Saturday, May 11, 2013

Hnamdang Nupui-Pasala Neih Hi {Inter-Cultural/Faith Marriage}

Thuhmahruai
Hnamdang Nupui-pasala neih (inter-cultural/faith marriage) hi thupui pawimawh tak a ni a, a taka nunpui leh lem duak erawhchu har tak a ni thung. Bible chuan thutlukna fel tak siamin Israel fate kha a warning thlap a, hnamdang chu nupui-pasala nei lo turin chiang takin a hrilh lawk a. Hei hi a chhan ber nia lang chu, (1) culture in-ang lo chuan chhungkua leh chi leh hnamah harsatna a thlen thei a, (2) hnamdangte hian sakhaw (pathian) biak an nei hrang a, (3) ringlo mi nupui emaw, pasal emaw chuan a rinna a phat-tir (bansan-tir) theih dawn avangin a ni ber (cf. Gen.28:1-4, Deut.7:1-4, 4:15-20, 17:17, 2Sam. 1Lal.3:1, 11:1-14, Neh.10, 13:23-27, 1Kor.7:12-39, 2Kor.6:14, 1Pet.3:1,2). A chunga tarlan aţang khian, hnam-dang nupui-pasala neih hian mimal, chhungkua, hnam leh sakhua (personal, family, culture, social & spiritual life)-ah te harsatna siamin chhungkaw hlim nih leh Pathian tana mi ţangkai nih a harsa dawn tih a hriat-chian êm avangin Pathianin a phalsak lo niin alang.

Hruaitu Ropui Mosia, Davida, Solomona-ten Hnamdang An Nei!
Pathianin Israel fate kha hnamdang nupui-pasal-a nei lo turin a hrilh mawlh mawlh a. Mahse, an Hruaitu ropui ber ber-te chuan hnamdang nupui-ah an nei lawi si! Mosia’n hnamdang mi (Kush/Ethiopian) a neih hi Jehova ringtu ve tho a nih rin a ni tlangpui a (Numb.12:1-3). Hetih hunlai hian Thupek chiangkuang tak la awm lo mahse, hnamdang mi neih hi Pathianin a phalsak lo tih an hre tawh niin alang. Hemi avang hian a Unaute sawiselna (demna) pawh hi Mosia’n a chhang-let ngam lova, Pathian meuh pawh a inrawlh lo niin alang. Lal Davida khan hnamdang mi Bathsebi nupuia a neih khan, a nupui neih dân chungchang mai ni lovin, “Bathsebi kha hnamdang mi” a nih avangin Pathian a lungni lo tel bawk niin an ngai (2Sam.11). 


Mahse, Pathian chuan hnamdang mi nupui laka a fa Solomona chuan a Lalthutthleng a luah a phalsak a, a thlah kal zel chu Khawvel Chhandamtu Isua Krista lo pianchhuahna atan a thlang leh tlat lawi si! Hnamdang nupui lak aţanga piang Solomona chu Israel Lal zinga fing ber leh hausa ber a ni a. Mahse, a pa Davida a chhun a, hnamdang mi nupui-ah a nei a, a nupui-te chuan a lalram leh a thlarau nun an tih-chhiat sak thung (1Lal.11:1-14). Pathian ruat hruaitu ropuite pawhin hnamdang mi nupuia an neih chuan, keini lo sawisel tur a awm emni? tiin ngaihdan kan siam ve mai dawn emni ang?

Hnamdang Nupuia A Neih Avangin Mosia A Buai!
A nupui Zipori a thih hnu-ah, Mosia’n hnamdang mi nupui-a a neih avangin a thisen zawmpui unaute 2, Miriami leh Aarona ten nasa takin an sawisel a (Numb.12:1-3). Mosia pawh a ţawng ngam lova, Pathian tak-ngial pawh a inrawlh tlat lo! Chhiartu-in ngaihdan i lo sawi hma-in ka sawifiah nghal mai ang e. Pathianin Mosia lama ţang a, a rawn inrawlh a, Miriam-i a hrêmna chhan ber zawk kha chu, “Miriami leh Aarona’n Mosia Hruaitu dinhmun (political & spiritual leadership) an chuh-pui vang zawk” kha a ni. Bible scholar-ten Mosia’n hnamdang mi nupuia a neih chungchangah Pathianin engmah a sawichhuah miah loh dânah hian, he thu-ah kher hi chuan Mosia hi chhan tlak a awm lo, a thiam lo hulhual tihna a ni e, an ti! Thûk zawka chhuitute phei chuan, Pathian thupek en hian, Mosia’n Kanaan ram a luh ve Pathianin a phal lohna chhan-te zingah hian ‘hnamdang nupuia a neih’ hi chhan pawimawh tak pakhat niin an ngai bawk! (see Gen.28:1ff, Deut.7:1-26). Pathianin ‘ţha lo’ a tih chu, keini a Thilsiam mihring-te tan lek phei chuan ‘a ţha lo lehzual’ ngei ang le!

