Saturday, May 11, 2013

Jona Leh Ringlo Mite

Thuhmahruai
Ringtute hi kan mikhualna ram khawvela awm kan nih avangin, kan nundan, chetzia leh rilru put-hmang chu khawvel mite (ringlo mite) nen danglam turin Pathianin min ngai a, min beisei a ni (Rom 12:1-3). Kan thiltih ţhat te, kan awmdan mawi te, kan ţawngkam leh chezia duhawm tak-te an hmuh hunah ringlo mite rilru a hneh ang a, Pathian lam an lo hawi dawn a ni (Matt.5:13-16, Phil.1:27-29, 1Pet. 2:11-12).

Mahse, thil mak tak chu, a chang chuan ‘ringlo mite hi ringtute aia an ţhat zawk chang leh kawng dika min hruai zawk hun a tam’ tlat mai! Jona 1:1-17 kan chhiar chuan, hei hi a dik zia Pathian Zawlnei Jona chungah chiang takin a lang a ni! Jona hian Pathian nung chanchin chu ţawngkam leh chetziaa ringlo mite hnena hril tur a nih laiin, Ringlo mite zawk hian Pathian Zawlnei Jona hi an sawi-harh a, kawng dikah an hruai zawk tlat a nih chu!

Ringlo-mi Lawng Captain-in Pathian Zawlnei Jona a Hau!
Tarsis pan tur Lawng chhuak chu thui pawh a kal hma-in thlipuiin a nuai ta! Lawng a kehsawm vek leh tuipui-a an pil mai a hlauhawm tawh hle. Lawng mite hi an buaiin, an hlau êm êm a, an pathian ţheuh an ko a, Lawng Captain hian a pathian hnena ţawngţai lo Lawnga chuang zingah an awm em? tih thlengin a enfiah hial a. Chutia a enkualnaah chuan Jona, tui taka lo muhil chu a hmu a, mak a ti êm êm a, a hau hial a ni! Jona 1:5-a kan hmuh angin, thlipuiin Lawng a nuai na chhan hi Zawlnei thuawih lo Jona vang a ni a, Pathian tirh thlipui a tleh a ni. A chang chuan, Jona ang hian, ringtute hian ringlo mite hnenah (chungah) harsatna kan thlen ţhin. Lawng Captain ang hian, ringtute thiltih zahthlak tak avangin Ringlo mite mak tih kan hlawh a, ringlo mite khawih-harh kan ngai ţhin (1:5-6).



Hriat Tam Leh Hriat Dik Aiin Dik Taka Tih Hi A Pawimawh Zawk
Jona hi Pathian nung, Jehova betu a ni a. Pathian nung leh lei leh van leh mihringte Siamtu hi tunge a nih a hria-in, Pathian mizia te, Pathian rinawmna te, Pathian Hmangaihna leh Khawngaihna te, Pathian Zahngaihna leh Thïkthuchhiatna te, etc. a hrechiang a ni. Jona hian Pathian leh thlarau lam thil chu a hre rîl hle a, a hre-thûk êm êm ang tih a hriat. Hetihlai hian Lawng mite hian Pathian dik leh dik lo pawh an hre hrang lova, Pathian dik tak chu biak fuh loh an hlauh êm avangin an be kual nasa hle (Lawng mite hi Polytheists an ni a, Jona hi Monotheist a ni).

Mahse, Pathian nung dik tak hrechiang êm êm-tu hian “hre reng chungin Pathian duh loh zawng a ti-lui” tlat a. Pathian a hriatchianna leh a hriat dikna khan a nun-ah awmzia a nei lo. Ringlo mi, Lawng mite thung chuan “Pathian nung chu hrechiang lo mah se, hre dik lo mah se, an vawi 1 hriatnaah an ring nghal a ni!” (cf. 1:16). Chuvangin, Inthawi aiin Thuawih a pawimawh zawk tih leh Pathian Phut Chu Dik Taka Tih hi a ni tih kan hriat reng a ţul (1 Sam.15:22, Mika 6:7).

