Sunday, December 2, 2012

Lal Isua Tuarna - Part 4

1. Thuhmahruai
Richard Wumbrand-a India-a a lo kal khan, Communist lung in-a rei tak tang a, Krista hming avanga tihduhdahna tinreng a tuar avangin Kristian mai ni lo, India sorkar meuh pawhin a chawimawi a, an lo hmuak a. Communist sipaiho laka a thil tuar râpthlak tak tak, a taksaa sernung lian pui pui awm, thihpui theih tur hliam engemaw zat a tuar-te chu TV kaltlangin khawvelin kan thlir a nih kha. Khatih laia zawhna a chhanna zinga lungchhiat-thlak tak mai leh rilru khawih tak mai pakhat kha kan la hria-in ka ring, “Lal Isua Krista hming avanga vuak leh tihdudah tuar a, hliam nasa tak, thihpui mai theih turte ka tuar-te ai hian, ka unau kohhran leh kristian-ten min sawiselna leh min hmuhsitna ţawngkam-te kha nâ ka ti zawk daih” a ti a nih kha!

Hnamdang leh ramdang-mi ten an beih leh an do kha Lal Isua tan a nât dan a nep ang. Mahse, Lal Isua kha, amah ţan tura rin leh beisei, a chipuite (Judate) ngeiin an phiarru a, dik lo taka hek-in, itsikna avanga inthurualin, ram dân leh sakhaw dân zawng zawng bawhchhia a, kalh vekin a chungthu dik lo takin an rel a, dik lo takin thiamloh an chantir ta a nih kha! A mantirtu Juda Iskariota phei chu ama Zirtir zinga mi, a chawthleng zenpui ngei lehnghal! Lal Isua rilru hi eng ang takin nâ ang maw!?

Lal Isua Tuarna Part – 3 ah khan, Lal Isua kha, a Rilru lama a Tuarna a nasat êm avangin a nunna pawhin a tlin rei loh phah a ni ngei ang kan ti a. Amah zui tura a thlanbik, a Zirtirten anmahni duhthlanna ngeiin Lal Isua an zui a. An rinawm zia tihlan nan pawh, “I thihna ah chuan ka thi ang a, midangin tlanchhiatsan vek che mahsela, kei chuan ka phatsan tawp lovang che” tiin an tiam ngat ngat a, mahse a sa-seh a lo thlen meuh chuan, an phatsan leh ta vek si a nih kha.



2. A Ţhianten An Phatsan a, a Chipuiten An Do
Hmelma leh hmelma te chu indovin, inhua sela intihlum hial mahse, a awm hle a, hmelma an nih tlat avangin, amaherawhchu, chi khat hnam khat, chhungkua emaw, unau emaw te chu inhua-in indo tlat ta sela thil mak tak a ni ang. Intihhlum duh hial khawpa an inbeih phei chuan thil mak tawp khawk a ni ngei ang. Harsatna leh lungngaihna, manganna leh buaina-te kan chunga a thlen laiin, ţhian ţhate, chhungkhat lainate, chi leh kuangte chu min tanpui tur leh min hrethiam a, min hnem turin kan beisei ţhin a, kan inghahna leh inhnemna ber pawh an ni ţhin.

Lal Isua dinhmun leh a chunga thilthleng hi a lungchhiat thlak hle mai. A ţhian ţha ber ber-ten an phatsan a, a chipui-ten an dova, chance pe miah lovin dik lo taka thiamloh chan tir a la ni zui a nih chu!!? A va nâ dawn êm! Lal Isua hian a rilru lamah eng ang takin tuar nasa ang maw! Lal Isua chunga thil thleng kan sawi tak-te zinga pakhat chauh tal pawh khi kan chungah thleng ve ta sela, he Rintlem, Vui reng ţhin, Phatsan ţhin, leh Hel reng ţhin thinlung leh ngaihtuahna hian a tlin meuh ang em le?

