Wednesday, November 5, 2014

Lal Isua Dik Lo Taka Thiamloh Chantir A Ni

1. Thuhmahruai
Bible Scholar-ten an chhût dânin, Lal Isua chungthu ngaihtuah a nih chhung hi darkâr 8 aiin a tam thei lo niin an ngai a. Juda rorel pawl Sanhedrin-in misual (thihna khawpa sual ti) an man chungthu chu ni 2 chhung tal ţawngţaina nen an ngaihtuah tur a nih laiin, Lal Isua chungthu erawhchu ni 1 pawh tling lovah rorelna an zo fel vek a, an tihlum hman der tawh thung a ni.

Tin, Lal Isua thiamloh an chantir theihna tura ro an relsak dân zawng zawng te kha Juda dân leh Sanhedrin dân dinglai kalh vek a ni bawk. Tin, Puithiam Lalber hnena hruai a nih hmâ-in, Ana (Puithiam Lalber hlui) hnenah hruai hmasak phawt a ni a (John 18:12-24), hei hian awmzia a nei hle. Puithiam Lalber nilai mêk Kaiapha aia ngaih pawimawh zawk an nei tih a chiang bawk. Mahse, hei pawh hian an rorelna fair lohzia a târlang tel leh bawk a ni.

Lal Isua khân rorelna chi 2– Judate (sakhaw lam) leh Rom (Sorkar/khawvel lam) rorelna a hmachhawn ve ve a. Thil mak tak chu, Khawvel Court (Rom Sorkar/Pilata) chuan Lal Isua kha a sualna a hmuh loh avangin thiam a chantir a, Sakhaw Court (Juda Puithiamte/Sanhedrin) chuan a sualna an hmu lo chungin thiam loh an chantir ta thung a ni!!! Sanhedrin-te hian mi tihhlum theihna dân an neih si loh avangin (John 18:31) Rom Sorkar remtihna leh pawmpuina hmangin Lal Isua chu tihhlum turin an buatsaih ta a. Rom Sorkar tân chuan Juda mi, anmahni ngeiin tihhlum an remtih chu thil lawmawm tawpkhawk a ni mai a, a chhan chu Juda mihring an tlêm poh leh Rom Sorkar tân chuan thunun an awl ting mai dawn a ni.

Tichuan, Juda sakhaw dân phuahchawp leh Rom sorkar dân ţangrual leh Mob-rule hmangin, a sualna hmu si lovin, “Circumstantial Evidence” ringawt hmangin Lal Isua, Mifel, Sualna nei lo kha thiamloh an chantir a, Kross-ah an khengbet a, an tihlum ta a ni!!!


2. Puithiam Ana Leh Puithiam Kaiapha
Judate dânah chuan, Puithiam Lalber chu Judate duhthlan ngei thlantlin a nih avangin damchhung hna tur a ni. Puithiam Lalber Ana hi Judate duhthlan ngei a nih avanga, Puithiam Lalber atâna Syria Governor Quirinius-an A.D.6-a a ruat a ni a. Amaherawhchu, he dân hi Rom hoten ţha an ti lova, an duh zawng leh an thunun theih turte ruat theihna remchang a nih avangin, anmahni Rom hote duhdân angin Valerius Gratus-an (Judai ram awptu) A.D.15 khân, Ana aiah, a fapa Eleazar chu thlâkin, A.D.16 khan ELeazar chuan Puithiam Lalber hna a chelh a. Hemi hnu hian, Valerius Gratus vek hian, Eleazar aiah Kaiapha (Joseph tia koh bawk), Ana mâkpa (Ana fanu-a pasal) chu A.D.18 khân Puithiam Lalberah a ruat leh ta a ni.

Kaiapha hian A.D.18-36 thleng Puithiam Lalber hna a chelh nghe nghe. Kan sawi tâk ang khian, Lal Isua hunlai hian Kaiapha hi Puithiam Lalber a ni na a, Judate dânah leh vantlâng ngaihdânah chuan, Puithiam Lalber hmasa zawk Ana kha a la dam avangin, thunei zawkah an la ngai reng a ni. Rom miten midang ruat ţhin mahse, Judate rorelna sâng (Supreme Court)-ah chuan Puithiam Lalber hmasa Ana hian thuneihna a la nei lian zawk a ni. Chuvangin, Lal Isua an man veleh khan, Puithiam Lalber–hlui Ana hnenah an hruai hmasa ber a, a ngaihdân leh a thutlûkna chuan Sanhedrin rorel pawlte thinlung leh rorelnaah awmzia a nei ta ngei reng a nih kha.

