Saturday, February 28, 2015

UI HNENAH THIL THIANGHLIM PE SUH!!!

0 comments
1. UI A TIH HI TUNGE?
Ui chungchâng hi “Nawhchi zawrh man leh Uicho man rawn la suh u” tih Post-ah khân ka sawi nual tawh a. Hetah chuan a tlângpui chauh sawi ta ila. Bible-in Mihring, ramsa leh thil hming a sawi-lan te leh, an chanchin (story) kan hmuh-te rêng rêng hian awmzia leh sawi-tum 2 a nei thei a- A NGIAL-A-NGAN (literal sense) leh TEKHINNA/ENTIRNA (allegory/figurative) te an ni. A pahnih-a inkawp (both literal & allegory) sawi-tum nei a awm tho laiin, a tlângpuiin pakhat zawk zawk hi Bible-in min hrilh a tum a ni tlângpui ţhin (Isaia 1:21, 57:3, Ex.11:7, 22:31, Ex.16:31-33, Deut.23:18, Hos.2:4-5, Amosa 7:17, 1Lal.14:11, 21:19, 23, 1Kor.6:15-16, Thup.17:1-16, 19:2, etc.).

Tehkhinna atân chuan, “Ui” (dog) hi Mipa inzuar (Male prostitute), Pathian awm ring lo (Atheist), Zirtirna Dik lo thehdarhtu (False teacher) leh Ringlo-mi leh Pathian ngaihsak lo (Unbelievers) sawi nân bâkah, Hmuhsitawm, Hnuaihnung, Engmah ni lo, Tlawm, Inngaitlawm leh Inphahhnuai entirna leh sawi nân pawh “Ui, Uicho, Ui-thisawn,” tih te chu Bible-ah hian hman a ni bawk (cf. Deut.23:18, Sam 22:16, 20, Isaia 56:10, 1Sam.17:43, 2Sam.3:8, 16:9, Mat.7:6, Phil.3:2, Thup.22:15, etc.). Lal Isua hian, Pharisai-ten an dinhmun leh rawngbawlna ropui tak Pathian duh dân-a hmang lova, midangte tihchhiatna turin (amah Lal Isua ngei pawh an tihhlum phah) an hmang zawk tih a hria a, a vei viau a, he Tehkhinna hi a sawi niin a lang.

Wednesday, February 25, 2015

JERUSALEM TEMPLE 3-TE SAK DÂN CHANCHIN

0 comments
1. THUHMAHRUAI
Abrahama’n a fapa Isaaka a hlânna Moria Tlâng-ah ngei khân, Lal Davida’n Pathian hnen aţanga sak dân tur a dawn hmangin Lal Solomona khân Jerusalem Temple kha a sa a (1Chro.28:1-21). Pathianin Amah an Biakna tur atâna Temple an sak tur hi a Satu tur leh a Sak dân tur hrim hrim-ah a ulûk êm êm a. Sum neih leh hausak vang emaw, tha leh thiamna an neih vang emaw-in an sak a phal ngawt lova.

Rilru leh Thiltih-a Thianghlim leh Fel ngeiin Temple hi an sak a phut tlat a. Israel Lal ropui Lal Davida pawh khân, sum leh pai leh theihna (wealth & power) kha nei teh meuh mahse, Pathianin Temple a sak kha a phal tlat lova, “Nang zawng indo mi, thisen chhuah mi i nih avângin, ka hming atân in i sa lovang... I fapa Solomonan ka In a din ang” a ti tawp mai a nih kha (1Chro.28:3-6).

Temple chungchâng hi a pawimawh khawp mai. Hmuh-theih Pathian Biak In (Temple/Church building) sakna thu mai bâkah, Lal Isua Ringtute chungchâng hi a sawi tel a ang viau (Joh.2:19,21, 1Kor.3:16,17, Eph.2:21). Ringtu leh Kohhran ţhenkhat-ten Harhna leh Hlimna leh Lawmna sawi tur kan neih theih lohna chhan leh a vawrh-tawp kan thlen theih lohna chhan hi, kan Biak In sakna-ah leh Ringtu (piangthar inti)-te Nun-ah hian Thil thianghlim lo (rilru, taksa, thilpek, thawhlawm, tha leh zung, etc.) a tel nasa lutuk emaw ni ang le aw? tia ngaih ţhat lohna châng hriat a ngai ta tlat mai!

Tuesday, February 24, 2015

NAWHCHI ZAWRH MAN LEH UICHO MAN RAWN LA SUH U!!!

