Saturday, May 11, 2013

Jona Hun Hnuhnung

1. Ninevi Khawpui
Ninevi khawpui hi Nimrod-a din a ni a (Gen.10:6-12), Mesopotamia rama khawpui ropui leh hlui ber-te zinga mi a ni. A hming awmzia hi Assyrian Nina or Ninua tih ațanga lak niin, Heb.ninʹe-ve tih chu “Sangha” tihna a ni a, “Sangha Khawpui” tihna a ni mai awm e. Khawvela khawpui hlui ber-te zinga mi niin, thilhlui laichhuaktuten an chhut danin Ninevi khawpui hi BC 4500 vela din niin an chhut a. Thil laihchhuah zingah hian Ashurbanipa Library, Cuneiforms tablets 16,000 chuang zet a tel a, heng ațang hian Thilsiam leh Tuilet (history of the flood & creation) chungchang-te bakah, hun kal tawh-a sakhuana lam leh khawvel lam thil tam tak an hriat belh theih phah a ni.

Assyria khawpui Ninevi hian an Lal Sennacherib (705 B.C – 612 B.C) hunlaiin a vanglai a tawng a. Sennacherib Lalna a tawp hian Ninevi khawpui pawh a tluchhe ve nghal ang a ni. Ninevi khua hi Tigris lui chhak lam kamah a awm a. Acre 1800-a zau chhungah, leirawhchan (brick)-a hung, mel 8 kual chhungah a awm a. Khawpui pawnah hian Zawlnei Jonah thlan chhinchhiahna “Nebi Yunus” (the prophet Jonah) chu Captain Felix Jones chuan kum 1834 khan a hmuchhuak a. Hei hi Jona thlan tak tak nge, ama hriat-reng nan-a lungphun tih erawh a chiang lo. Captain Felix-a chhui dan chuan Ninevi khuaah hian Zawlnei Jona hunlai hian mi 174,000 chuang zet an cheng niin a chhut a. Bible-in “ding leh vei pawh thliar thei lo 120,000” a tih hi naupang chauh a sawi a nih phei chuan 600,000 pawh an tling thei turah a ngai hial bawk (Jona 4:11).

Jona Leh Ringlo Mite

Thuhmahruai
Ringtute hi kan mikhualna ram khawvela awm kan nih avangin, kan nundan, chetzia leh rilru put-hmang chu khawvel mite (ringlo mite) nen danglam turin Pathianin min ngai a, min beisei a ni (Rom 12:1-3). Kan thiltih ţhat te, kan awmdan mawi te, kan ţawngkam leh chezia duhawm tak-te an hmuh hunah ringlo mite rilru a hneh ang a, Pathian lam an lo hawi dawn a ni (Matt.5:13-16, Phil.1:27-29, 1Pet. 2:11-12).

Mahse, thil mak tak chu, a chang chuan ‘ringlo mite hi ringtute aia an ţhat zawk chang leh kawng dika min hruai zawk hun a tam’ tlat mai! Jona 1:1-17 kan chhiar chuan, hei hi a dik zia Pathian Zawlnei Jona chungah chiang takin a lang a ni! Jona hian Pathian nung chanchin chu ţawngkam leh chetziaa ringlo mite hnena hril tur a nih laiin, Ringlo mite zawk hian Pathian Zawlnei Jona hi an sawi-harh a, kawng dikah an hruai zawk tlat a nih chu!

Ringlo-mi Lawng Captain-in Pathian Zawlnei Jona a Hau!
Tarsis pan tur Lawng chhuak chu thui pawh a kal hma-in thlipuiin a nuai ta! Lawng a kehsawm vek leh tuipui-a an pil mai a hlauhawm tawh hle. Lawng mite hi an buaiin, an hlau êm êm a, an pathian ţheuh an ko a, Lawng Captain hian a pathian hnena ţawngţai lo Lawnga chuang zingah an awm em? tih thlengin a enfiah hial a. Chutia a enkualnaah chuan Jona, tui taka lo muhil chu a hmu a, mak a ti êm êm a, a hau hial a ni! Jona 1:5-a kan hmuh angin, thlipuiin Lawng a nuai na chhan hi Zawlnei thuawih lo Jona vang a ni a, Pathian tirh thlipui a tleh a ni. A chang chuan, Jona ang hian, ringtute hian ringlo mite hnenah (chungah) harsatna kan thlen ţhin. Lawng Captain ang hian, ringtute thiltih zahthlak tak avangin Ringlo mite mak tih kan hlawh a, ringlo mite khawih-harh kan ngai ţhin (1:5-6).