3. Juda Court– Fel Taka Rorelna Hmun
Tichuan, Sanhedrin member 70 leh Puithiam Lalber hovin Lal Isua chungthu an ngaihtuah ta a. Sanhedrin tih hi Greek ţawng Sunedrionţhukhawm” tih aţanga lâk a ni a. Thingtlâng rorel pawl Sanhedrin chuan Puithiam Lalber tiamin member 23 an nei thei a. Khawpui lian, Jerusalem erawhchuan, Puithiam Lalber tiamin member 71 a nei thei thung. A châng chuan, Thingtlâng Sanhedrin chu “Rorelna Sâng” tih a ni a (Mt.5:22, etc.), Jerusalem Sanhedrin erawhchu “Vantlâng Upa Rorelna” (Lk.22:66, etc.) tih a ni bawk.

Sanhedrin member-te hi Pharaisai, mipuitling leh finga ngaih, rawngbawlnaa inserh hrang leh rawngbawlna sâng zawk thawk zel tura inpe-te an ni deuh ber a. Amaherawhchu, Lal Isua hun hma daih tawhah khân, Sanhedrin member ruat chungchângah hian chi leh kuang, leh Politics lama induhsakna a lian hle a. A bîk takin, Heroda thlahte (Heroda Ropuia) khân Sanhedrin rorelna an thunun hneh hle ţhin. Rom roreltute erawhchuan, Puithiam Lalber ruat leh bân chungchângah chauh an inrawlh ve thung.

Thiamlohchang-te ro an relsakna-ah an rorel a felzia leh duhsak bik an neih lohzia teh nân Mosia dân leh Deut.16:18-20 ţanchhan-in ngaihdân leh thutlûkna an siam tur a ni. Thil tisuala an puh (accused) rêng rêng chu, mipui rorel sak (an ngen chuan) an phal tur a ni a, ţanpuitu leh sawipuitu an neih an phalsak ngei ngei bawk tur a ni. Thutlûkna chu thuhretu rinawm leh rintlak 2 tal an awm loh chuan siam loh tur a ni. Mipui-ten chiang taka an endik an phalsak tur a ni a, ţanpuitu leh thuhretu a rawn hruai (enganga awihawm lo pawh nise) an phalsak ngei ngei tur a ni bawk.

Thuhretu dik lo-te chu hriatchhuah an nih chuan (Phuba lâk nân emaw thamna avang emaw pawh nise), Mosia dân angin, thiltisuala an puh hrêmna chan tur zawng zawng chu a tuar ve ngei ngei tur a ni (Deut. 19:16-19). Thihna hmanga hrêmna chungchanga thuhretu-dêra ţang chu amah ngei pawh (thiam loh an chantir leh thah tak chauh nilovin) tihhlum ve tur a ni. Hei hi dikna leh rorelna dik lanchhuahna tur atâna tih a ni. Thihna hmanga hrêmna chungchângah hian Thuhretu khân tihhlum hna (lunga den etc.) a ţan hmasa ber tur a ni (Deut.17:7). Hei chiah hi, Uirenu an man lai pawh khan, Lal Isua’n ţanchhanah a rawn hmang a nih kha, “In zinga sualna nei lo apiangin amah chu lungin deng hmasa rawhse” (John 8:7).

Rabbi-te dân ding lai (Rabbinic Law)-ah chuan, thihna khawp sual, tihhlum ngai khawpa sualna khawih chu Ni 3 a ral hmâ chuan kutthlâk loh tur a ni. Tin, Ni 3 chhung hian Sanhedrin member-te hi ţawngţai leh chawnghei-in hun an hmang tur a ni. Kût lai (chawnghei loh hun) a nih chuan, rorelna (misual chungthu rel) kha a hun an sawn hla mai tur a ni. Chawnghei leh ţawngţaina hun an hman theih loh avangin chawlh rih tur a ni. Tin, misual thiamloh an chantir khân ţanpuitu (sawisaktu) a hmuh hmâ loh chuan nghah rih tur a nih avangin hun a khawhral hnem ţhin hle bawk.