Jona’n A Ngaihthah, Ringlo Miten An Ngaihven!
Zawlnei naran lo tak Jona hian thlarau lam thil a ngaihthah (in-sensitive) a, a ngai pawimawh miah lo mai ni lovin, kawng ni lo lamah, Pathian aţanga hla takah a tlânbo ta a nih chu! Pathianin Jona a tirhna chu Ninevi a ni a, Israel chhak lam (east) mel 500-a hla-a awm a ni. Mahse, Jona kal tumna Tarsis hi Israel thlang lam (west) mel 2500-a hlaa awm a ni thung. Hetih lai hian, Lawng mite hi thlarau lam thilah an harh-chhuak nasa hle. Jona kha an ngaihven êm êm a, anmahni pawh an in vei thlawt. An ţawngţai a, an ţap a, an mangang a, an harsatna sutkian dan tur an ngaihtuah a, atawpah phei chuan Israel-te Pathian chu an bia (ţih) a, Inthawina an hlan a, pathian dangte be tawh lo tur leh an nun sualte an sim tawh tur thu Pathian hnenah an tiam hial a ni (1:5, 16).

Ringtu tam tak chuan thlarau lama mahni dinhmun pawh kan inhmuthiam ţhin lo. Pathianin min hmang tawh lova, kan thusawi a nung tawh lova, kan thlarau nun a tlahniam tawh hle tih pawh kan in-hrethiam lova, kan ngaihtuah lova, kan hmuthiam lova, a nachang pawh kan hre lova, kan hmu lo hrim hrim. Zawlnei Hosea sawi ang hian, ringtu tam tak chu ‘Chhang leh loh ang’ leh, ‘hmul ţuakin a bawm vek tawh, mahse mahni inhre silo!’ dinhmunah khan kan ding mek a ni (cf. Hos.7:8-9).

Jona’n Thlarau Bo A Vei Lova, Ringlo Miten An Vei!
Pathian Zawlnei chu Pathian rilru leh ngaihtuahna ţawmpui a, lungngai-te lungngaih-pui a, lawm-te lawmpui tura beisei a ni. Thlarau-bo te phei chu vei a, lainat êm êm tur a ni. Mahse, Pathian Zawlnei Jona hian, Ninevi khuaa thlarau-bo awm te, an ding leh vei pawh hre lo te chu vei a, lainat a hnekin, Pathianin a tih-chhiat vek leh a tih-hlum vek chu a duhthusam zu ni mauh mai a! (4:1-12). Lawng mite thung hi chuan, Pathian hnen aţanga tlânbo Zawlnei Jona tak ngial pawh, an lainat êm êm a. Lawng aţanga paih-chhuah a ţul pawh khan, an hreh êm êm a, Pathian hnenah ngaihdam an dil hial a nih kha! (1:12-14).

Ringtute hian thlarau bo lainatna kan nei lo tial tial tawh a. Ram hla tak takah, sum tam tak sengin changkang takin missionary kan tir a. Mahse, sum sen ngai lo leh, tirh ngai lovin, hnamdang leh ringlo mite kan bul maiah, kan kawt-kaiah, kan inchhunglumah Pathianin min rawn hruai thlen sak a, chungte tak ngial pawh chu kan vei thei tawh lo niin alang. Heng ringlo mite zawk hian Pathian an beisei a, an zawn tlat avangin nitinin Lalpa Beram huangah seng luh-in an awm mek a, kan thawh-loh-rah kan seng mek zawk niin a lang.
Tunah chuan, ‘ringlo mi, hnamdang (foreigner)’ kan tih, kan hmuhsit êm êm-te kan tluk tawh lova, min vei let ve tawh zawk a ni mai lo maw? Zorama sualna sân tawh zia-te ngaihtuah chang chuan, rilru a nâ ngawih ngawih a. Hetiang teh-nuai hi kan ringtu nun a nih chuan Rorelna ni-ah chuan Sodom leh Gomorra mite tak ngial pawhin sawi tur an rawn nei ve ngei ang le!? (Matt.10:15, 11:23-24, Lk.10:12).

