh a, Kristian-ah an rawn inleh phah thin a ni. Mara fate pawh Ramhuai aia thiltithei zawk Pathian a awm tih an hriat avangin tam tak chu Kristianah an inpe a ni. Ramhuai hnehna hian Pathian chu Ramhuai aiin a chak zawk a ni tih chiang takin a tarlang a ni.

5. Missionary-te Ram (Mission Compound)
Sap missionary-te chuan an rawngbawlna apiangah ram bik neiin, chumi chhungah chuan an awmna In te, Office te, School te, Biak In te, Orphans Home leh Hospital te an sa thin a. Hei hi Missionary-te awmna Veng emaw Mission Veng (Mission Compound or Mission Colony) tia hriat leh koh a ni thin. Hei hian awmzia pawimawh tak a nei a – Tunhma chuan eng ram pawh ralmuanna a awm loh avangin Missionary-te In emaw, Mission Veng (Mission Compound) chu ringtute tan leh mipui tan pawh chhiat tawhna laka inhumhimna leh tlankhawmna a ni thin a, chuvangin Missionary-te In chu Himna Kulh ang a ni.

Rambuaina hmunah phei chuan missionary ten ringtharte chu harsatna leh rikrum thil engpawh lo thleng sela Missionary-te In (Missionary Bungalow) pan zel turin an zirtir thin a ni.  Indopui leh Mizoram buai lai pawh khan mipuite chu himna zawngin Missionary-te In emaw, Biak In hrim hrim emaw an pankhawm thin a. Chuvangin, Mara rama Sap-hote pawh kha, Pathianin anmahni mimal (mihring) chauh ni lovin, an in leh lo, in hmun leh lo ram te thlengin a humhalh a, a veng a, thihna te, chhiatna te laka mipui venhimna hmanrua atan Pathianin a lo hmang thin a ni.

6. Lemchan, Thu leh Hla (Media and Music)
Sap-hote khan Mara ramah Media lam hmasawnna an rawn luhpui leh bawk a. Heng films (moving pictures  & slide show), milem (pictures), dramas leh Pathian Hlate rawn hmangin, zawi zawiin Mara ramah changkanna leh hmasawnna tisa leh thlarauvah an rawn thlen bawk a ni. Sap-hote khan a chang chuan khawvel hmasawnna min hriattir tumin film pangngai (Pathian Thu ni lem lo) te leh Slide Show te an chhuah-in an entir thin a. Chung thiamna sang takte an hmuh chuan Mara faten an hnam hniam zia leh midangte hmaa inchhuang thei leh chapo thei an nih lohzia an inhrechhuak thin a, Pathian thu tha takin an ngaih-thlak theih phah thin. Tin, heng films an chhuah hma hian Sap-hote hian Pathian thuchah sawina leh tawngtaina hun an hmang thei bawk thin a, hei hi an tan thil hlu tak a ni bawk.

Tin, milem (pictures) lamah pawh hmasawnna thar an rawn thlen leh a.  Fapa Tlanbo Chanchin (Lei Ta, Hmo Ta - A Bo a, a Hmu a) a lem nena buatsaih chu Mara mipuite hnenah an sem a, hei hian tisa leh thlarauvah hmasawnna leh thanlenna a rawn thlen a. Drama rilru khawih tak tak te an zirtirin, an chang thin bawk a. Pathian Hla pawh Sankey Sacred Songs & Solos leh Redemption Songs atangte-a letlingin Mara tawngin sak theih turin a bu-in an siam a.

Film lamah hian Slide-Show hi chu kum 1908 atang khan Sap-hote hian Mara ramah an lo hmang tawh nia hriat a ni. Films (moving pictures) erawhchu tlaikhawhnu, kum 1980 chho vel atangin an hmang tan niin an sawi. Chhunlamah chuan mipui tam zawk chu lo leh ram lamah an chhuak a, a then sikul-te an kal a, zan lamah chuan tih tur dang an neih loh lai anih avangin Slide Show te leh Drama te an entir thin a. He hun hi Pathian thu zirtirna hun remchang tak anih avangin Sap-hote khan an hmang tangkai hle a ni.

