Sunday, October 28, 2012

Nang, Nunna Bu-ah I Hming A Chuang Ang Em?

“Tin, mitthite, alian ate-in, Lalţhutphah hmaa ding ka hmu a; Tin, Lehkhabute an hawng a; Tin, lehkhabu dang Nunna Bu chu an hawng bawk a; Tin, mitthite chu lehkhabute-a ziak an thiltih ang zela relsakin an awm ta a…Tu hming pawh Nunna Bu-a ziak an hmuh loh chuan Meidilah an paih bawk a” Thup.20:12-15.
1. Thuhmahruai
Hringfa zawng zawngten Rorelna Hnuhnungber (Final Day of Judgment) kan hmachhawn hunah chuan, Pathianin mihringte rilru ngaihtuah te, ţawngkam chhuak zawng zawng te, leh thiltih zawng zawng a lo record vek tawh kha he Rorelna hun hnuhnungah hian en theih leh ngaihthlak theih leh hmuh-theih turin tih-chhuah a ni dawn a ni tih Solomona’n a lo sawi lawk tawh a, “Pathian chuan thiltih zawng zawng chungah ro a la rel dawn si a, thil inthup engkim, a chhia emaw, a ţha emaw te pawh, tih hi” tiin, (Thuh.12:14).  Chatuan ram mawiah chuan Lal Isua’n ro a rel dawn a, Mifelte mah chhandam hram hram chauh an nih si chuan, Lal Isua Hnawltu misualte tawpna chu eng ang tak ni ang maw? Nang, Nunna Bu-ah i hming a chuang ang em?

2. Eng Chin Hi Nge Pathianin A Record?
Mi tam tak chuan, he khawvelah hian a ruka an thil ngaihtuah ţha lo tak tak te, an thusawi ţha lo tak tak te, an thiltih ţha lo tak tak te avanga Pathian hnen aţanga thungrulhna emaw, zilhauna emaw an tawh loh avangin lang-chhuak tawh lo tur leh pawi lo turah an ngai a, an inhnem-chawp ţhin. Mahse, Engkimtithei Pathian hian kan thiltih, ngaihtuah leh ţawngkam chhuak (a lang leh lang lo engkim or zawng zawng) zawng zawng hi fel takin a record thlap a. Kan thih hnu, Lalthuthleng var hmaah kan ngaihtuah te, thusawi leh thiltih-te hi chhiar theih (read-able) tur leh hriat theih (hear-able) tur leh hmuh theih (see-able) turin a awm vek dawn a, hengte hmang ngei hian kan chungthu ngaihtuah a ni ang a, rorel-sak kan la ni dawn a ni, “Mihring tan vawi khat thih ruat a ni a, chumi hnuah rorelna a awm ang” (Heb.9:27).

3. Krista Rorelna Lalthutphah leh Lalthuthleng Var Lianpui
Lal Isuaa kan dinhmun, kan rinna chu Ringtute tan thil pawimawh tawp-khawk a ni dawn a. Ringtu-tholeh te, Mithianghlim lawr (rapture)-a tel te chu, mithianghlim lawr zawh veleh Krista Rorelna Lalthutphah (Greek.Bema)(Thup.22:12) hmaah kan ding nghal ang a. Leia rawngbawlnaa kan thiltih ţhat avangin Lawmman pek kan ni ang a, kan chhandamna chungchangah  zawhna engmah a awm lovang. Mithianghlimte Lawmna hun a ni dawn a. Ringtute hming chu Beramno Nunna Bu-ah hian a chuang kuau dawn a, Fakna Hla siamtu’n a sawi ang hian, “A phek ropui an keu ang a, Thisena tlante hming zawng a kim ang” a tih ang hian, kan hming an han lam chat mai tur chu… Lawm avanga bianga mittui luangin Lal Isua lawmthu kan hrilh hun a ni dawn a ni (Thup.20:4-6. Thawhlehna Hmasa tih hi Ringtute Thawhlehna a ni a, Thawhlehna Hnuhnung tih Ringlote Thawhlehna a ni).

Ringlote chunga thil thleng tur erawhchu a dang ta! Kum 1000 ral hnu-ah, Ringlo-tholeh te chu Lalthutthleng Var Lianpui (Greek.thronon megan leukon) hmaah hian an ding ve thung dawn a. He hunah hian Ringtute chuan Lal Isua ro kan relpui ang a, vantirhkoh te, ringlote chungthu thlengin kan ngaihtuah ve dawn a ni. Ringlote chu an thiltih ang zela rorel sak an ni dawn a, a ţha lam zawnga beisei tur engmah a awm tawh lovang a, Thiam-loh-chan-tir tura rorelsakna a ni deuh ber dawn a ni. Lal Isua an pawm duhlohna te, a dera Kristian an nihna te, an ngaihtuahna ţha lo tak tak an hman ţhin  te, ţawngkam ţha lo an chhak-chhuah te, leh an thiltih dik lo zawng zawng te khan anmahni thiam-loh-chantir-tu a la ni vek dawn a ni, “I thu chuan thiam a chantir ang che a, I thu vek chuan thiam loh a chantir bawk dawn che asin” (Mat.12:37, Thup.20:11-15).