3. A.C.R. For The Last 3 Years Is Ok
Mithiamten an chhut danin, Kum 3 chhung hi “infiahna” emaw, “in-enthlakna” emaw leh “hnathawktu hnathawh a ţhat leh ţhat loh te, a nihna hriatchianna tura enthlakna hun” atan a tawkah an ngai a ni. Sorkar Officer emaw, sorkar hnathawk tuemaw Promotion pek a nih dawn pawhin, a ACR ziaktu-in, “His/her annual confidential report for the last 3 years is ok” an tih tawh chinah chuan, promotion chu ngei ngei tura ngaih a ni a, harsatna dang a awm tawh ngai lo. Chuvangin, khawvel mite pawhin, kum 3 chhung hi rinawm leh rinawm loh emaw, rintlak leh rintlak loh fiahna hun atan a tawkah an lo ngai ţhin a ni.

Kristian-te huangah pawh hian, Bible scholar-ten an chhut dan chuan, ringtu rinawm leh rinawm lo, ringtu ţha leh ţha lo emaw, rawngbawltu rintlak leh rintlak lo “tehna” (criteria) atan “Kum 3” hi Kohhran Pawl (denomination) tin deuh thaw-ah hian he tehna hi, thlarau lam kaihhnawih thilah an hmang uar hle a ni tih an hmuchhuak a. Hetiang ngaihdan vang hi a ni mai thei, kan Pastor leh Upaten Piangthar, Lal Isua Lal leh Chhandamtu-a pawm inti-te hi min ring nghal ngawt ngai lova, kum 3 tal kan tlin hma chu kan rinna thu-ah rinhlelh kan kai ţhin. Probationary Pastor atan nemngheh-te pawh hi kum 3 an enthlak hnu-ah Ordination pek theih an ni chauh ţhin a. Kohhran tam zawkah, Upa inthlan-ah pawh  Rawngbawltu (Tual upa) kum 3 tling chin chauh Upa candidate-ah an tel thei a ni.

4. Kum 3 Chhung Tehmeuh Zuitu-in A Phatsan Maw?!
Lal Isua hian anmahni duhthlanna ngeia zuitu, a Zirtirte hi kum 3 chhung, rim tak leh hah taka kaihruaiin, a zirtirna hnuaiah, a sur-a-sa tuar tlangin, a thlum-a-al ei leh in dunin, an rinna leh rilru tih chak nan thil mak tam tak a ti a, thil chi hrang hrang hmangin a zirtir a, nundan mawi leh ţha tinrenga zirtirin a kaihruai hlawm a. Amah, Lal Isua nihna leh thiltihtheihna pawh hrechiang a, a ţul chuan thih thlenga Amah (Lal Isua) ţan ve ngam tur pawhin beiseina sang tak a nei ve ngei ang tih a rinawm a ni.

Tichuan, Isua Zirtirte khan kum 3 chhung Lal Isua kha an lo zui tawh avangin, rinawm ngei ngei tur leh thih thlenga Lal Isua ţan ve  ngam ngei tura ngaih an ni. Amah Lal Isua ngei pawhin he rilru hi a pu a ni ang tih a rin theih a. Amaherawhchu, vanduaithlak takin, Lal Isua an man zanah khan, a Zirtirte zawng zawngin an tlanbosan vek a! Vawi duai lo “I thihna-ah ka thi ang a, midangin tlanchhiatsan vek che mahsela, kei chuan ka phatsan tawp lovang che,” tia thlamuantu Petera ngei pawhin hla tak aţangin a zui ngam ţawk a. Lal Isua tana mualpho a ţul hun lai berah pawh hniak phawi map lovin vawi 3 tlawng a phatsan mai zawng a nih kha! (Mt.26:31-35, 69-75, etc.).

Hmeichhe hmaah vawi 2 zet chiang elhkhenin a phat bawk a. Petera hian Lal Isua a phatna tawp lam vawi 2 phei chu Isua a hriat miah loh thu chhechham meuhvin zu han sawi a! A sahimna duh avanga dawt a sawi tak mai chungchanga Petera tana rilru nât vena tur lam chu thudangah dah ta ila. Lal Isua tan hian a rilru nât-thlak tur zia chu… kum 3 chhunga a chawthleng zenpui ngei, a thlum-a-al ei za a, sazu leh a mei ang maia inzui ţhin khan, thih hlauhawma a han awm a, tuar tur leh thih theihna dinhmuna a han din takah chuan a hre duh ta lova, a hre ngam ta lova, a hre ta reng reng lo a nih chu!! Lal Isua tan hian a va nâ dawn tehlul em!!