7. Hnam leh Mipui Chawikanna (Uplifting of the People)
Mara rama lo kal Sap-hote khan tisa taka Mara fate chawikanna lam pawh an lo hma nasa hle. Tam a tlak laiin Sap missionary-te chu an bel thin a, chhiat-rupna thil a lo thlen pawhin Sap missionary ten theih tawp chhuahin mipuite chu an tanpui thin. Sap-hote hian anmahni In leh lo te pawh tha thei ang berin an sa a, thianghlim thei ang berin an enkawl chhova, insumdawn-tawnna, inkalpawhna kawng leh inbiakpawhna lampang pawh an ngai pawimawh em em a, hengah te hian a sulsutu ah an tang zel a. Heng avang hian Sorkar pawhin an hnathawh hi tisa tak pawhin a chhuang a, chawimawina te pawh a lo hlan tawh nghe nghe a ni.

May 12, 1937 khan King George the Sixth chuan British Sorkar tan leh a Ram-awp chhunga Mipuite chawikannaa a Hnathawh that chawimawi nan Rev. R.A. Lorrain kha the Coronation Medal a lo pe a.  Rev. R.A. Lorrain nupui – Mrs. Maud Louise Ulander Lorrain pawh British Ram-awp chhunga awm Mara fate tana a hnathawh that chawimawi nan the Kaiser-I-Hind Silver Medal chu kum 1946 khan a lo hlan ve tawh bawk a ni.

8. Mission Sikul (Mission School)  
Mara rama lo kal Sap-hote ngaih pawimawh ber pakhat chu Zirna (Education) hi a ni. Hei hi a chhan chu Zirna In (School) leh Hospital te hi thlaraubo chhandamna atan leh hnam chawikanna atana hmanraw pawimawh ber an nih vang a ni. Mara ram an lo thlen hnu reilote-ah Roman Hawrawp hmangin Mara Tawnga Ziak leh Chhiar theihna tur A, AW, B chu March 16, 1908 khan an lo siam peih ta a. Mara rama Sikul hmasaber pawh Serkawr khuaah, July 1, 1908-a sa tanin, August 24, 1908 khan an sa zova.

Hemi hnu hian Mara rama Zirna Sikul hmasaber chu August 24, 1908 khan an tan thei ta nghal a ni. Amaherawhchu, vanduaithlak takin hun engemaw chen chu Rev. R.A. Lorrain hian zirlai tur a hmu zo lo! Vanneihthlak takin Saiha khua atangin Mawkhah leh Laihnao te chu lehkha zir turin an lo kal ta hlauhva, Sap-hote hian Mara 2 chu lehkha an zirtir tan ta a. Thla 3 hnu-ah chuan chawlh hmangin an khaw lamah an haw a, an rawn kir leh chuan an thiante engemaw zat an rawn hruai ve a.

Thla engemaw zat a ral leh meuh chuan Zirlai an pung tial tial a, Mizoram (Lushai) khawdang atangin thenkhatin an rawn pan ta hial a, tichuan, Ziak leh Chhiar zir hi mi 22 an chuang ta hial a ni. Zirlaite hi kum 10 atanga 35 inkar an ni tlangpui.  April 18, 1922 khan British Sorkar chuan British Sipai Officer, Lt. Col. G.H. Loch chu tir-in Inspection a rawn nei a, hetiang hian Mara Fate Chungchang Report tha tak a pe a ni:– (1). Mara Sikul naupangte kutziak (handwriting) chu British–ho kutziak aiin a tha zawk, (2). Mara te an zaithiam tlangpui, (3). Mara naupangte chu an thenawm hnam dangte aiin an fai zawk, (4). Riatlô, Tisôpi khua chu ziak leh chhiar thiam hmasaber a ni,  (5). Kum 1913 khan Mara mi 50 ten ziak leh chhiar an thiam tawh, (6). Kum 1922 khan Mara fa zinga tam zawk chuan ziak leh chhiar an thiam tawh.

