Wednesday, February 25, 2015

JERUSALEM TEMPLE 3-TE SAK DÂN CHANCHIN

1. THUHMAHRUAI
Abrahama’n a fapa Isaaka a hlânna Moria Tlâng-ah ngei khân, Lal Davida’n Pathian hnen aţanga sak dân tur a dawn hmangin Lal Solomona khân Jerusalem Temple kha a sa a (1Chro.28:1-21). Pathianin Amah an Biakna tur atâna Temple an sak tur hi a Satu tur leh a Sak dân tur hrim hrim-ah a ulûk êm êm a. Sum neih leh hausak vang emaw, tha leh thiamna an neih vang emaw-in an sak a phal ngawt lova.

Rilru leh Thiltih-a Thianghlim leh Fel ngeiin Temple hi an sak a phut tlat a. Israel Lal ropui Lal Davida pawh khân, sum leh pai leh theihna (wealth & power) kha nei teh meuh mahse, Pathianin Temple a sak kha a phal tlat lova, “Nang zawng indo mi, thisen chhuah mi i nih avângin, ka hming atân in i sa lovang... I fapa Solomonan ka In a din ang” a ti tawp mai a nih kha (1Chro.28:3-6).

Temple chungchâng hi a pawimawh khawp mai. Hmuh-theih Pathian Biak In (Temple/Church building) sakna thu mai bâkah, Lal Isua Ringtute chungchâng hi a sawi tel a ang viau (Joh.2:19,21, 1Kor.3:16,17, Eph.2:21). Ringtu leh Kohhran ţhenkhat-ten Harhna leh Hlimna leh Lawmna sawi tur kan neih theih lohna chhan leh a vawrh-tawp kan thlen theih lohna chhan hi, kan Biak In sakna-ah leh Ringtu (piangthar inti)-te Nun-ah hian Thil thianghlim lo (rilru, taksa, thilpek, thawhlawm, tha leh zung, etc.) a tel nasa lutuk emaw ni ang le aw? tia ngaih ţhat lohna châng hriat a ngai ta tlat mai!


A chhan chu, heti khawpa inkhawm tam, rawngbawl tam, ţawngţai tam, Fakna hla sa tam a, Zoram Kohhran-te hian Rawngbawl ringawt emaw kan ngaihtuah tih nâk alaia Ringtu Dik tak, Belhchian dawl kan tlêm êm êm-na chhan hi, eng vâng nge ni ang?

Keimahni a Rawngbawltute zawk hi inthenfai ngai, Lal Davida anga thisen kai, mite tâna Uria nupui chhuhsaktu leh pawngsualtu kan nih avângin, Pathian Malsawmna leh Thlarau hnathawh hi keimahni-ah, kan chhungkua-ah leh kohhran-ah hian a thleng thei tak tak lo a ni mai lo’ng maw??? tih hi ngaihtuah tham a tling a ni.  

2.1. THE FIRST TEMPLE (TEMPLE HMASABER)- SOLOMONA TEMPLE
Kum 982 B.C khân Jerusalem Temple (Solomona Temple) hi sak ţan a ni a, 975 B.C ah sak zawh a ni. Israel faten Aigupta an chhuahsan aţanga a kum 480-na, Solomona Lal kum 4-na, May thla (Ziv)-ah Solomona’n Temple sak hna hi a ţan a ni (1Lal.6:1, 2Chro.3:1-2). Hei hi Solomon Temple or Temple Hmasaber (the First Temple) tia koh kha a ni a, kum 7 leh a Chanve chhung an sa a (1Lal.6:37-38). Kum 975 B.C, November (Bul) khân Jerusalem Temple (Solomona Temple) chu, Solomona Lal kum 11-naah sak zawh a ni.

December 975 B.C aţangin Hlânna Inkhawm hi an nei ţan a, kum 974 B.C ah Thuthlûng Bâwm chu Temple-ah an lâ-lut a (2Chro.5:1-8). Hlânna Inkhawm hi kum 2 pumhlum an neih hnu-ah 972 B.C khân Hlânna Inkhawm hi an khâr ta a ni. Lal Solomona’n Jubilee Kum-ah a puang nghal. Judate hian Jerusalem Temple-a sak tur bik hla an nei a, chungte chu he Temple Hlânna Inkhawm-ah pawh hian an sa bawk:-

(1). Sam 92 hi inthawina pangngai (ordinary sacrifice)-ah an sa ţhin a. Hmun 3-ah (3 parts) an ţhen.

(2). Deut.32 (Mosia hla) hi Zing inthawina (morning sacrifice)-ah an sa ţhin.

(3). Numbers 28:9-10 hi Kum 7 danah Vawi khat (Sabbatical sacrifice-ah) an sa ţhin bawk.