4. Suala Puh-te Rorelsak Dân Tur
Prof. Dr. Simon Greenleaf, Harvard University-a Law Professor lâr tak chuan, Judate Dân kaltlanga Misual (thihna khawpa thil sual ti-a an puh, etc.) chungthu an relsak dân awmze nei tak chu, a hnuaia târlan ang hian a sawifiah a. Thiltisuala an puh (accused) chu Felfai thei ang bera rorelsak a nih theih nân Judate hian Dân felfai leh ţha tak mai an lo neih thu hetiang hian a chhui a ni:-

4.1. A chungthu an ngaihtuah ni hmasa berah chuan, Sanhedrin member (Court Officer)-in Thiltisuala an puhna chhan leh vang zawng zawng chu mipui hriatah a chhiar chhuak tur a ni.

4.2. Thuhretu rêng rêngin, hemi hunah hian, a thu hriat leh ţanchhan chu a dik zia leh amahin a tak ngeia a tawn (hmuh leh hriat) a nihzia chhechhâmin a intiam tur a ni. Mi sawi hriat chu pawm loh tur a ni a, Sanhedrin Rorelna leh member-ten an pawm tur a ni lo.

4.3. Thuhretu hian chu thil thlen Ni, Darkâr, Thla leh Hmun te chiang takin a sawi thei vek bawk tur a ni.

4.4. Sanhedrin member-te rêng rêngin thil tisuala an puh chu a dik lohna an sawi a thiang lova, Sanhedrin member zinga miin Thiltisuala puh chu an hêk a thiang lova, an hêk tur a ni lo. Pawnlam aţanga hêkna leh puhna chiah an ngaihtuah a thiang.

4.5. Thuhretu atân hian naupang emaw, chhiahhlawh (sal) emaw, rilru lama chiangkuang lo-te emaw, mi nungchang chhe tak-te emaw, hman phal a ni lo. Tin, Thiltisuala an puh chu thi tura a chungthu rel lo ni ta se, a hrêmna– lunga den hlum turah, thuhretu chu deng hmasaber (kutthlâk hmasaber) tur a nih avangin, hmeichhia chu phal loh a ni bawk.

4.6. Thutlûkna siam pawh thil namai a ni lo. Thingtlâng Sanhedrin member 23 awmna-ah chuan, Thiamchantir theihna vote chu 11 a ni a. Thiam a chang a nih chuan chhuah nghal vat tur a ni. Amaherawhchu, Thiamloh chantirna vote chu 13 a ngai thung!!! Thiamloh a chang ngei a ni tih fiah a nih veleh, hrêmna chu hlen nghal mai tur a ni lo bawk. Thiltisuala puh chu, Thiam loh an chantir a nih chuan, Hrêmna chu pek nghal mai tur a ni lova, Thiamloh a chan aţanga chhiar-in ni 2 chhung tal an nghâk rih tur a ni.

Hemi chhung hian Sanhedrin member-ten ţawngţai leh chawngheiin hun an hmang ang a, mitâng (thiamlohchang) tân an ţawngţai sak tur a ni. A ni 3 ni-ah chuan Sanhedrin-te chu an Ţhukhawm leh ang a, an zinga pakhat talin a rilru a thlâk leh thlâk loh an inzawt chhuak leh dap ang a, an zinga pakhat chauh pawhin a rilru a thlâk a, chhuah zalen (thiamchantir) duhna neia vote a pek chuan thiam chantir nghal theih a ni thung.

4.7. Ngaihdân thlâk an awm lohva, thiamloh chantirna vote 13 chu a pangngai a nih chuan, Sanhedrin member (Court Officer) pakhatin Flag kengin Temple-ah a lo nghâk ang a, member dangin, Sakawr chunga chuangin an tihhlumna tur hmun lamah a hruai tur a ni. An hmaah Thupuangtu kalin, ring takin a khât tawkin, “He pa (a hming sawiin) hi thil sual (chumi khami chu) a tih avangin hrêm tura hruai mêk a ni a. Thuhretute chu chumi khami-te an ni. Tupawhin, a chhuah theihna tur emaw, thiam a chan theihna tur emaw, hria in awm chuan lo chhuak thuai rawh u,” tiin a au zel tur a ni.

A muangchang thei ang bera kawng zawhna hi neih tur a ni bawk. Thiam a chan theihna tur hria-te an lo awm chuan, emaw, amah mitâng khan, thil pawimawh (thiamchan theihna tur) hriatchhuah a neih hlauh chuan, Court Officer Mitâng hruaitu khân midangte hriattirin, rorelna neih ţhatpui leh turin a kirpui leh rih tur a ni.

