Saturday, May 11, 2013

Jona Hun Hnuhnung

1. Ninevi Khawpui
Ninevi khawpui hi Nimrod-a din a ni a (Gen.10:6-12), Mesopotamia rama khawpui ropui leh hlui ber-te zinga mi a ni. A hming awmzia hi Assyrian Nina or Ninua tih ațanga lak niin, Heb.ninʹe-ve tih chu “Sangha” tihna a ni a, “Sangha Khawpui” tihna a ni mai awm e. Khawvela khawpui hlui ber-te zinga mi niin, thilhlui laichhuaktuten an chhut danin Ninevi khawpui hi BC 4500 vela din niin an chhut a. Thil laihchhuah zingah hian Ashurbanipa Library, Cuneiforms tablets 16,000 chuang zet a tel a, heng ațang hian Thilsiam leh Tuilet (history of the flood & creation) chungchang-te bakah, hun kal tawh-a sakhuana lam leh khawvel lam thil tam tak an hriat belh theih phah a ni.

Assyria khawpui Ninevi hian an Lal Sennacherib (705 B.C – 612 B.C) hunlaiin a vanglai a tawng a. Sennacherib Lalna a tawp hian Ninevi khawpui pawh a tluchhe ve nghal ang a ni. Ninevi khua hi Tigris lui chhak lam kamah a awm a. Acre 1800-a zau chhungah, leirawhchan (brick)-a hung, mel 8 kual chhungah a awm a. Khawpui pawnah hian Zawlnei Jonah thlan chhinchhiahna “Nebi Yunus” (the prophet Jonah) chu Captain Felix Jones chuan kum 1834 khan a hmuchhuak a. Hei hi Jona thlan tak tak nge, ama hriat-reng nan-a lungphun tih erawh a chiang lo. Captain Felix-a chhui dan chuan Ninevi khuaah hian Zawlnei Jona hunlai hian mi 174,000 chuang zet an cheng niin a chhut a. Bible-in “ding leh vei pawh thliar thei lo 120,000” a tih hi naupang chauh a sawi a nih phei chuan 600,000 pawh an tling thei turah a ngai hial bawk (Jona 4:11).



2. Zawlnei Jona Rawngbawlna
Zawlnei Jona hi Amittaia fapa, Kûryath-Âdâmôs, Gathhepher khawpui Zebulun-ho khaw lam chhuak a ni a. Kûryath-Âdâmôs hi tuipui kam Ascalon leh Gaza bula awm a ni (Jona 1:1, 2 Lalte 14:25). Lalte 2-naah chuan Zawlnei Jona hi Lal Jeroboama II (793–753 B.C) hunlaia Zawlnei ropui tak (great major prophet) a nih thu a ziak a. Israel Zawlneite zinga mi a nih angin, Israel Lalram chu Pathianin mal a sawm tur thu te, a la zau zel tur thu te, thlarau lama ala tlakchhiat tur thu-te nasa takin a lo sawi lawk tawh a ni.

2.1. Ram leh Hnam Ngaisangtu Zawlnei Chu…
Zawlnei Jona hian a ram leh hnam (Juda hnam) chu a veiin, a ngaihsak êm êm a. Amah ang êm êm-a ram leh hnam vei leh ngaihsak (a zealous patriot) hi Zawlnei dang tumah an awm lo. Hei hi ama inpuanna ațangin a hriat theih, “Hebrai mi ka ni…” (Jona 1:9) a tih-ah hian awmze ril leh pawimawh tak a awm a. Bible scholar-te chuan, Jona’n Hebrai mi a nih thu a sawilan kher hi a hunlai hian thil inzep pawimawh tak a awmin an ngai a. Jona hian a chi leh kuang (hnam) chungchang hi a zahpui lova, a chhuang a, miin hre ngei sela tih a duhzia a tilang a ni, an ti.

2.2. Ramdang leh Hnamdang Ngai Thei Lo Zawlnei Chu…
Zawlnei Jona hi amah a danglam ang chiah-in, a thuziak leh a thu-hril (messages)pawh a danglam a. Jona anga direct taka Hnamdang-te hnena tirh hi Zawlnei dang zingah tumah an awm lo. Jona lehkhabu anga hnamdangte chungchang țha lo lam hawi hlir ziakna ringawt chuanna hi a awm lo bawk. Zawlnei Jona thu-hril (message) hi Hebrai țawng chuan “Thumal 5” (5 words) chiah a ni a, a țha lam emaw, beisei-awm lam emaw pakhat mah a tel lo bawk! (Jona 3:4).

2.3. Lungngaia Rûm Chungin Ninevi Khuaah Thu A Hril…
Zawlnei Jona hian Israel ram tisa leh thlarauva a tlakchhiat sawt dân chu mit ngeiin a hmu a. Pathian hnen ațanga hriattirna dawng țhin a nih avangin, Israel ram chuan Pathian thin a ti-alh thuai ang a, hrêm ala tawk dawn tih a hrechiang êm êm a. Chutianga Pathianin a pek ram, a pianna leh seilenna ni bawk, chhe tur hre reng chunga rilru nâ taka a thlir lai chuan… a rilru tinâ zualtu leh lungngaihna belh-chhahtu dang a rawn thleng ta tlat mai!