Kan hriat angin Juda-ten an chhuan êm êm Solomona Temple ropui tak hi Nebukadnezzeran kum 586 B.C khân a tichhe vek a ni (Ţhenkhat chuan Solomona Temple hi 960-950 B.C chhung vela sak angin an ziak. Solomona Lal kum pawh 970-931/971-930 B.C niin an ziak bawk).

2.2. THE SECOND TEMPLE (TEMPLE PAHNIHNA)– CYRUS THUPEK
Temple Pahnihna (the Second Temple) kha, Lal Kura (King Cyrus of Persia) chuan kum 538 B.C khân Judate saltâng a chhuah bâkah, Jerusalem Temple sa ţha leh turin thupek leh phalna a chhuah a. Nebukadnezzeran Temple bungrua a lâk zawng zawng-te pawh a pe kir leh vek a (2Chro.36:22-23, Ezr.1:1-4,7-11,6:3-15).

Tichuan, Temple Lungphûm hi kum 536 B.C-ah an phûm a. Mahse, Israel fate hi an thlarau lam nun a chauh êm avângin, Temple sak pawh hi an chhunzawm nghal thei mai lova, an chawlhsan vang vang a, Zerubabela hovin kum 520-515 B.C chhung khân an sa ta chauh a ni.

Temple Lungphûm an phûm aţanga chhiar phei chuan Temple hi kum 21 chhung (536-515 B.C) zet an sa tihna a nih chu!!! Hetih hunlai hian, Judate chu an thlarau lam nun a hniam tak zet a, mahni in leh lo lam hna an ngai pawimawh zawk vek a. Chuvângin, Temple sak chu an ngaihthah êm êm a ni. Chuvangin, Zawlnei Hagaia (520 B.C) leh Zawlnei Zakaria (520-518 B.C) ten nasa takin Israel fate hi an zilhau a, Temple sa tura thawk-chhuak turin an fuih nghe nghe a nih kha.

2.3. THE THIRD TEMPLE (TEMPLE PAHNIHNA)– HERODA TEMPLE
Temple Pathumna (the Third Temple) chu Herod the Great, Judai Ram Awptu khân kum 20-18 B.C (kum 1 leh a chanve) chhung a sa a. Temple thar sak ni lovin, thawm ţhat leh chei ţhat hna nasa takin a thawk a. Judate laka tlâk-tlum a duh avângin a insêng nasa hle. Judate pawh khân an Temple (Heroda Temple sak) hi an chhuang êm êm a.

Zirtirte pawh khan, chhuang takin Lal Isua hnenah “Zirtirtu, en teh, a lung leh a in te hi a ropui teh a nia!” tiin an fak chiam nghe nghe a ni (Mat.24:1-2, Mk.13:1-2). A.D 26 khân a zualpui an zova (kum 46 chhung a awh a nih chu! (cf.Joh.2:20), a pawnlam (Temple Courts) te phei chu Heroda thih hnu daih pawhin an sa chhunzawm zel a, A.D 65-ah khân felfai takin an zo chauh nghe nghe a ni.

Tichuan, he Judate Temple (Heroda Temple tih pawhin an sawi awlsam tho bawk) hi Roman General Titus-an 70 A.D khân a rawn tichhe ta vek a. Judate Temple chu Rom Sipaiten an hâl a, a kâng hluah hluah a, Rangkachak-te chu meiin a tih-tui avângin lungrem kârah-te an luang lut a.

Temple chhuat-phah Lungrem kâra Rangkachak lâk an tumna lamah Rome sipaiten Temple chhuat lungrem thlengin an karphawng vek!!! Lal Isua’n A.D 33 vela, a lo sawi-lawk daih tawh, “Heng hi in hmu maw? tihchim lohva lung intiang rêng rêng hetah a awm lovang” a lo tih kha, a tak takin a lo thleng dik ta a ni!!! (Mat.24:1-2, Luka 13:1-2, 19:41-44, 21:5-6). Temple chhunga bungrua hlu tak tak tak-te pawh chu General Titus hian Rome-ah a kalpui ta vek bawk a ni.

2.4. THE LAST TEMPLE (TEMPLE HNUHNUNG BER TUR)
Pathianin Temple sa tura a tihna hmun Moria tlâng kha, Abrahama’n Isaka a hlânna kha a ni a (Gen.12), Arauna ram, Lal Davida Inthawina hmun kha a ni (1Sam.24). An sawi dân chuan, Solomona Temple khân Square ft. 900 a awh a, Heroda Temple khân, Square ft. 600 a awh a, tuna Muslim temple “Kubbet Es-Sahkra” (the Dome of Rock or the Mosque of Omar) innghahna ram, Haram Esh-Sherif (the sacred enclosure) an tih hmun khuan, ram Acres 35 vel a awh a, Solomona Temple huamchhung zawng kha niin an sawi.

