Sunday, December 9, 2012

Lal Isua Thlahtute Chhuina {Genealogies of Jesus Christ}

King David & Bathsheba
Chhiar A Ninawm…
A dik khawp mai. Tu tan pawh Matthaia 1:1-17, Luka 3:23-38 thu, “chu mi chuan chu mi chu)…a hring a,” tih leh “…chu mi chu (chu mi) fa a ni a,” tih hi chu Sermon tui chu harsa kan ti tlang a ni tih a chiang e. Zoram Pastor leh Evangelist zingah pawh hian hemi bung leh chang kher kher hmanga Sermon chu an tam hauh lovang. Sermon lam chu sawi loh, a chhiar hrim hrim hi a hlawh lo a ni ber e. Bible-a telh zel ţul kan tih leh tih loh hi sawiho ta ila, “ţul ti lo” hi an tam zawk mai thei a ni. Mahse, Damdawi pawh hi a thlum leh a ei nuam chauh hi ei tur a ni lova, a kha leh ei har deuh deuh, etc. hlei hlei hi an hnathawh a chak a, a ţha viau zawk thin angina, helai Bible thu hi a pawimawh êm êm tlat a ni.

Bible-a Chang Pawimawh Lutuk A Ni…
Kan sawi tak ang khian Lal Isua Thlahtute Chhuina (Genealogies) hi Bible-a thu chhiar nuam ber ni lo mah se, Thu pawimawh ber pawl a ni tlat thung. Lal Isua Thlahtute Chhuina hian Lal Isua chungchangah thil pawimawh tak 2 rawn ken tel a nei a. Pakhatna, Pathianin, Judate nghahfak “Messiah” chu Davida thlah aţanga lo chhuak tur a nih thu Zawlneite hmanga a lo sawi lawk tawhte thlen dikna leh tifamkimtu chu Lal Isua Thlahtute Chhuina hi a ni. Pahnihna, Lal Isua Thlahtute Chhuina hian, Kristian Thurin pawimawh tak mai, “Lal Isua chu mihring dik tak” a nihzia a rawn nemnghet bawk a ni.


Bible scholars tam tak chuan, “Lal Isua Thlahtute Chhuina chiangkuang tak hi ziakin awm ta lo sela, Judate kha Lal Isua ring tura hneh (convince) an har hle ang, thil theih loh hulhual a ni hial ang,” an ti! Pathianin, Zofate chu kan mi hmasa Pastor leh ringtute kaltlangin Pathian fakna hla ţha tak mai min pe a, lungawih tak leh thlamuang takin, “Amah chu Pathian leh mihring a ni, Lal leh Chhandamtu nih a fawm…” tiin kan sa rual ţhap ţhap thei a ni.
Hetih lai hian, Bible scholar tam tak chuan, chhuan tam tak liam ta aţang tawh khan Lal Isua Pathianna-ah an chian êm êm laiin, an rilru-ah Lal Isua Mihring nihna hi pawm harsa an ti a, a Pathianna bak hian an rilru-ah hmun a chang tam lo. Chuvangin, Matthaia leh Luka hian Thlarau hruaina kaltlangin, Lal Isua, mihring dik tak (fully human) a nihna an hriat theih nan leh Juda kulmuk ber pawhin a duh thala a chhui-chhuah theih turin Lal Isua Thlahtute Chhuina hi dik tak leh uluk takin an rawn ziak chhuak ta thlap a ni.

Thlahtute Zinga 9-te Hi An Va Tenawm Ve!?  
Pathian rorel dan leh remruat dan mak zia hi, “a mak!” tih bak chu sawi ngaihna a awm lo. Fakna hla-ah kan sa ţhin a, “Ka Lalpa remruat dan hi a makin, hriatthiam a har luah e… Keinin vanduainaah kan ruat… Mahse, a hmangaihna lantirtu…” tiin. Pathianin kan mizia a hrechiang a. Mi tam tak chuan, thil ţha leh ropui (malsawmna) kan dawn tam chuan Amah (Pathian) kan hlat tulh tulh dawn tih a hrechiang a. Chuvangin, Amah (Pathian) laka kan rinawm zawk theih nan, tuarna karah te, harsatna karah te, hmuhsitna karah te, deuhsawhna leh tihduhdahna karah te, lusunna, mittui leh lungngaihna karah te min hruai a, min zirtir ţhin a lo ni.

