Monday, November 19, 2012

Lal Isua Tuarna – Part 1

1. Thuhmahruai…
Kum 2000 khan Thlarau Thianghlim pawlna duhawm tak ka chang a. Hetia Thlarau Thianghlim pawlna leh hruaina ka chan lai hian, ka rilru-a ka ngaihtuah leh suangtuahna piah lamah Thlarau chuan kan Lalpa Isua tuarna nasat-zia min hmuh tir a. Vawiin thleng hian, Lal Isua inpekna ropui-zia ka ngaihtuah apiangin misual min chhandamna tura Lal Isua tuar nasat-zia Thlarauvin min hmuh-tir kha ka hrechhuak leh ţhin a, Tuarna zara Malsawmna ka dawn avanga ka lawm êm êm rualin, ka rilru leh thlarau erawhchu nasa takin a rum ţhin a ni.

Lal Isua Tuarna thu ka ziak hi i chhiarchhuah vek hunah chuan, Pathianin i thinlungah thu sawiin, Thlarau Thianghlim pawlna thar i chan ngei ka beisei a. Chuvangin, ţawngţaina nen, ngaihtuah chunga uluk taka chhiar turin ka ngen che a ni.  Lal Isua Tuarna – Taksa, Rilru leh Thlarauva a Tuarna chungchang (Matt.26-27, Mark.14-15, Luk.22-23, Joh.13, 18-19) hi a remchang ang angin, chhui chhoh kan tum ang a.

Lal Isua tuarna hi a nasa hle a. Taksa tuarna, Rilru lam tuarna leh Thlarau lama tuarna a tawk vek a. A mal mal hian chhui tham a awm vek a, thiam ang tawkin chhui kan tum ang a. Vawiinah hian kan phak tawkin Taksaa a Tuarna lam aţangin kan chhui ţan dawn a ni. Post 2/1 atan chuan a thui lutuk dawn avangin Sunday apianga rawn chhunzawm ka tum ang.

2. Tuarna Nât Dan a In-ang Vek Lo…
Tuarna hi chi hrang hrang a awm a. Kawng 3-in a ţhen phawk theih awm e, Taksa tuarna, rilru lam tuarna leh thlarau lama tuarna te, tiin. Taksa tuarna te hi kan hlau ţhin, a hlauhawmna leh a hrehawm zualna chhan chu, rilru lam tuarna a thlen ve ţhin vang a ni. Rilru leh thlarau lam tuarna engmah a awm loh chuan, taksa tuarna ringawt hi chu a nâ êm êm lem lo mai thei a ni.

Nâtna thuhmun tuar ţheuh ţheuh te, retheih dan thuhmun ţheuh te leh piansualna tuar (ramtui lei lo, pianphunga rual ban lo) ţheuh ţheuh te hian, hrehawm kan ti hlei hle-in, kan tuarnâ hlei hle ţhin. Hei hi a chhan ber chu rilru lama tuarna a tel ve leh ve loh athu a ni. Rilru lama tuarna hian hrehawm tihna leh thawpikna nasa tak a thlenin a tizual ţhin ni zawkin alang. Hei hian rilru lama tumruhna te, rilru lama lo inbuatsaih lawkna te leh rilru azira tuarna a nât hleih theih dan leh rilru pawimawh zia a hril chiang awm e.

3. Hrehawm Zawng Zawng A Hrekim…
Lal Isua kha Pathian fapa, lei leh van Lal ni mah se, khawvela a lo pianin, lal in ropuiah a piang lova, puan lum nuam leh khum ţha pawh chang lovin, ran inah a lo piang a, ran chaw pekna thlengah a mu a. Mihring nun hnuaihnung ber chan changin, a piantirh aţangin, a lo seilen a, a puitlin thlengin tlâkchhamna leh thawhrimna-in a hun a hmang zo va. Van Lal Fapa mah nise, leia a pa Josefa hnathawhnaah rim tak leh hah takin nilengin a thawk ve ţhin.