0 comments
1. DUH-KHIRH PATHIAN!!!
Pathianin a hnena Thilpêk kan pêk hi a duh ulûkin, a duh khirh hle a. Pêk ringawt a sawi mawi lova, pek dân tur, pêk tur thil a duh dân, a Petu rilru leh dinhmun a duh dân, etc. a sawi duah ţhin. A duh dân ang thlapa thil tih a nih lohva, an pêk loh chuan, a pawm duh ţhin lo. Kaina Thilpek a pawl loh te, Saula’n Inthawina atâna Bawng a rawn hruaite a pawm loh te, tam tak zinga kha entirna pawimawh zual ni mai se.

Tin, Inkhawmpui-te leh Amah kan Fakna-ah te thleng pawh hian, Amah duh dân ang thlap a nih loh chuan, “In inkhawmpui urhsûn te ka lawm lo, in thilhlân te ka pawm lovang, in rimawi leh hla bêngchhêng-te chu la bo rawh u” a ti hmak hmak mai a nih kha!!! (Amosa 5:21-23, etc.).

Chuvangin, Deut.23:18-ah chuan, “Nawhchi zawrh man emaw, Uicho man emaw, thutiam nân LALPA in Pathian In-ah in keng tur a ni lo. A eng ve ve pawh chu LALPA in Pathian ngaihin thil tenawm a ni” a ti hial a ni. Hetah hian, a Petu leh a Thilpêk kha Mihring leh Pathian ngaih pawhin a thianghlimin, pawmtlâk a ngaih-zia a rawn tichiang hle. Thilpek Thianghlim lo pêkah hian Ringtu leh Kohhran-te kan fimkhur a ngai a. Pathianin a hman theih loh avângin a hnawksak a, Akana hluihlawn thil lâkin Israel fate harsatna a siam ang khân, kan Thilpêk Thianghlim lo pêk-te hian kan thlarau lam nun, rawngbawlna, leh kohhran thlengin a ti-ţhuanawp nasa ţhin tihna a ni.

2. ENGNGE “NAWHCHI ZAWRH MAN” LEH “UICHO MAN” CHU?
Pathianin Israel fate hnena Thu a pek lai (Deut.23:18 thu a sawi lai hian), Israel fate zingah hian Sum hmuh nana Mipa leh Hmeichhe inzawrh ching an lo awm tawh nge? an la awm dawn avanga sawi nge? tih hi ngaih a in-ang lo viau a. Scholar tam zawk chuan, an chhehvel hnam-te zingah an ching nasa a, chu an tihdan chu an entawn ve mai a hlauh avanga Pathianin a vaukhanna niin an ring.

Friday, February 20, 2015

Kohhran Tih-Sual Râpthlâk – Part 2 (Mipa Thuamhnaw Inbel-a Puh Avangin An Hâl-hlum!!!)

0 comments
1. THL SUAL TIH TUM MIPUI ZUI SUH
I chhungte tu-emaw kha, miin dâwt ngial-nganin puh sela, Kohhran leh Sorkar ţangrual chuan Court-ah dik lo takin thiamlohchantir sela, hâl-hlum ta bawk sela! Mahse, an hâl-hlum aţanga kum 500 zet liam hnu-ah a thiamchanna thu sawichhuak leh si sela, engtinnge i ngaih ang? “A dikna leh thiamchanna hailan-a a awm ta chu a lawmawm lutuk alawm” tih lam aiin, thinrimna leh rilru nâtna a belhchhah zawk mai lo’ng maw?

SAINT JOAN OF ARC khân Pathian Aw a hriat avangin Indonaah Hnehna changin France ram tân thil ropui tak a ti a. Mahse, îtsîktu leh tihchhiat duhtuten Chhuanlam eng-eng emaw siamin an man a, rorelna a hmachhawn a. Mahse, Thihna khawp Tih-sual engmah a lo nei leh silo!!! Amah îtsîktute leh hawtute chuan Tihhlum ngei an duh si a, an Man-chhan ni lem lo, thil ho lutuk, “Mipa thuamhnaw a inbel” tia Dâwta puh-in, Sorkar Court leh Kohhran Court Ţangrual chuan Mipui Sâ-hăwk chu hmanruaa hmangin an Hâl-hlum ta a ni!!! Hetah hian Kohhran chu a sulsutu ala ni zui!! He Thilthleng râpthlâk tak hi a lungchhiat thlâk tak zet zet a ni. Mahse, Kum 500 zet a liam hnu-ah chuan, Thiamlohchantir-a Hâl-hlumtu Kohhran ngei chuan “MITHIANGHLIM” (Saint)-ah a puang leh lawi si!!!  

