Friday, December 27, 2013

The 3 Most Dangerous Weapons Of Satan

Thuhmahruai
Kan Hmêlma-pa Setana hian Ringtute min Thlêmna leh min Hnehna Hmanrua tam tak a nei a. Chung zingah chuan a Hlauhawm zual 3 a awm a. He Thlêmna-te hi Kristian zingah Pitar-putar, Nula-tlangval leh Rawngbawltu tê ber aţanga Hotu-ber thlenga kan tawh ţhin zinga Hneh hâr tak an ni. Tirhkoh Paulan, “Chuvangin, dinga inring chu fimkhur rawhse, chutilochuan a tlu dah ang e,” (1Kor.10:12) a lo ti hial a. He Setana Thlêmna Thang Hlauhawm Ber 3-ah hian tlu lo turin inringin, i fimkhur ang u.

1. Wealth (Ro-Sum)
Sum leh pai, hausakna duh leh ît avangin mi tam tak an tlû a. Pathian Rawngbawltu fel tak tak pawh hman tlak lohvah an chhuak ţhin. Sum hmang hian Setana’n Pathian Rawngbawltu tam tak a lei tawh a, a lei mek zel a ni. ‘Sum tel lovin rawng kan bawl thei lova, kan nung thei lo’ tih hi thudik a ni. Mahse, Sum hi kan ngaih pawimawh ber a ni tur a ni lova, Sum hian kan thlarau nun leh rawngbawlna a hma-khalh-in, a tichhe tur a ni lo (1Tim.6:10).

2. Power (Nihna/Lâr Duhna)
Miin Nihna (position) emaw, Lâr (popularity) emaw an duh tawh chuan eng thil tih mah an hreh lo. Miţha leh mifelte  tih-chhiat te, dik lo taka midang dawta puh (false accusations) te, Pawisa hmanga tute emaw rawih a, Mi chunga kut-thlâk te, Mi Zalenna lei te, Setana biak hial te  thlengin an ti duh mai ţhin. He thil hi khawvel mite zingah chauh a thleng lova, Pathian rawngbawltute zingah pawh a thleng mêk a ni. Setana ngei pawh kha Nihna a duh avangin Van aţanga paithlâk a ni (Isaia 14:12-17).

3. Women (Pleasure/Sex)
Achunga tarlan bakah khian, Setan hian Tisa nawmchenna leh Mipat-hmeichhiatna (pleasure & sex) hmangin Kristian Ţhalai tam tak a suat mek a. Nu leh pate pawh an bang lo. Pastor, Evangelist, Missionary leh Rawngbawltu ropui tak tak-te pawh he Hmanraw chimawm tak hmang hian a hneh fo ţhin. India rama Missionary Society lian leh hlun taka an Hruaitu Mipat-hmeichhiatnaa a tlûk-chhiatna thu-te khan lung a ti chhe ngawih ngawih a nih kha. He Setana Thang  hlauhawm leh chimawm taka mi a âwh tawh chuan, an tâlchhuak mai mai tawh lo. He Hmeichhiat-mipatna Sual hi Pathian Huat ber-te zinga mi a nih avangin a Hrêmna pawh a nâ hle a nih kha (1Kor.10:1-33). Fimkhur hle ang che.

Ngaihtuah Zui Atan…
Achunga kan sawi tâk “Setana Thlêmna Thang Hlauhawm Ber 3” te aţanga Filhlim lo Rawngbawltu i nih chuan, Pathianin a Hmang tak tak thei lovang che. Hei hi a Chhan ber chu Pathianin Ama Ta (Rawngbawltu dik tak) chu a hre kiau a, Ama ta ni lo, Sual kalsan lo, Setana Thanga la âwk reng mihring chu a Hmang Thei Lo a ni (2Tim.2:19, 26).

Paula hian a sawi chiang viau bawk, “Mi ţhenkhat sual chu a langsâr a, an tuar nghal bawk ţhin, ţhenkhat erawh chu a lang lawk lem lo va. Chutiang bawkin thil ţha tih lang nghal a awm a, lang nghal rih lo mah se thup hlen theih a ni lo” tiin (1Tim.5:24-25).

He Thu hi hre lova, tum reng vang emaw, duh reng vang emaw ni lova i lo tlu palh a nih chuan, Pathian hnenah Sim-in, ti-nawn leh tawh miah lo turin kir thuai ang che. TUM RENG VANG LEH DUH RENG VANG A, HRE RENG CHUNGA I TISUAL LUI FO (intentionally, willingly & knowingly committed habitually) A NIH NGAT CHUAN, I NGAIHTUAHAWM HLE TIHNA A NI. Nangmah chauh i Chhe dawn lova, Midangte pawh i Ti-chhe tel dawn tih i hre reng dawn nia (1Kor.10:1-33, 2Kor.4:2, 6:3, 1John.3:1-24). 

Popular Posts