A lo puitlin hnu a, rawngbawl a ţan khan, miten zui an tum laia a chhanna chu, “Sihalten kua an nei a, sava ten bu an nei. Mihring fapa erawhchuan lunghahna a nei lo” (Mt.8:20) tih a ni.  Keimahni ang bawka mihring ve tho a ni a, Nupui neih a, chhungkaw din a, in leh lo ţha ngaihtuahna te, sum leh pai lakluhna tur sum hnar nghet neih te chu a rilru-ah a awm ve ngei ang! Mahse, Lal Isua hian chutiang lampang reng reng a ngaihtuah lohzia a thiltih aţang hian a lang chiang hle. Tlâkchhamna leh retheihna-in a thlen hrehawmna zawng zawng a hre kim a, thawhrimna avanga tuarna pawh a hre hle ang tih a chiang bawk. Kan sawi tak te khi tuarna nasa tia vuah chi zawng a ni hauh lo vang. A tuarna nasa tak leh a vawrhtawp chu Kalvari tlang lam, a pa (a innghahna leh inhnêmna ber) tak ngial pawhin a kalsanna hmun kha a ni zawk a, kan la chhui zel dawn a ni.

4. Min Venpui Rawh U…
A thih hma Pathian ni hnuhnung ber Palm Sunday kan tih ni chuan, Sabengtung no chunga chuangin, Lal nihna nen Jerusalem-ah a lut a. Hemi ni aţang hian rim takin a thawk a, an man zanah chuan zan rei tak hnu-ah Gethsemani huan lamah ţawngţai turin an kal a. Zanriah kilna aţanga Gethsemani huan lam pana an kal chhuah hun hi zanlai a pel lo a nih pawhin zan a rei hle tawh a ni ang, an chau hle a, Gethsemani huan an thlen chuan Zirtirte chu an chau lutuk, an mu thlu nghal mai niin alang. Lal Isua tan erawhchuan, men rim, hah leh chauh a sawi theih lohva, a pa hnenah ţawngţaiin, lungngaihna hual velin a awm a. An ţawngţaipuina a mamawh êm êm a, ţawngţaipui ngen tura a rawn kal chuan a Zirtirte chu muhilin a rawn hmu a!

Pathian fapa meuh chuan, “Ka rilru a lungngai êm êm a, thihna khawp hial a ni, min venpui rawh u” a ti lawm lawm a nih chu! Mahse, a Zirtirte hi an meng thei ngang lo. Thlarau zawngin a peih a, tisa erawhchu a chak lo a ni (Mt.26:37f, Lk.22:44). Lal Isua a mangang êm êm a, a tuarna a nasat êm avangin, a thlan chu thisen far lian tak angin a far hial a (Lk.23:44). A khawharna leh manganna nasa tak hnêm tur leh chhawk tur hian ţhian a mamawh êm êm a. Mahse, a ţhiante zingah leh mihring zingah tumah ţanpuitu a hmu lo! (mahse, a Pa tal a la nei alawm…). Mizo hlaphuahtu chuan, Lal Isua chunga thilthlengte hi a ngaihtuahin a rilru a khawih-in a lainat ngang a ni ang, “Khual In chang lo Lal Isua, tun thlengin a hmangaihte zingah a hnawng fo ţhin…Hnawng tawh suh se, Khawvel Chhandamtu chu, a vahvaih nan Judai kha tawk rawhse!” tiin, Lal Isua tuarna, lungngaihna leh manganna belh-chhah tawh lo hrâm turin min ngen hial a ni.

5. Thihna Khawp Lungngaihna Chu…
Lal Isua lungngaihna hi a nasa hle a ni ang. Nâtna avang te, harsatna dang avang te leh thihna avanga lungngai-mangang te hnêm ţhintu, mitthi pawh kaitho theitu ngei khan, a zep thei ngang tawh lova, “Ka rilru a lungngai êm êm a, thihna khawp hial a ni, min venpui rawh u” a rawn tichhuak ta hial a nih chu! A van lainatawm tehlul êm!  Rilru lam zirmi te chuan, mihring hi chi 2 kan awm a, “extrovert” leh “introvert” kan ni e, an ti a. Extrovert-te hi chuan zep si-se nei lovin, an rilru-a thil awm ang ang kha an sawichhuak vek ţhin a, hei hian an rilru leh ngaihtuahna pawh a ti thawveng a, an rilru hahna leh lungngaihna pawh nasa takin a chhawk ţhin a, ţanpui pawh an awlsam, an ti.