Nova Zurui Mu sual
Lal Isua Thlahtute zingah hian mifel leh ţha an awm ţeuh laiin, an zinga 9-te hi chu, tel tlakah kan ngai lovin, Out-law ah kan ngai ţheuh awm e. Tunlai hun ang phei chu ni se, Kohhran-a inti-thlarau mi, Pharisai em em-te phei chuan (mahni in-enfiah nachang hre hawt lovin) an teh tling lo nasa dawn a, Lal Isua Thlahtute zinga telh chu sawi loh, Kohhran aţanga Hnawhchhuah (ex-communicate) kan rawt ngei ngeiin ka ring. Mahse, Pathian chuan hetiang mi, hmuhsitawm-te hi a hmanrua atan a thlang a, a hmang duh tlat si!!! (1Kor.1:26-31). “Ka Lalpa remruat dan hi a makin hriatthiam a har luah e” tih vawng vawng-na tham a ni reng a ni. Heng mite chanchin hi tawi te te lo en teh ang.

Adama kha, mahni nupui pawh veng zo lo, mitlaw a ni a, Thaibawih lutuk, thihna turah pawh mahni nupuite thu awih a, zui dun dun mi a nih mai bakah, mi dawihzep, rorelna hmachhawn dawna midang puh daih ching a ni! Evi kha, Mahni pasalte pawh rawn duh lo, luhlul tak leh mahni taksa nawmna leh ropuina chauh duh, Taksalawmnangaisangi a nih mai bakah, a thiltih dik loh khuh nan thurualpui tur, mahni pasal ngawih ngawih pawh bum-hlum tawp duh mi leh hremna pumpelhna tur chuan midang puh daih ching a ni bawk! Nova kha, thlarau lama chhungte leh khawvel mite entawn tur atana Pathianin a chhanchhuah leh a ruat a nih laiin, Zu ruih avangin a Zahmawh hial langin a mu a, a ruih chhiat avangin a tute thlahte chuan anchhia an dawn phah hial! Tamari kha, mahni pasala-pate (father-in-law) hial pawh ît a, mutpui duh hial mihring a ni!

Rahabi kha Nawhchizuar a ni a, a taksa mawina hmanga sumdawng a, mi tam tak rilru leh taksa tichhetu a ni. Ruthi kha, hnamdang mi, pasal sun, chanvo nei lo a ni a. Judate danah chuan chanvo ţha chang turin hmun a nei loh mai bakah, Messiah lo pianna turah chuan tel lo tur No.1 zinga an dah a ni. Davida kha, Pathianin “Ka rilru ang pu mi” ti mah se, a Lal nihna hmanruaa hmanga Mi-nu, pawmlai nei (Uria nupui) pawh ît a, pawngsual duh mai mihring a ni! A thiltihsual khuh nan tim hauh lova tual pawh that duh mai ala ni cheu! Bathsebi kha, Lal Davida ît tur leh hmuh theih ngei tura inchung zawla inbual duh mai, a hmel mawina, îtawmna leh ţhatna hmanga mi thlêm ching a ni a. Pawngsual a tawh thu pawh mahni pasalte hnena sawi chhuak duh lova zep tlat duh mai mihring a ni. Solomona kha, Pathian malsawmna tinrenga hual velin a awm a. Mahse, Pathian thupek hnawlin Hnamdang hmeichhia-te nupui-ah a nei a, hmeichhia (a nupui)-ten a rilru leh taksa an hruaibo sak a, a nupuite avangin Hnamdang pathiante hial be duh khawpin thlarau lamah a tlachhia a ni!
Rahabi, Nawhchizuar

Ngaihtuah Zui Atan…
A chunga kan sawi aţang khian, Pathianin mi tlinglo te, mifello te leh misualte a hmangaih a, Lal Isua lo kal chhan ber pawh a ni tih chu a chiang hle (Luka 19:10). Mahse, a ngaihdamna chang tur chuan sim a ngai a, “Pathianin misual a hmangaih” tih-ah hian a a tawp mai lova, “Misual sim chauh Pathianin a ngaidam a, a faah a pawm” tih hi chiang taka hriat a ngai bawk a ni (1 John. 1:8-10).

Krismas Hun ropui leh Lawmawm lo thleng turah hian, Adama anga bawhchhia, Evi anga taksa lawmna zawng, Nova anga zu ruih ching, Tamari anga mahni pasal-pate pawh mutpui duh mai, Rahabi anga taksa pawh eizawn nana hmang duh, Ruthi anga pasal sun, chanvo nei tawh lo, Davida leh Bathsebi anga uire, Solomona anga Pathian thupek hnawl a, pathian dang biak ching ni mah ila, Pathian hnena kan kir a, kan in-lamlet a, kan sualte kan sim chuan Pathianin min ngaihdam ngei dawn a ni tih hre reng ila.

Mualphona khur thûk ber rap tawh kan lo nih pawhin, Pathianin midangte tana malsawmna ni turin Thlarau lamah mi ropui takah min la chherchhuak thei a ni tih hre reng chungin, he Krismas 2012 lo thleng turah hian hnunglama thil kal tawhte theihnghilhin, Pathian hnena Inpek Tharna hun atan i hmang ţheuh ang u.

0 comments :

Popular Posts