Zawlnei Jona chuan Israel ram a vei êm êm a, a chhiat a phal loh tehlul nen! Pathian lah chuan Israel fate chu an sual an sim duhloh avangin hrêm ngei a tum a. A hrêmna tur hmanrua atan hian Israel hmêlma hlun, Assyria mite chu hman a duh tlat a, Pathian hmanruaa an țan theih nan, Amah Pathian hmaah an tlawm phawt a duh avangin Jona chu a tir ta! A thiltum hi Jona hnenah hian Pathian hian la puang chhuak lo mahse, Jona hian Pathian rilru leh thiltum dân chu a hre ve ta tlat mai! Pathian chhuah-chhal nan a hman phah hial a nih kha, “Hei hi kan rama ka la awm laia ka sawi kha a ni lo vem ni? Hei vâng hian Tarsis lamah ka tlânbo thuai a nih kha”(4:2), tiin. Jona hian Mi tupawh an sual sim a, Pathian hmaa tlawm a, inphah-hnuai reng reng chu Pathianin a ensan ngai lo tih a hrechiang hle a ni.

Jona rin ang ngeiin, Ninevi khawpui (Assyria mite) chu zuah an ni a, Pathian hmaa tlawm thei lo, sual sim duh lo leh luhlul Israel fate hrêm nan Pathian chuan a hmang ta ngei a. Israel ram chu B.C. 722 ah chuan Assyria mite lakah tlawm-chi-kimin an tlawm ta reng a ni. Hei hi hre lawkin, Jona khan Ninevi khuaa kal a, Pathian thu hril kha a duh thlawt lova, a châk thlawt lova, Ninevi khuaa mite thil țha hrilh leh pek kha Israel fate tan chhiatna a ni dawn tih a hriat avangin, lungngai leh rûmin, châk lo tak chungin thu kha a hril ta reng a ni!

3. Zawlnei Jona Hun Hnuhnung
Zawlnei Jona chu Ninevi khuaa thu a hril hnu chuan, a awmna khaw lamah a let leh a. Ninevi khaw ropui tak chunga thilthleng avang khan Zawlnei ropui leh hmingthang tak a lo ni ta a. Jona khan Israel rama lalram ropui tak lo thleng tur leh chhiatna lo thleng tur-te pawh a sawi lawk tho va. Mahse, a sawilawk-te chu a thlen tak mai siloh avangin, a chipui Judaten an thîk a, an hua a, an hmusit a, an tiduhdah ta a. Tichuan, a nu hruaiin Assyria ramah a kal ta daih a. Assyria rama hun engemaw chen a awm hnu chuan, Judai ramah a lo kir leh a. Judai rama an lo kir leh lai hian a nu chu kalkawngah a thi a, Deborah thlan bulah a phum a. Gath-hepher-a Serîdâ-ah khawsa in, Babylon ațanga saltangte an lo kir leh hnu kum 2-naah a thi a, Kainân pukah an phum ta a ni.

4. Zawlnei Jona Ațanga Kan Zir Tur
Pathianin sawi tura thu min pek reng reng chu ‘a tawi leh sei lam emaw, sawi thiam leh thiam loh lam emaw a ni lo.’ Pathianin min pek ang taka kan sawi chuan, ropui takin, thiltihtheihna neiin hna a thawk țhin a, Pathian a tiropui țhin. Jona khan“Thumal 5” chiah a hmang a, Ninevi khawpui an sim mai. Pathian thu-in min hrilh ang hian Sawi ila, Pathian thu-in min hrilh angin Nung ila, Pathian thu-in min hrilh angin i Ngaihtuah ang u.

Zawlnei Jona kha ‘Ram leh hnam hmangaih a, vei a, thih pawh huama țan tlattu’ a ni. Pathian pawhin a hnawlsak lo, mahse, tih tur hmasa zawk a pek kha a tih phawt a ngai mai chauh a ni. Lal Isua’n tehkhinna atana Jona a hmang hi, Jona’n ram leh hnam a veina (a zealous patriot) thu Pathianin a pawmpui zia entirna a ni (Matt.12:39-41, 16:4, Lk.11:29-32). Lalpa Zawnchhuah kan Zoram nuam-a cheng Zofate venghim tur te, țhendarh tum-tu leh tih-chhiat tumtu laka humhim leh dai theu-te hi Zofa Lalpa ringtute tih-mak-mawh, Pathian thu Zirtirna him leh dik a ni.

Kal la, thawk rawh, a la tawk lo,
Hlohna hi vân hlepna a ni;
Mihringin an fak lo che a,
Lalpan a fak loh che ring suh.

Popular Posts