Introvert-te erawhchuan, an rilru an kawm a, thil an ngaihtuah ngut ngut a, an rilru an puang vak ngai lo. Rilru lamah nasa takin an tuar a, an rum ţhin. Mahni nunna hial zah zo lova inla (suicide) ta te hi introvert an ni tlangpui an ti! Introvert-te hian an rilru an sawichhuah tawh chinah chuan an buai tak zet tawh tihna a ni, an ti. Bible Scholar-te chuan, a chanchin inziak an zirchian hian Lal Isua hi introvert a ni, an ti a. Gethsemani huana a rilru mangan thu a rawn sawichhuak a, a zirtirte ţawngţaipui a rawn ngên a, “Ka rilru a lungngai êm êm a, thihna khawp hial a ni, min venpui rawh u” a rawn ti ta mai hian, a lungngaihna leh manganna-in a vawrhtawp a thleng tawh a, rilru buai leh â thei dinhmunah emaw, rilru nâ lutuk avanga thi thut thei mai dinhmunah a ding reng tawh tihna a ni, an ti!

Helai thu “Thihna khawp hial lungngaihna hun” tih hi a ţawngbul lamah chuan Greek Perilupos hman a ni a, English-in “periphery, border” an tih tâk hi a ni.  Hetiang hun hi mihringin a thlen tawh chuan, nunna leh thihna ramri (border)-ah a awm tawh tihna a ni. Chuvangin, mi a lungngaihna leh manganna a nasat tawh êm avangin, lungngaihna te, hlauhna te, thinurna te hian an tihduh ngai loh thil râpthlak tak tak te a tih-tirin, mahni nunna inlâk mai te, lungphu-chawla thihna (heart-attack) hial pawh awlsam takin a thlen mai ţhin. Thisen pawh, zun, ek, ka, hnâr, mit mai bakah, thlan-ah te hial a chhuak thei a ni. He Perilupos thleng tawh te hi tunlaia rilru buai avanga â ta te, tualthah tim miah lo te, mahni nunna hial in la ta mai te hi an ni, an ti!

6. Vuak leh Sawisakna Chi Hrang Hrang…
Chutianga, lungngaihna nasa tak a tuar hnu chuan, a mantu tur te chu an lo thleng a, an rawn man a. Mi chi hrang hrang (Ana, Kaiapha, Pilata, Heroda, Pilata) hnenah hruai a ni a, vuak, chil chhâk leh sawisakna chi hrang hrang a tuar leh a.  Dr. Bruce Corley (D.Th, New Testament) chhut dan chuan, Lal Isua man a nih khan Puithiam lalber hlui Ana hnenah an hruai hmasa ber a (Mt.26:57, Mk.14:53, Lk.22:54, Joh.18:13-14, 18:19-23). Hemi hnu hian Kaiapha, Puithiam lalber hnenah an hruai leh a (Mt.26:59-66, Mk.14:55-64, Lk.22:67-71, Joh.18:24). Hemi zawh hian, a mantu-ten an sawisa hrep a (Mt.26:67-68, Mk.14:65, Lk. 22:63-65).

Khawvar dawn hnaih chuan Sanhedrin-te hnenah hruaiin, an sawisa ve leh thung a (Mt.27:1, Mk.15:1, Lk.22:66-71, Joh.18:28). Khawvar veleh Pilata hnenah an hruai ta nghal a (Mt.27:2, Mk.15:16, Lk.23:1, Joh.18:28). Pilata hnen aţang hian Heroda hnenah an hruai leh a (Lk.23:6-15). Herodan a sualna a hmuh si loh avangin Pilata hnenah a tir let ve leh a. Pilata hian thutawp siamin Kross-a khenbeh turin a pe ta a ni (Mt.27:15-26, Mk.15:6-15, Joh.18:39-19:10, Lk.23:13-25).

Achunga tarlan mi hrang hrangte hnen aţang khian Lal Isua’n tihduhdahna, sawisakna, taksaa tuarna chi hrang hrang- hnek, ben leh vuak te a tuar a. Khi’ng te khi, taksaa tuarna nâ tak tak an ni vek a ni. Heng zinga a râpthlak ber ber 3 Vuakna, Kross rit tak an puttir leh Kross-a an khenbeh chungchang chu remchangah kan chhunzawm leh ang.

Huana Isua rum hre rengin,
A thlan thisen-a far nen,
A nungzang mawi an vuakna te,
A pa ngunhnam a tuarzia te…

0 comments :

Popular Posts