4. Lehkhabu (Nunna Bu) Hi Eng Zat Nge Awm?
Thuthlung Tharah hian “Nunna Bu” (Heb. cepher chayyim; Greek. he biblos tes zoes) tih hi vawi 8 tarlan a ni a (Phil.4:3, Thup.3:5, 13:8, 17:8, 20:12, 15, 21:27, 22:19). Thuthlung Hlui-ah chuan vawi 2 chiah tarlan a ni thung a. Mosia chungchangah “Lehkhabu” tih ringawt (Ex.32:32) “Nunna Bu” tia tarlanna a awm bawk (Sam 69:28). Mosia chungchanga  “Lehkhabu” tih ringawt hi “Nunna Bu” tho hi niin Bible Scholar-ten an ngai. Thuthlung Hlui-ah hi chuan Lehkhabu 1, “Nunna Lehkhabu” chauh hi a sawi niin alang a. Thuthlung Tharah erawhchuan, Lehkhabu hi 2 awm angin a rawn sawi a, Lehkhabu 1 hi Thuthlung Hlui-a a sawi “Nunna Lehkhabu” or “Nunna Bu” kha a ni a, a dang hi chu “Beramno Nunna Lehkhabu” (Thup.13:8, 21:27) tih kher a niin alang.

 
4.1. The Book of Life
Rindan tlanglawnah chuan, Pathianin mihring a siam tawh reng reng (Adama & Evi bakah, an thlah-te zawng zawng) chu Lehkhabu pakhatah a ziak (record) vek a. Misual (wicked) a ni emaw, miţha (righteous) a ni emaw, a hming leh thiltih kha record a ni ta a. Tichuan, he Lehkhabu –“Nunna Lehkhabu” (Book of Life)-ah hian a tirah chuan misual leh miţha hming an ziak (record) vek a. Amaherawhchu, Pathianin hun ţha a pek te hmang ţangkai duh lova, Lal Isua ring duh lo apiangte chu an thih veleh, he Nunna Bu aţang hian Pathianin an hming a thaibo (removed) ta ţhin a ni, an ti! (cf. Ex.32:32, Sam 69:28). Lal Isua ringtu dik tak-te erawhchu an thih veleh, he Nunna Bu-ah hian thaichhiat theih tawh loh (never to be erased) turin an hming ziak (chhinchhiah) a ni ta thung a ni, an ti! (cf.Thup.3:5).

4.2. The Lamb’s Book of Life
Pathian thu hi a har a, a thuk em em a, hriat-fiah vek theiha a ni lo. Nunna Bu chungchang chhuitu Bible Scholar-te chuan, Pathianin mihring a siam-te hming a record-na “Nunna Bu” bakah hian, a fapa Lal Isua ringtute hming chuanna bik, Lehkhabu Special tak, “Beramno Nunna Bu” (Lamb’s Book of Life) tia vuah chu a awm hrang leh ngei niin an ring a ni. Miin thinlung tih tak zeta Lal Isua a rin chuan, a thih veleh khan “Nunna Bu”-a a hming tih-ngheh a nih bakah khan, “Beramno Nunna Bu”-ah, thaibo thei tawh loh turin (never to be erased) a hming ziah-luh nghal a ni a, hei hi Vanram luhna “gate-pass” (citizenship) a ni nghal a ni, an ti (cf. Thup.21:27).

Rorelna Hnuhnungah chuan he Lehkhabu 2, Nunna Bu leh Beramno Nunna Bu te hi an keu ang a. Ringtute tan chuan, “A phek ropui an keu hunah chuan, Thisena tlante hming zawng a kim ang, Zion-ah chuan tlante nen rorel turin” tih a nih lai khan, Ringlote tan erawhchuan, he “Beramno Nunna Bu”-ah an hming an hmu zo ve dawn lova. Chuvangin, fimkhur takin, “Nunna Bu” (Book of Life) ah an hming a awm leh awm loh an en-nawn leh ngat (double-check) nghe nghe dawn a, hemi hnu-ah hian misual chu Mei dilah an paih chauh dawn a ni, an ti!   Nang, Nunna Bu-ah i Hming A Chuang Tawh Em?
 







0 comments :

Popular Posts