Jona Vang Emni Ninevi Khua Kha An Sim?

Thuhmahruai
Assyria mite sual turu dan hrechiangtu mi tam tak chuan, an sualte sim-a Pathian hnen lama an kir theih mai an ring ngai lo. Mahse, Assyria khawpui, a hunlaia khawvela khawpui lian ber ni hiala chhal Ninevi khuaa mite chuan Jona’n tlân pah-a Pathian thu tawi te a sawi chu an bengkhawn a, an ngai pawimawh a, an sualte simin Pathian lam an hawi phah tlat a nih chu! Jona Pathian thusawi (preaching) chauh hi nge an nunah awmzia nei a, thildang a tel ve? tih lai hi rilru-ah zawhna a lut nghalin ka ring, a pawimawh reng a ni. A chhan chu Pathian thu-in “an ţhatna turin engkimin a thawhsak hlawm ţhin” tiin min hrilh tlat a (Rom 8:26-28), hmanraw dang pawh Pathianin a hmang tel thei tih a chiang a ni.

Jona Thusawi Kha a Pawimawh Lutuk
Pathianin Jona hnena tih tur a pek chu “Tho la, Ninevi khaw ropui takah chuan kal la, anmahni kalh-in thu va sawi rawh” (Arise, go to Nineveh, the great city, and preach against it) tih a ni. Jona chuan Pathian duhdan ang takin thu ava sawi ta a, a thusawi hi a tawi ţek ţawk hle mai, “Tun achin ni 40-ah Ninevi hi tih boral a ni dawn e…” (Jona 3:4) tih ringawt a ni. Mahse, Jona hian Pathianin sawi tur a tih chin chiah a sawi avangin, a thusawi hi a thawk nâ êm êm a, Ninevi khuaa mite hian Jona thusawi lai tak hi hmu vek lo mahse, an inhrilh chhawng nasa a ni ngei ang tih a chiang a ni.

Jona Kha Engah Nge A Tlânbo?

Thuhmahruai
Bible-a kan hmuh angin, Zawlnei Jona chanchin (Jona 1-4) hian Pathian thu kan sawinaah a ţha lam leh a chhe lamin sawi a hlawh hle a. Jona thiltih leh a chunga thilthleng hrim hrim hian tisa leh thlarauvah entir (historical, cultural, scientific & spiritual implications) pawimawh tak tak a nei a (Cf. Matt.12:40-41, Luka 11:32). Eng ang hawi zawng pawhin chhui dawn ta ila, Thupui Zir tham zet a awm vek a ni. Vawi khat atan chuan a sei dawn lutuk avangin sei lutuk lovin Jona chanchin hi kan zir chho leh dawn a ni.

Pathianin Zawlnei Jona a Ko 
Mi ţhenkhat chuan Jona hi ‘Zawlnei’anga koh an hreh viau laiin, Bible (Old Testament) kan en chuan, Pathianin “tih tur bik tuka a koh-te reng reng hi Zawlnei tia koh an nih deuh vek” avangin, Jona pawh hi “Zawlnei” tia koh hi a dik lohna a awm lo. Jona hi Amittaia fapa, Galili rama Zebulun Gath-hepher hnam a mi (Josh. 19:13) a ni a. Lal Jeroboam II leh Israel Lal Joasa Lal laiin Pathianin Ninevi khuaah hian a tir a ni (2Lalte 14:23-25). Jona hming awmzia hi “Ţhuro” (dove) tihna a ni. A hming awmzia leh Jona rilru put-hmang leh thiltih duhdan hi a intu lo hle! Zoram ringtuten kan chhun hle mai. Chanchin bu-ah “Lalrinawman ruk a ru” tih te, “Vanlalfaki a uire” tih te, “Vanlalringan zungawl a vei” tih te, “Lalchhandami chu Satanic pawlah a tel” tih te kan chhiar hian rilru zawng a tibuai a ni.

Thlarau Râlthuam {Spiritual Weapons}

Thuhmahruai
Miin Pathian a rin veleh hian, Pathianin Amah Ringtu chu Thil pawimawh tak chi 2 a pe a. Chu chu Ringtu chuan a Rochun (inherits) nghal a. Chungte chu, (1). Malsawmna (tisa leh thlarauvah), (2). Pathian hmêlma chu a hmêlma a ni ve nghal ta bawk. Pathian hmêlma hlun leh thiltithei ber chu Setana a ni a, ani hian Pathian leh a hnathawh apiang chu tih-chhiat (destroy) vek a tum a ni (John 8:44). Pathian fapa Isua Krista pawhin Diabola (Setana) leh a hnathawh zawng zawng chu tih-chhiat vek a tum ve ta thung bawk a ni (1 John 3:8).

