Saturday, May 11, 2013

Thlarau Râlthuam {Spiritual Weapons}

Thuhmahruai
Miin Pathian a rin veleh hian, Pathianin Amah Ringtu chu Thil pawimawh tak chi 2 a pe a. Chu chu Ringtu chuan a Rochun (inherits) nghal a. Chungte chu, (1). Malsawmna (tisa leh thlarauvah), (2). Pathian hmêlma chu a hmêlma a ni ve nghal ta bawk. Pathian hmêlma hlun leh thiltithei ber chu Setana a ni a, ani hian Pathian leh a hnathawh apiang chu tih-chhiat (destroy) vek a tum a ni (John 8:44). Pathian fapa Isua Krista pawhin Diabola (Setana) leh a hnathawh zawng zawng chu tih-chhiat vek a tum ve ta thung bawk a ni (1 John 3:8).

Setana hi Pathian thilsiam zinga Vantirhkoh chungnungber ni ţhin a ni a, a hel avangin Pathianin a paih-thla a ni (Isaia 14:12-15). Setana hi mihrngte aiin thiltihtheihna nei sângin, chak zawk mahsela, amah Siamtu Pathian chakna leh thiltihtheihna nen chuan tehkhin tham a ni lo. Lal Isua ringtute chu Tho-leh Krista thiltihtheihna ropui tak neitu leh ţawmpuitu kan nih avangin, chu thiltihtheihna chuan min venghim tlat ţhin a ni (1 John 4:4).
Isua Krista Thiltihtheihna neitu leh ţawmpuitu kan nih avangin Pathian Râlthuam Famkim pek kan ni a (Eph.6:10-18). He râlthuam hmang hian Setana chu do a, thlêmna leh sualna-te chu hneh zel turin Pathian thu-in min fuih a ni. Heng Pathian Râlthuam Famkim 7 te hi i lo zir-ho teh ang u.

1. In Kâwng Chu Thutak-a Hrêngin (6:14)
Kâwng chin hnuai lam emaw, pum bawr vel (waist or abdomen) emaw hi Seat of Emotions a ni a, khawvel thil leh tisa châkna hmunpui a ni, an ti! Bible-ah kan hmu a,“an pathian chu an pum a ni a, an ropuina pawh an mualphona a ni, khawvel thil an duh ţhin” (Phil.3:19). Mihring hi a hlauh luat avang emaw, a châkna a so-sân luat vang emaw-in hre reng chungin thil a tisual ţhin a ni. Ringtute chu Thutak (Isua leh Bible)-a kan innghah tlat chuan hlauhna leh tisa châkna kan hneh zel thei dawn a ni (John 8:32, 36; Phil. 3:19).



2. Felna Âwmphaw Ha-in (6:14)
Âwm bawr hi nunna (soul) awmna hmun ni-a ngaih a ni a, ven uluk a ngai hle. Pathian hmaah leh Mihring hmaa Fel leh Dik hi kan ngai pawimawh tur a ni (Phil.1:27-28, 1Pet.2:12). Pathian nena kan inlaichinnaah leh Rawngbawlnaah Felna, Dikna leh Thianghlimna hi a pawimawh hle. Kan Thinlungah hian sual-in hmun a luah tlat chuan Pathian nen kan inkar a fel thei lova, rawngbawlnaah kan chak thei lova, kan chesual fo ţhin. Thinlung thianghlim leh Dik kan neih theih nan, Pathian hnena sual puan leh thupha-chawi hi i uar ang u (1 John 1:9).

3. Remna Chanchin Ţha Inbuatsaihna Ke-ah Bun (6:15)
Pheikhawk size dik lo emaw, bun hrehawm tak nen-a ke-a thui tak kal chu thil harsa tawp a ni. Ringtute hi ‘Pathian leh Mihring Inremna Chanchin Ţha’ hril tura tirh kan ni. He Chanchin ţha hriltu hian Pathian nen-a inremna a neih phawt loh chuan, midangte a rem thei lovang a, midangte tan malsawmna a ni thei lovang a, Lal Isua thupek ang takin hna a thawk thei bawk lovang (Matt.28:19-20). Pathian nen in inrem tawh em?