5. Dawt Ka Sawi Chuan Pathianin Min Tihlum Rawhse!
Petera’n Lal Isua a phat a, a hriat loh thu a sawi laia a ţawngkam hman hi a râpthlakin a ûchuak a sin aw!! Matthaia 26:72 & 74-ah hetiang hian record a ni a, “Chumi chu ka hre lo, tiin chhechhamin a pha leh a…, chu mihring chu ka hre lo tiin, anchhia inlawhin chhia a chham ta a” tiin. Helai “Chhechham” tih ţawngkam hi Greek ţawng chuan, “Omnumi” hman a ni a, a awmzia chu, “Thudik a nih zia fiah ka huam e” tihna a ni. A thusawi a dik zia lan tir nan-a intiamna (chhechhamna) a kawk ber. He Grk. Omnumi hi chu Grk. Katanathematizo aia nêp zawk leh ţawngkam pawnlang zawk a ni.

Petera ţawngkam hman hnuhnung zawk, “Anchhia inlawh-in chhia a chham ta a” tih tak hi Greek ţawngkam dang, “Katanathematizo” hman a ni thung. He ţawngkam thung hi chu a serious-in a râpthlak êm êm a, thih leh dam karah chauh an sawichhuak ţhin a. Thudik tak an sawi ngei ţhin bawk. Grk. Katanathematizo awmzia dik tak chu, “Dawt ka sawi chuan Pathianin min tihlum rawhse!” tihna a ni.

Petera hian he ţawngkam pahnih-te hi a hmang kawp a, dawt a sawi loh zia tihhlan nan leh Lal Isua a hriat loh chian zia tih-lan nan, chhechham meuhvin a intiam a nih chu! A sa himna atana Petera dawt sawi râpthlak zia hi sawi hian a siak lo a ni ber mai!! Lal Isua rilru tur hi han ngaihtuah ta ila – Kum 3 chhunga rim taka a zirtirna leh kaihhruaina te, ţhahnemngai taka rinawmna vawng tura a beihna leh fuihna zawng zawngte kha a thlawn zo ta em ni ang? A Zirtirte zinga a rin ber leh amah (Petera) ngei pawhin vawi duai lo a lo intiam ve tawhna-te a ngaihtuah let ang a. Kum 3 chhunga a thawhrimna chu a hlawhchham der angah Lal Isua hian a ngai lo thei lovang a, hei ringawt pawh hian, a rilru chu eng ang tlukin chhun nâ-in tuar nâ ang maw?

6. Harsatna Hun-a Tlanchhiatsantu Thian Chu!
Nangma nun-a thleng turah han in-chan teh. I Hmangaih ber, i engkim, ui engmah nei hauh lova, phal taka i pek ţhin ngei khan, chhiat i tawh a, harsatna hun rapthlak i hmachhawn a, i tan hun thim a lo thlen veleh, hre duh ta reng reng lo che sela, ngaihsak duh ta reng reng lo che sela, tlanchhiatsan ta che sela, eng ang in nge i rilru a nât ang le? Ţhiante leh mi zawng zawng hmuhtheih-in i tlachhe rawk rawk mai lovang maw?  A awm lutuk, a nâ êm a ni. Pathian meuh pawhin a tuar zo lo a lawm, “Aw, van te u, ngaithla ula, aw leilung, beng chhi rawh. LALPA chuan thu a sawi e. Fanaute ka chawmin ka tiseilian a, ka chungah an hel ta si a. Bawngpain a neitu a hria a, Sabengtung pawhin a pu chaw pekna a hre bawk a. Israelho erawhchuan an hre silova, ka mite chuan an ngaihtuah lo ve” (Isaia 1:2) a ti lawm lawm a nih kha!

Lal Isua hi a hmangaih-te leh a ţhian ţha ber ber-ten an phatsan mai piah lamah, a chungthu tal chu dân-in a phal angin, Sakhaw hruaitute leh sorkar hruaitute hian Dik takin an rel sak ngei turah a beisei ve ngei ang le! A beisei ang thil hi a thleng meuh ang em? Hun remchang hmasaberah Lal Isua Dik lo taka Thiam loh chantir a nih dan (Wrongful Conviction of Jesus Christ) chungchang kan chhui leh dawn a ni.

0 comments :

Popular Posts