Mitâng chu ţanpuitu a neih loh chuan, an tihhlum hma-in a sualte an puantir zet ang a, a taksa chu nâ hre lo turin, nâ chhawk nân zu thûr te an pe ang a (cf. Mt.27:48), chumi hnu-ah kut an thlâk chauh tur a ni.

4.8. Sanhedrin din chhan leh thiltum pawimawh tak chu “Tihlum tur ni lovin, mihring nunna humhim tur zawka din a ni” tih hi an Thupui leh Dinchhan a ni. Chuvangin, Puithiam Lalber chuan rorelna an neih rêng rêngin nunna hlutzia leh dikna chauh ţan tur a nihzia fuihna chu a khât tawkin rorel member-te hnenah Rorelna an neih chhung zawng hian hriattirna a nei reng tur a ni.

4.9. Sanhedrin dânah chuan, Mitâng suala puh (accused) chu zânah a chungthu an ngaihtuah thiang lova, phal loh tawp a ni. Khaw-ên lai ngeia a chungthu chu ngaihtuah tur a ni a, khawthim thlenga chhunzawm pawh phal a ni lo leh zel bawk.

4.10. Suala puh (accused) chu, Thiam loh changin, tihhlum pawh lo ni ta sela, an tihhlum taka thil neih (properties & assets, etc.) zawng zawng chu ram (sorkar) sum atân etc., thuneitute thuneihna hmanga chhuh-luih phal a ni lova, a rokhawmtu tur diktak hnenah kim biaiin an hlân zawk tur a ni.

4.11. Thiam loh chantir tura vote an peknaah hian, Sanhedrin member zawng zawngten inthuruala thiamloh an chantir vek chuan, Mitâng kha Thiamchantir a, chhuah hlauh thung tur a ni!! Khawngaihna tel lo leh nunna hlutzia ngaihtuah lova rorelna a nih dawn avangin, Pathian duhdân ni theiin an ring lova, chhuah hlauh thung tur a ni!  Heng zawng zawngte hi a chhan bulpui ber chu, Juda rorelna court hi a fair tawk a ni, tih târlanna mai bâkah Mosia dân leh Pathian duhdân-a khawngaihnaa ro inrelsakna court (hmun) a nihzia  târlanna tura tih a ni.

5. Lal Isua Dik Lo Taka Ro An Relsak Dân
Kan sawi tâk ang khian, khiti khawp khian rorelna chu fel leh dik tura duan a nih laiin Lal Isua chungthu an relsak dânah erawhchuan khawngaihna tel lova rorelsakna a nih bâkah, Sanhedrin memberten anmahni Juda dân dinglai leh Mosia dân zawng zawng an kalh fai vek a ni! Hetiang hian lo chhui zau leh hlek ila:-

5.1. Hêktu leh puhtu awm hmasa lo chuan mi a chungthu ngaihtuah theih a nih loh laiin, Lal Isua chuan hêktu leh puhtu a nei hauh lova, an man hnu-in hêktu tur an in zawng chawp a, an hmuh theih lawk loh thu thlengin Bible-ah chiang taka record a ni (Mt.26:59-61).

5.2. Thiltisuala an puh chu zânah a chungthu rel dânin a phal sak loh laiin, an man zân lala-in Lal Isua chungthu (an man hnu reilote-ah) chu an ngaihtuah nghal chûk chûk a nih kha (Mt.26:57-75, Lk.22:53-55), hei hi Judate dân dinglai kalh tlat a ni.

5.3. Lal Isua hi mipuiten a chungthu an ngaihtuah an phalsak tur a nih laiin, Sanhedrin memberten “A thi ngei tur a ni” tih thutlûkna an lo nei sa tawh a, hemi hmang hian mipui an thunun (hneh) ta zawk a ni (John 11:49-51, Mk.14:1-2). An man hmâ hauh pawhin he thutlûkna hi an lo siam lawk tawh a ni.

5.4. Mosia dân leh Sanhedrin dân dinglaiah chuan, Sanhedrin member-ten thiamloh chantirna vote an pek vek chuan, mitâng chu chhuah (zalen tir) hlauh thung tur a nih laiin, Lal Isua chungthu-ah chuan Sanhedrin member-te an inthurual vek a, Mahse, Lal Isua kha zalenna pek (chhuah) a ni lo leh bawk.