Setana hi Pathian thilsiam zinga Vantirhkoh chungnungber ni ţhin a ni a, a hel avangin Pathianin a paih-thla a ni (Isaia 14:12-15). Setana hi mihrngte aiin thiltihtheihna nei sângin, chak zawk mahsela, amah Siamtu Pathian chakna leh thiltihtheihna nen chuan tehkhin tham a ni lo. Lal Isua ringtute chu Tho-leh Krista thiltihtheihna ropui tak neitu leh ţawmpuitu kan nih avangin, chu thiltihtheihna chuan min venghim tlat ţhin a ni (1 John 4:4).
Isua Krista Thiltihtheihna neitu leh ţawmpuitu kan nih avangin Pathian Râlthuam Famkim pek kan ni a (Eph.6:10-18). He râlthuam hmang hian Setana chu do a, thlêmna leh sualna-te chu hneh zel turin Pathian thu-in min fuih a ni. Heng Pathian Râlthuam Famkim 7 te hi i lo zir-ho teh ang u.

1. In Kâwng Chu Thutak-a Hrêngin (6:14)
Kâwng chin hnuai lam emaw, pum bawr vel (waist or abdomen) emaw hi Seat of Emotions a ni a, khawvel thil leh tisa châkna hmunpui a ni, an ti! Bible-ah kan hmu a,“an pathian chu an pum a ni a, an ropuina pawh an mualphona a ni, khawvel thil an duh ţhin” (Phil.3:19). Mihring hi a hlauh luat avang emaw, a châkna a so-sân luat vang emaw-in hre reng chungin thil a tisual ţhin a ni. Ringtute chu Thutak (Isua leh Bible)-a kan innghah tlat chuan hlauhna leh tisa châkna kan hneh zel thei dawn a ni (John 8:32, 36; Phil. 3:19).

Hnamdang Nupui-Pasala Neih Hi {Inter-Cultural/Faith Marriage}

Thuhmahruai
Hnamdang Nupui-pasala neih (inter-cultural/faith marriage) hi thupui pawimawh tak a ni a, a taka nunpui leh lem duak erawhchu har tak a ni thung. Bible chuan thutlukna fel tak siamin Israel fate kha a warning thlap a, hnamdang chu nupui-pasala nei lo turin chiang takin a hrilh lawk a. Hei hi a chhan ber nia lang chu, (1) culture in-ang lo chuan chhungkua leh chi leh hnamah harsatna a thlen thei a, (2) hnamdangte hian sakhaw (pathian) biak an nei hrang a, (3) ringlo mi nupui emaw, pasal emaw chuan a rinna a phat-tir (bansan-tir) theih dawn avangin a ni ber (cf. Gen.28:1-4, Deut.7:1-4, 4:15-20, 17:17, 2Sam. 1Lal.3:1, 11:1-14, Neh.10, 13:23-27, 1Kor.7:12-39, 2Kor.6:14, 1Pet.3:1,2). A chunga tarlan aţang khian, hnam-dang nupui-pasala neih hian mimal, chhungkua, hnam leh sakhua (personal, family, culture, social & spiritual life)-ah te harsatna siamin chhungkaw hlim nih leh Pathian tana mi ţangkai nih a harsa dawn tih a hriat-chian êm avangin Pathianin a phalsak lo niin alang.

Hruaitu Ropui Mosia, Davida, Solomona-ten Hnamdang An Nei!
Pathianin Israel fate kha hnamdang nupui-pasal-a nei lo turin a hrilh mawlh mawlh a. Mahse, an Hruaitu ropui ber ber-te chuan hnamdang nupui-ah an nei lawi si! Mosia’n hnamdang mi (Kush/Ethiopian) a neih hi Jehova ringtu ve tho a nih rin a ni tlangpui a (Numb.12:1-3). Hetih hunlai hian Thupek chiangkuang tak la awm lo mahse, hnamdang mi neih hi Pathianin a phalsak lo tih an hre tawh niin alang. Hemi avang hian a Unaute sawiselna (demna) pawh hi Mosia’n a chhang-let ngam lova, Pathian meuh pawh a inrawlh lo niin alang. Lal Davida khan hnamdang mi Bathsebi nupuia a neih khan, a nupui neih dân chungchang mai ni lovin, “Bathsebi kha hnamdang mi” a nih avangin Pathian a lungni lo tel bawk niin an ngai (2Sam.11). 

Popular Posts