Kum 1918 atang chuan Mara mi ngei ten Zirtirtu hna an lo thawk tan a, Tv. A. Khidia, Head Teacher – Mission Sikul (Serkawr) atana an lak phei chu kum 17 chauhva upa a ni. Hetih hun lai hi chuan kum 4 a zawna lehkhazir thei-te chauh zirtirtu ah an la thin. Zirna hi miin an la hlut loh em avangin Zirlaite hi lawmman (Stipend) thlatin Rs.3/- an pe nghe nghe. Kum 1947-a India-in Independence a hmuh khan Sap-hote phalna-in, Mara rama Missionary-te Sikul din Primary School 21 leh Middle School 1 te chu Missionary ten India Sorkar hnenah an hlan ta a ni.

9. Puanthui Zirna (Tailoring School)
Rev. R.A. Lorrain nupui, Mrs. Maud Louise Ulander Lorrain chuan kum 1917 khan Mara hmeichhiate tan Puanthui Zirna (Tailoring School) a din a. London khawpui atanga Sap ho, anmahni tanpui tura lo kalte nen Mara hmeichhiate chu Puanthui Dan an zirtir thin a. Rev. R.A. Lorrain fanu, tleirawl chhuak tir – Nula Tlôsaih Lorrain pawhin kum 17 a rawn tlin khan Hmeichhe hote hi Puanthui a zirtir ve tan a. Heng Mara hmeichhia puanthui rawn zirte hian Puanthui thiamna chauh an hawn tel lova, ramdang siam puan leh thawmhnaw tha tam takte chu Puanthui an zir lawmman atan Sap-hote hian an hawntir thin bawk.

Kum 1917 bawr velah kha chuan Lehkha an zir theih nan lawmman pawisa fai (stipend) te, thilpek hlu tak takte an dawng a, chutiang chuan lehkha zir turin Sap-hote khan mite an lo thlem thin a ni.  Tunah erawhchuan, hun a danglam a, lehkha hi leiba nen, nei lo chung chung pawhin, In leh lo leh thilneih hlute pawh kan fate zirna atan kan tiral thin a. Zirlaite pawhin lehkhathiam lo nih chu kan zak a, a zir sang apiang leh a thiam apiang kan inchhuang thin a, hei hi kan intlansiakna ber pawh a ni ta.

10. Hmeichhe School (Girls’ School)
Sap-hote kha hnampui an nih avangin, abik takin hmeichhiate hamthatna tur an ngaihtuah em em a. Mara hmeichhiate chawikanna tur kawng hrang hrang an dap a, Puanthui Zirna bakah pawh Sikul a hran liau liauva din thaa an hriat avangin hemi atan hian remchang an zawng reng a. Kum 1929 khan Sap-hote awmna Serkawr khuaa School building chu an sa tha a, hemi rual hian Naupang Sikul (Kinder Garten School) leh Hmeichhe ho tan bik Hmeichhe Sikul (Girls’ School) an sa tel nghal ta bawk a.

He Hmeichhe Sikul hi peihfel anih veleh, Rev. R.A. Lorrain fanu Miss Marguerite Annie Tlôsaih Lorrain leh Miss Irene E. Hadley chuan hma la nghalin, Hmeichhe Sikul (the Girl’s School) leh Naupang Sikul (the Kinder Garten School) chu an hnapui berah an nei ta nghal a. Kum 1932 khan Hmeichhe Sikul hian zirlai 45 a nei a, kum 1935 ah erawhchuan a let-a pungin zirlai hmeichhia 60 zet an awm tawh nghe nghe a ni.

Hmeichhe Sikulah hian Ziak leh Chhiar mai bakah khawsak relbawl dan, inchhung chetdan, eirawngbawl dan, nungchang, hriselna leh naupang enkawl dan thlengin an zirtir a, Pathian thu pawh Zirna danga an zirtir tel angin an zir tel ve bawk.

11. Sunday School (Chawlhni Sikul)
Mara rama Sap missionary Rev. R.A. Lorrain te khan Mara A, AW, B an siam zawh kum 1908 hnu khan Sunday School hi an tan tawh ngeiin a rin theih a. Amaherawhchu, a zir tur mi an la inhmuh theih loh avangin, mumal tak leh awmze nei tak chuan an la kalpui lovang tih erawh a rin theih.