4. Rinna Âwmphaw (6:16)
“Rinna hi thil beiseite awm ngeia hriatna, thil hmuh loh te hriatfiahna a ni” (Heb.11:1). Ringtute hi hmuh theih loh Pathian ringtute kan ni. Hmuh theih loh lam thil – kan rilru, thlarau, rinhlelhna, hlauhna, inthiamlohna (guilt), ngaihtuahna sual leh bawlhlawh, lawmna, hlimna etc. te hi hmuh theih loh kan rin Pathian hian neih a, min thunun(control) vek a duh. Pathian kan rin ngam tlat chuan hmuh theih loh lam aţanga Setana beihna (thlêmna thal alh thei) zawng zawng lakah Pathianin a thiltihtheihna leh finna hmangin min chhanhim dawn a ni (Eph.3:16-21, 1Cor.10:13, Heb.11:6). Pathian leh a thiltihtheihna hi ringhlel lovin Rinna Âwmphaw ha rawh le!

5. Chhandamna Lukhum (6:17)
Mihring rilru leh taksa thununtu chu ‘thluak’ (brain) a ni. Lu hi thluak awmna (venghimtu) a nih avangin ven ûluk a ngai hle. Two-wheeler khalh ţhin leh Construction worker-ten “Lukhum” (helmet) pawimawh-zia kan hria. Hmuh theih loh Pathian ringtu leh thih hnu thlarau chhandamna chungchanga kan rinna leh innghahna ti-nghing a, rinhlelhna leh beidawnna min siam sak-tu sual hnathawh laka kan him theihna turin, Pathian fa kan nihna te, kan thlarau chhandam a nih tur te, nun-thianghlimna um zel tur kan nih-zia te chu Invenhimna Lukhum atana kan khum tlat a ngai a ni (John 1:12-13, Rom 15:16, 1 Cor.1:2, 2Thes.2:13, Gal.5:16, Phil.2:12-13, Col.1:10).

6. Thlarau Ngûnhnâm (6:17)
Paula hian a hunlaia khawvela râlthuam hlauhawm ber leh neih ţhat ber tehkhinnaa hmangin, ringtute chu râlthuam eng engemaw inbel a, inveng ringawt lovin, Setana hi bei-let ve tur kan nihzia min hrilh a ni. Kawnghren, Pheikhawk, Âwmphaw, Lukhum leh Ţawngţaina-te hi Defensive Weapons vek an ni a, Ngûnhnâm (Bible) chauh hi Offensive Weapon a ni. Ringtu chak leh hmantlak chuan Offensive an khel ţhin a, ringtu chak lo leh hman tlak lo chuan Defensive an khel thung ţhin! Pathian thu hi a nung a, thil a ti thei a ni (Heb.4:12, 2 Tim. 3:16-17). Lal Isua khan Setana a hnehna hmanrua chu Pathian thu a ni (Matt.4:1-10). Sual hneh nan Thlarau Ngûnhnâm Pathian thu hi i hmang uar ang u.

7. Eng Hunah Pawh Thlarauva Ţawngţai (6:18)
Tirhkoh Paula hian Ţawngţai satliah a sawi lova. Ţawngţaina chi 4 inkawp-“Ţawngţaina, Dilna tinreng, Eng Hunah pawh, Thlarauva Ţawngţai” chungchang a sawi a ni. Hei hian awmzia thûk tak a nei a. Pathian nena inzawm tlat Ţawngţaina pawimawh zia min hrilh a ni. Setana nena kan Indonaah hian harsatna te, thlêmna te, beidawnna te, lungngaihna leh manganna te hian min hual vel ţhin mahsela, Pathian nen-a thinlung chhungrîl aţanga thlarauva kan inzawmna hi chhawm-nung reng a, mahni tan leh midangte tana thlarauva ţawngţaina hi kan hlan reng a ţul a. Hei hi kan chakna bul, Setana kan hneh zel theihna tur leh Pathian nen-a kan inzawmna ti-nghettu a ni bawk a ni (Jak.5:16). Ţawngţaina i hmang ţha em?

Have a Wonderful, Worry-free and Blessed Sunday  

Popular Posts