5.5. Mitâng (thiltisuala puh) rêng rêng chu a chungthu an ngaihtuah dawnin, Sawipuitu emaw ţanpuitu (advocate) emaw, a nei ngei ngei tur a ni a, ama tân thil harsa a nih chuan Sanhedrin member-ten an zawnsak tur a ni. Lal Isua chungthu an relnaah hian ţanpuitu emaw sawipuitu emaw zawnsak a ni lova, amah Lal Isua leh a thusawi an lâk-kawisak chu thutlûkna siam nân an hmang nghal bawk a ni (Lk.22:66-71).

5.6. Lal Isua thiamloh an chantirna tur atân hian thamna pe-in Thuhretu-dêr an ruai bawk (Mt.26:59-60), thuhretu diktak an nih leh nih loh fiahna pawh pakhat mah an nei lo bawk. Hei hi Mosia dân leh Sanhedrin dân dinglai kalh tlat a ni.

5.7. Sanhedrin member-te rêng rêngin Thiltisuala an puh chu a dik lohna an sawi a thiang lova, Sanhedrin member zinga miin Thiltisuala puh chu an hêk tur a ni lova, Pawnlam aţanga hêkna leh puhna chiah an ngaihtuah theih laiin, Lal Isua erawhchu Puithiam Lalber leh Sanhedrin member-te ngeiin nasa takin an hêk chiam zawk a ni (Lk.23:10).

5.8. Thihna khawp sualna ti nia hriat leh thi tura a chungthu an relthlûk chu a ni 3 ni-ah chauh thi tura hruai chhuah (kutthlâk) a thiang a. Chutiang chu Judate dân a nih laiin, Lal Isua chungthu hi an ngaihtuah rei lo hle a, an man ni la la-in (darkar 8 aiin a tam thei lo) thutlûkna an siam a, an tihlum nghal daih si a ni!!! Sanhedrin member-te fair loh dân hi a û-chûakin a râpthlak tak meuh meuh a ni!!!

5.9. Mitâng chu thiamloh chantir a nih a, thi tura a chungthu an rel ni aţangin Sanhedrin member-ten chaw nghei an ţan nghal tur a ni a, ţawngţaina nen ni 3 chhung an inserh hrang tur a ni. He Thlarau lam rawngbawlnaah hian Sanhedrin member, Lal Isua chungthu ngaihtuahtute hi an hlawhchham chiang hle. He rawngbawlna hi Kohhran Court leh Khawvel Court a danglamna leh a thlarau lai ber, an tih ngei ngei tur a nih laiin, Puithiam Lalber aţanga Sanhedrin member zawng zawngten an ti duh ta miah lo bawk a ni!!!

5.10. Mitâng chungthu chu tihfel a nih hma ni 3 zet ala awlna chhan leh kawng zawhnaa muangchânga kal te, ţanpuitu an awm chuan kirpui leh tura an inbuatsaihna zawng zawngte hian Pathian Khawngaihna leh Zahngaihna hnuaia rorelna fel tawk leh ţha tawk hmanga Mitâng (Suala puh) kha rorelsak a nihzia târlan a tum ber a ni. Bible-a kan hmuh angin hetiang hun hi Lal Isua tân hawnsak leh buatsaih sak a ni lo hrim hrim a nih kha!

5.11. Mitâng chu ţanpuitu leh sawipuitu nei lova a awm a nih chuan, Puithiam Lalber talin a ţan tur a ni. Amaherawhchu, Lal Isua kha Sanhedrin member-ten an ţan loh vek bâkah, Puithiam Lalber (amah ţantu tura ngaih) zawkin Lal Isua dik lohna leh ţawng sual chângin a dâwp zawk hlauh thung bawk a ni (Mt.26:59-68, Lk.22:66-71, 23:10).

5.12. Thihna khawp sual ti nia an hriat (case) rêng rêng chu, Sanhedrin member-ten Temple-ah hruaiin khaw-ên laiin a chungthu an ngaihtuah tur a nih laiin, Lal Isua chungthu erawhchu an man zan la la-in Puithiam Lalber In-ah an rel fel nghal vek a, Temple-ah chuan hruai pawh an hruai chhin ta rêng rêng lova, Temple-a hruai ahnêkin Ringlo-mi Rom Sorkar roreltu Pilata leh Heroda hnenah an tihhlum theihna turin nasa takin an nawr hlauh thung a nih kha (Mt.26:57-27:1-26, Lk.22:54, etc.).