Thuawih-lo Jona A Hrem, Ringlo Mite Thuawih Vangin Malsawmna
Zawlnei Jona hian Pathian laka a helna rah chu a seng a. Ţul lo takin hrehawm tak tuarin Nghapui kawchhungah ni 3 leh zan 3 lai a awm phah a! Jona ţawngţaina aţang hian nun reng a in beisei tawh lo tih alang a ni (2:1-10). Tin, Jona hian a sualna avanga ama mimal chunga harsatna a thlen mai bakah, pawisawi lo, awm mai mai, Lawng mite tan pawh harsatna a thlen tel bawk a ni. Lawng mite thung chuan, Pathian lak aţanga tlanbo, Zawlnei luhlul leh sual chu an khawngaih êm êm a, Lawng mite avang hian ‘Pathian Zawlnei Jona hi ‘a harh-chhuak a, a inhmu-chhuak thar leh a, malsawmna a dawn phah’ ti ila kan tisual awm lo ve (cf. 1:12, 16-17, 2:1-9).

Ngun takin in-ngaihtuah ila, ringtu tuemaw chet mawi loh leh nih tur ang a nih loh avangin, Biak In pan chak êm êm mi engzat tak hnawt-ţiau ang maw? Keimah avanga mi tuemaw-in Pathian a hnaih duh lohva, keimah avanga tu-emaw thlarau nun a chhia a nih vaih chuan kan dinhmun hi a ţha dawn hauh lo.  Lal Isua’n a sawi chiang khawp mai, “Heng mi ringtu mite te zinga pakhat pawh titlu apiang chu, an nghawngah buh rawt sawmna lung lianpui awrh-tirin, tuifinriat thuk lai-ah thlak daih sela an tan a ţha zawk” a ti hial a nih kha (Matt.18:6).

Ngaihtuah Zui Atan…
Pathian zawlnei Jona sualna leh helna thu-ah fel taka a thungrul ang khan, Pathian hian kan fel lohna leh kan sualna hi a en liam mai mai ngai lova, a hrem ngei ngei ţhin. Pathianin, “In sual chuan, in sualnain a hmu chhuak ngei ngei ang che” (your sin will surely find you out) a ti thlap a ni (Num.32:23). Kohhran-a ringtute hi han inbih chiang chiah ila, kan dinhmun hi a ţha tawh lo hle mai.

Kohhran tam takah, kan rawngbawlpui-te tak ngial pawh kan rem thei tawh lova, kan ngeih thei tawh lo. Mahni ţhatna tur, nawmsakna tur leh, mahni ropuina tur leh mawina tur leh lârna tur ringawt thupuiin, min lâr khalh tur nia kan hriat te chu kan hmelma en vek tawh a (1 Pet.5:8). Lungngaite lungngaih pui a, tuarte tuarpui te, chu kan nun aţangin a hla tial tial ta niin alang bawk.

Chhungkaw tam tak pawh en ila, nu leh pate sualna leh fellohna tu rah hi kan fate hian an seng mek a ni, tih hi kan ngaihtuah ngai em aw? Kan fate hi puh vek chi a ni lo. Pathian thu-in, “Hruihlingnei kungah grep rah an lo ngai em ni? Lenhlingah pawh theipui an lo ngai em ni? Thing ţha a rah chhe thei lova, thing chhia lah a rah ţha thei hek lo… miin a theh apiang chumi vek chu a seng bawk dawn si a. Mahni tisa lama thehtu chuan tisaa mi chhiatna a seng ang. Thlarau lama thehtu erawhchuan Thlarauva mi chatuana nunna a seng dawn a ni” (Jer.2:19, Matt.7:16-20, Gal.6:3-10) a tih kha i hre reng ang u!

Nu leh pa chauh ni lovin, Nula-tlangval nu leh pa la ni tur-te pawh kan nun i uluk ang u.

Popular Posts