Davida’n Hnamdang A Pawngsual A, Nupui-ah A Nei Zui!
Lal Davida hian nupuiah hnamdang mi, Bathsebi a nei a. A nupui neihdan erawh hi chu a ûchuakin, a râpthlak khawp mai. Tunlai ţawng takin, “Davida’n hnamdang mi Bathsebi, mi nupui a hmangaih dân hi chu hmangaihna mitdel” kan tih ang chi hi a ni chiang mai! Davida hian Bathsebi saruaka inbual a hmuh kha… a hmel ţhat leh pian nalh mai bakah, a chezia leh nungchang kha a âtchilh a ni ngei ang! Engtinnge i hriat? Nupuia neih ngei ngei a tum dân hi a turu êm alawm! Pathian a hlau lova, history chhe tak a hnutchhiah tur pawh a pawi ti tawh lova, a chipuite leh a thlah kal zel tur pawh a zah zo tawh lo tlat alawm! Bathsebi a duh lutuk avang hian, a pawngsual a, a pasal a thah sak phah tawp! Davida’n Bathsebi a hmangaihna leh a âtchilhna râpthlak tak hi Pathian pawhin a hriat-pui a ni ngei ang, a hmangaih ber leh a duh êm êm chu nupuia a neih a phalsak tlat mai! Davidan Bathsebi a pawngsual te, a pasal Uria a thah sak te, Pathian thupek bawhchhiaa hnamdang mi nupuia a neih te chu a ti dik lo tih hre reng mahsela,“Bathsebi a hmangaihna thinlung kha Pathianin a pawm sak tlat” a ni tih hi thudik a ni.

Hnamdang Nupuia A Neih Avangin Solomona A Tlu!
Israel Lalte zinga ropui ber, fing ber leh hausa ber chu hnamdang mi nupui-a a neih avangin a Lalram leh a thlarau nun a tluchhia ti ila kan sawi sual awm lo ve (cf. 1Lal.11:1-14). Lal Solomona khan Nupui 700 leh hmei 300 teh meuh a nei a, a tlinin, ava chhel tak! Bible scholar ţhenkhat chuan Solomona khan Jehova tan leh Israel ram tan thiltum awmze nei tak leh fel tak neiin, hnamdang mite kha nupui-ah a nei zawk a ni, an ti! He ngaihdan hi Bible-ah pawh a inziak tlat mai! Lal Solomona hian a Lalram tihngheh nan te, Israel mi Chithlah tih-pun nan te leh hnamdangte Jehova biak-tir a tumna (political, cultural & spiritual motives) avangin hnamdang-te kha nupui-ah a lo nei a ni, an ti! (cf. 1Lal.3:1f, 9:16). Mahse, vanduaithlak takin, amah Solomona kha tisa leh thlarauvah a lo chak tawk ta si lova, a tum kha a failed mai ni lovin, amah zawk khan a hnamdang nupui-te pathian chu a biak-pui ve ta zawk a, a Lalram pawhin a tlukchhiat-pui bakah, Israel fate tan Entawntlak lohvah a inchhuah ta a ni. I hneh theih loh tur chu buan suh ang che.

A Pawi Lo, Chatuan Nunna Chang Thei ila…
Nupui-pasal thu hi It’s my life tih ngawt chi a ni lova, “damchhung piah lam thil” a nih tlat avangin fimkhur theihtawp a ngai. Heta “Damchhung piah lam” ka tih hian, kan thih hnu-ah pawh kan hnam, kan thlah, chi leh kuang, chhungkhat-laina (generation)kal zel kha a effect tlat a ni. Nehemiah pawhin he nghawng ţha lo tak hi a hriatchian êm avangin, huai takin, hnamdang nupui-pasala nei-te chu a khak hlawm a, ânchhia a lawh a, thenkhatte chu a vua a, an samte a pawh thlaksak a, an fanute chu chungho fapa te neihtir lo tûr leh chungho fanute chu an fapate tan emaw, anmahni tan emaw nei lo tûrin Pathian chhalin chhia a chhamtir hial a nih kha! (Neh.13:23-29).

Khawvel a ni a, loh theih loh thil a awm thei a. Kan hmangaih tlat-te hi “hmangaih suh”kan intih sak ngawt thei lo. Pathian pawhin, a duhsak zawng chu a duhsak bur a,“Jacoba ka hmangaih a, Esauva erawhchu ka hua” a ti a ni (Rom 9:13). Chuvangin, hetiang thil (hmangaih tlat) hi kan nun-ah a thleng a nih pawhin, Pathian ringtu (Kristian) ngei kan hmangaih tlat theih nan Pathian hnenah ţawngţai tam ila. Kan Pathian hian kan ţhatna tur chu a hre lutuk. Kristian leh Kristian lo innei emaw, Paula sawi angin, ringlo mi ve ve, inneih hnu-a a tu-emaw zawk Kristian lo ni ta pawhin ringlo nupui emaw, pasal emaw chu ţhen mai lovin, Krista hnena hruai (ringtu/kristian-a siam) tum hi tih tur pawimawh tawp khawk a ni.

A Pawimawh ber erawhchu hei hi…
Engpawh nise, Eng thil pawh lo thleng sela, 
Eng-ang nupui-pasal pawh nei ila, 
A pawi lo, Ka thlarau Chhandam a nih a, 
Chatuan Nunna ka chan theih dawn chuan…

{He article hi Nikum May 6, 2012-a Sunday School kan zir lai (Zirlai 16 – Numbers 12:1-16) khan Chhuah turin ka ziak zo tawh a. Ka zin kual vel avangin ka lo theihnghilh daih a. Ka hrechhuak a, ka rawn phawrh leh a ni}

Popular Posts