Kum 1917 atang erawhchuan, Sunday School hi mumal takin an nei tawh tih record an nei a. Hetah pawh hian Mission Sikul leh Hmeichhe Sikul-a kal te, Dam lo te, Puanthui Zir te, Pitar, Putar, Naupang leh Dam lohna avanga lo leh ram lama feh ve thei lote chu Sunday School kai an ni tlangpui a. Kristian hming ziak tam zawk an lo awm hnu-ah erawhchuan, Chawlhni (Sunday) tlai dar 2:45-3:30 inkarah Sunday School hi an kai thin. Sunday Sikul ah hian Mara A, AW, B te, Hla te, Sap Hla tawi (English chorus) te leh Pathian thu te an zir thin a. Chuvangin, kum 1929-a Mara ram pumpuia Sunday School kai report pawh a tha hle a – mipa 4032 leh hmeichhia 3397 zetin an kai thu an tarlang a ni.

12. Inpek-pumhlumna (Incarnational Model)
Lal Isuan misualte min chhandam nan mihringah a rawn chang (Incarnate) ang khan, Mara rama Sap-hote khan Mara faten Lal Isua kan rin theih nan Mara fate tan an pum-in an rawn inpe a. Mara culture, tawng, rimawi, ei leh in, harsatna leh beiseina, nundan leh khawsak dan engkim (language, arts, music, beliefs, problems, hopes, aspirations, communication system) an rawn tawm a, Mara mi hial nupui-pasalah an rawn nei a, an rawn nih chilh-a, an rawn thih-chilh ta mai hi thil mak leh ropui tawp khawk a ni.

Indopui II-naah khan British Sipaiten Mizoram chhunga Sap-missionary-te chu an ram lama hawng rih tura an tih angin an hawng vek a. Mara rama Sap-missionary-te erawhchuan, Mara fate hmangaih avangin an haw ve duh lova, “Sual leh a thiltihtheihna lak ata Mara fate chhanchhuak turin kan lo kal a, an thihnaah chuan kan thi anga, an nun chuan kan nung ve ang,” tiin himna zawnga an ram lama hawn chu an duh ve lo a ni.

Vawiin thleng hian mahni inhlawh-chawpin Mara fate tisa leh thlarau nun vensakin Mara-hote zingah an la awm reng a. Mara-hote hian an vanneih bikna leh an vanneih chungchuanna hi hrethiam-in, hmang tangkai tak maw? tih chu Zawhna lian tak a ni. Rev. A.B. Foxall nupui – Mrs. Marguerite Tlôsaih Lorrain kawrchung (Petti-coat), kum 1962-a London-a an lei chu tunah hian hak-tlakin ala tha a, kum 46 zet a ni tawh a nih chu! He Kawrchung hi darthlalang bawm chhungah dah-in Missionary Bungalow (kum 1914-a sak), Serkawr khuaah vawn that a ni.

Tlipna:
Khawvel-a Church history leh Mission history ah missionary ten an duhthlanna ngeia an thawhna hmuna mite nupui-pasala nei a, an lu an phum thu hi hriat tur a vang hle, hriat tur a awm lo ti ila kan tisual awm love. Sap-hote hian An rawngbawlna ram mite (native people) chu nupui-pasal atan chuan an nei duh ngai lova, thil tenawm leh râpthlak takah an ngai a. North East State pakhat-a Sap-missionary pakhat pawhin a rawngbawlna ram-a mi nula a hmangaih tlat mai a, a rawngbawlna an tihtawp-sak a, missionary anihna atangin an bân tawp mai a nih kha! Mara rama lo kal Sap-hote erawhchuan Mara mi leh sa ngei nupui-ah an nei a, vawiin thlengin an tu leh faten an la awmchilh- a, Mara ram leilungah ngei an lu an phum vek a ni. Hetiang khawpa hmangaihna nasa leh mak hi tungchhova piang mihringte zingah hmuh tur a awm dawn emni?

Popular Posts