5.13. Mosia dân leh Sanhedrin dân dinglai Lal Isua chunga an tih awmchhun chu… “Thi tura a chungthu an rel chu, Kros-a an khenbeh a, an tihhlum dawnah nâ tuar lutuka a awm loh nân, Sanhedrin member zinga pakhatin nâ chhawk nân Zu-thûr a pe tur a nitih a ni a, Lal Isua kha he Zu-thûr hi pek a ni a. A petu erawh chu Rom sipai a ni daih thung! Judate dânah chuan, Sanhedrin member zinga pakhatin he Zu-thûr hi a pe tur a ni thung! (Mt.27:48).

6. Thu Tlângkawmna
A chunga kan târlan takte ang khian, Sanhedrin member-te khian Pathian Khawngaihna leh Zahngaihna kaltlanga rorelna dik leh fel hmanga Lal Isua rorelsak an tum lo tih a lang chiang tawk hle. An thinlungah a thi ngei tur a ni tih chu a len êm avangin, anmahni Sanhedrin dân, Mosia dân leh Pathian  thu te meuh kalh vekin, anmahni duhdân leh  ngaihdânin Lei leh Van Lal Isua Krista chu ro an relsak a, thiamloh an chantir ta a ni!

Tichuan, Lal Isua hian rorelna chi 2– Judate (sakhaw lam) leh Rom (Sorkar/khawvel lam) rorelna a hmachhawn ve ve a. Thil mak tak chu, Khawvel Court (Rom Sorkar/Pilata) chuan Lal Isua kha a sualna a hmu lova, Circumstantial Evidence chauh a nih avangin thiam a chantir a, Sakhaw Court (Juda Puithiamte/Sanhedrin) chuan a sualna an hmu lo chung chungin thiam loh an chantir ta tho a ni!!! Sanhedrin-te hian mi tihhlum theihna dân an neih si loh avangin (John 18:31) Rom Sorkar remtihna leh pawmpuina hmangin Lal Isua chu tihhlum turin an buatsaih ta a. Rom Sorkar tân chuan Juda mi, anmahni Juda-te ngeiin tihhlum an remtih chu thil lawmawm tawpkhawk a ni mai a, a chhan chu Juda mihring an tlêm poh leh Rom Sorkar tan chuan thunun an awl ting mai dawn a ni.

Tin, Rom Sorkar hian Sanhedrin hnenah hian mi tihhlum theihna kawngkhat a hawnsak a, chu chu Temple hmun ţhenkhat, Gentile mite kal phal lohna hmuna Gentile mi a kal chuan engkhaw sawi set set lova tihhlum theihna Rom Sorkarin a pe a ni. Anmahni Juda sakhaw dân hmanga inhrêmna leh intihhlumna– lunga denhlum (Stephen-a, Tirh. 6:11-15, 7:54-60) te pawh hi Rom Sorkar chuan phalna a pe lova. Amaherawhchu, Juda-mi thi chu Rom mite tân chuan thil lawmawm tak a nih zawk avangin an inrawlhbuai duh lem lo mai a ni.

Lal Isua case-ah erawhchuan, lunga denhlum ngai chi sualna a nih loh avangin, anmahni Juda sakhaw dân hmang chuan an tihlum thei dawn lova. Chuvangin, Rom Sorkar phalna leh remtihna-in (Pilatan ‘a sualna ka hmu lo ve’ a ti lawm lawm chung khân) Juda sakhaw dân phuahchawp leh Rom sorkar dân ţangrual leh Mob-rule hmangin, a sualna hmu si lovin, Circumstantial Evidence hmangin Lal Isua, Mifel, Sualna nei lo kha thiam loh an chantir a, Kross-ah an khengbet a, an tihlum ta a ni!

Fakna Hla siamtu chuan hetiang hian Lal Isua chungchâng a lo sawi a,

Kalvari tlângah a lo tuar a,
Mi sualte kâra a awm khân;
Sawisatu thate a tichak a,
Amah thing lêra khenbeh nân;
Mi sualte leibâ a pêk laia,
A Pa thupêk a tihmawi khân;
Pathian felna a lo êng mawi a,
Khawngaih remnaah ka lo thiam.

(((Excerpted from Apostolte Thurin (Evangelical Theology of Apostles’ Creed) by the same Author, pp.80-89)))

0 comments :

Popular Posts