Temple chhungah khuan, Moria tlâng sâng lai ber kha Temple chhuat aţanga ft.6 velin a rawn poh chhuak a. He Moria tlâng pawng sâng lai hian ft.60-a sei, ft.40-a zau lai a awh a ni. Thil mak tak mai chu, anmahni ramchhungah ngei, Pathianin hmun leh ram a pek-ah ngei, an Temple lo sak tawhna hmun hlui ngei ni bawkah, Ringlo miin an Sakhaw Temple an sa a, langsâr taka a dingluah mai nitin zan tin-a hmuh reng mai chu… Juda-ho tân a harsa ngawt ang le!! “Mittui parawl ţeuhvin an thlir ţhin” an tih hi a dik ngeiin a rinawm.

Engah nge Israel-te khuan, Muslim Mosque khu bei a, an lâk mai loh le? Kum 1930 aţanga Political Issue ni tawh pawh nise, Biblically, Historically, Religiously & Territorially pawhin an ramchhung a ni a, an ta a ni a, lâk-let leh pawh tum sela a dik mai lawm ni?? tiin, mi tam takin Zawhna an siam a. Anmahni Juda-ho ngei pawh khuan lâk-let leh dân tur relin Sakhaw thil (Jewish Ministry of Religious Affairs) ang zawng leh Sorkar (Israel Parliament- Knesset) ang pawhin vawi tam tak an lo chai tawh a.

Juda-mi a mimal-a Muslim temple beitu hi a khât tawkin an awm zeuh zeuh ţhin. UNO pawhin a thli-thlai ru rêng bawk. Ţhenkhat sawi dânah phei chuan, Temple sak dân tur ruahmanna engkim an peih vek tawh a. Temple sakna tur hmanrua pawh an chhêk ngah vek tawh. Sa ţan ta sela, thla 1 chhung lêkin an sa zo vek thei ang, an ti nghe nghe! Mahse, Juda Puithiam (Orthodox Jewish Rabbi)-te chuan, “Messiah lo kal phawt sela, Temple khi thenfai phawt a ngai bawk si a, ala hun lo ve” an ti tlat zel rih a ni, an ti!!!

3. TLÂNGKAWMNA
Israel fate khân Jeriko khaw ropui leh nghet, kulh ţha takin a hual vêl vek kha, Pathian thupek awihna leh Pathian tâna inserh-thianghlimna leh Berampa ki ham leh mihring aw-rawl hmangin an au chim tawp mai a!!! Amaherawhchu, Ai khaw tê-tak-tê chu, ngam tak leh hneh ngei in-ringin an han bei rawk a. An rinloh deuhvin, an ngam ta rêng rêng lo mai!!! A chhan ber chu, Pathianin “hluihlawn thil (thil thianghlim lo) in la tur a ni lo” a tih kha, zawm duh lovin Akana’n hluihlawn thil (Pathian duh loh, thil thianghlim lo) a lo lâk vang a ni (Josh.6 & 7).

Israel-ten Pathian Nung an biakna tur atâna pawimawh em em, an Temple pawh sa thei lova, Temple pawh nei lova an awm khuan Entir pawimawh tak a nei a ni. Ringtu nun-ah hei hi Zirchhuah a pawimawhin a ţul khawp mai. Rawngbawltu leh Ringtu inti-ten rawng hi bawl nasa viau ţhin mahila, theihtawp chhuah ve ţhin mahila, keimahni lamah hluihlawn thil, Pathian huat-zawng kalsan kim loh, paih phal loh, thlâh phal loh kan neih chhung chuan, Pathianin min hmang tak tak thei ngai lovang. Keimahni-ah, kan Chhungkua-ah, Kohhran-ah, kan Hnathawhna-ah, kan Rawngbawlna-ah a Ţha zawng aiin a Chhe zawngin kan bûk rit zawk zel ang.

Kohhran-ah leh Rawngbawlna-ah Nihna sâng leh ţha chelh-in, talent ţha tak tak neiin, Sum leh pai-ah harsa lovin, hriselna lam thu-ah pawh harsatna nei lo mahila, Thlarau keimahni-a a chen siloh chuan, mite tân rimtui kan ni tak tak thei ngai lovang.

Biak In ţha leh changkâng ber ber, Hmanraw changkâng leh ţha zawng zawng pawh nei kim vek mahila, Nun thianghlimna tak tak nei si lova, tinungtu Thlarau Thianghlim chu min Hruaitu a nih si loh chuan, Thlarau nun tuihâl leh chau-te tân Malsawmna kan ni ngai lovang. Pathian tân pawh awmze nei lova Dâr ri mai mai ang lêk kan ni palh ang tih a hlauhawm hle a ni (1Kor.13). Chuvangin, Temple, Biak In Thianghlim, Pathian In, Keimahni ngei hi enkawl uluk ila, vawng thianghlim ila, Lalpa ropuina tur chauhvin i hmang ang u (Joh.2:19,21, 1Kor.3:16,17, Eph.2:21).

(((source:- Dr. John Hlychho, Bible Chronology, 2010, pp.25-26)))

0 comments :

Popular Posts