Tuesday, February 17, 2015

Kohhran Tih-Sual Râpthlâk - Part 1 (Kum 350 Hnu-ah Kohhran-in Ngaihdam A Dil Leh Si!!!)

0 comments






1. AN TIH-SUAL AŢANGIN ZIR RAWH
Bible-in Israel fate chunga Thil-thleng a sawinaah, “Chung chu entirna turin an chungah a lo thleng a nih kha; keini, hun tawp lo thlenna-te hi, min zilhna turin an ziak a ni bawk a” a ti a (1Kor.10:6,11,Heb.4:11,2Pet.2:6). Kohhran Tih-sual Râpthlâk tak kha, Tunlai Kohhran tân leh Ringtu mimal tân Zir tur ţha tak kan neih phah ta a. Keini erawhchu Kohhran-in an lo Tih-sual anga tisual ve lo turin kan inbuatsaih a ngai dawn a ni. Kohhran Tih-sual kan ti nâ a, Kohhran hi amah-in a sual thei lova, a Hruaitu leh Enkawltu Mihring (Administrator) kha an pawimawh ber a. Chu Kohhran Hotu/Hruaitu hnuaia awm chu a nih avangin, Kohhran Hruaitu-in a tihsual a, a hruai-sual chuan, Kohhran kha a mualpho ta ţhin a ni.

Chuvangin, Hruaitu an sual a, ţha lo tak leh dik lo taka midangte an hruai a, an fuihpawrh chuan Kohhran-in Thil nasa tak a tisual thei a ni. Kohhran History hi Theological College-ah leh Sunday School-ah kan Zir a, kan Zirtir a, Upa leh Lehkhathiam chin chuan kan chhiar hnu leh kan hriat-sa a ni. He Kohhran Tih-sualah hian Kohhran tih-bik a awm lova, eng Kohhran pawh kan tel vek. A chhan chu hetih hunlai hian Kohhran Pakhatah kan la awm vek avangin keimahni tih a ni tel ve tho a ni. Kan Zir-chhuah atâna ţha ber leh kan Inngaihhruina erawhchu, “SULHNU ŢHA LO, HRIAT RENG TUR HNUTCHHIAH SUH ANG CHE” tih hi a ni.

Monday, February 2, 2015

Savawm-In Mi 42 A Seh-Hlum!!!

0 comments

1. Thu Hawnna
2 Lalte 2:23-24-a kan hmuh angin, Zawlnei Eliza vâna hruaichhoh a nih hnu chuan, Elisa’n a ai awh-in rawngbawlna a chhunzawm țan a. Jeriko khuaa tui in tlâk loh a tih-thianghlim hnu-in, Bethel-ah Pathian be turin a chho ta a. Kawnga a kal lai chuan, mipa țhalai rualte chuan an lo nuihzat-in, an lo deuhsawh a, “Nang lukawlh-pa, han chho tawh, nang lukawlhpa han chho tawh” an lo ti a.  Elisa thinrim chuan țhalai rualho chu ânchhia a lawh a, chuveleh ram lam ațanga Savawmnu 2 lo chhuakin mi 42 lai mai an rawn seh  hlum ta mai a ni!  Zawlnei si, a thin a va chhe ve? kan ti mai thei. Ţhalai-ho țawngkamah hian thil inzep lian tak a awm a ni lo maw? tih hi ngaihtuah tham a awm a, kan zir-ho dawn a ni.

2. Lukawlh-Pa
Mizo Bible-ah, țhalai mipa-ho sawi nân hian, “naupang” a hmang a. Hei hi hriatsual palh a awl mai thei. Helai thu-ah hian, “naupang/țhalai” sawi nân hian Heb.getanaim na’arim, hman a ni a, hei hian mipa kum 15-30 a huam. 1Sam.16:11-13-a kan hmuh angin, Davida chu “naupang” (Heb.gatan) a ni a, Savawm leh Sakeibaknei-te bei tlâka tha nei rual a ni daih tawh a ni.
Ţhalai-ten Zawlnei Elisa an deuhsawhna țawngkam “lukawlh-pa” tih hi zirchian a țul khawp mai. Juda mipa-te hi a tlângpuiin, lusun vang tih lohvah chuan lu (sam) an met khât a, khabe hmul thlengin an zuah țhin. Tin, Juda-ten nâtna (hri)-a an hlauh ber leh Pathian ânchhia ang hiala an ngaih chu “phâr hri” (leprosy) hi a ni. Phâr nâtna hri-in a ken tel (affect) pakhat chu sam/hmul a tlakawlh vek țhin.

Popular Posts