Monday, February 2, 2015

Savawm-In Mi 42 A Seh-Hlum!!!


1. Thu Hawnna
2 Lalte 2:23-24-a kan hmuh angin, Zawlnei Eliza vâna hruaichhoh a nih hnu chuan, Elisa’n a ai awh-in rawngbawlna a chhunzawm țan a. Jeriko khuaa tui in tlâk loh a tih-thianghlim hnu-in, Bethel-ah Pathian be turin a chho ta a. Kawnga a kal lai chuan, mipa țhalai rualte chuan an lo nuihzat-in, an lo deuhsawh a, “Nang lukawlh-pa, han chho tawh, nang lukawlhpa han chho tawh” an lo ti a.  Elisa thinrim chuan țhalai rualho chu ânchhia a lawh a, chuveleh ram lam ațanga Savawmnu 2 lo chhuakin mi 42 lai mai an rawn seh  hlum ta mai a ni!  Zawlnei si, a thin a va chhe ve? kan ti mai thei. Ţhalai-ho țawngkamah hian thil inzep lian tak a awm a ni lo maw? tih hi ngaihtuah tham a awm a, kan zir-ho dawn a ni.

2. Lukawlh-Pa
Mizo Bible-ah, țhalai mipa-ho sawi nân hian, “naupang” a hmang a. Hei hi hriatsual palh a awl mai thei. Helai thu-ah hian, “naupang/țhalai” sawi nân hian Heb.getanaim na’arim, hman a ni a, hei hian mipa kum 15-30 a huam. 1Sam.16:11-13-a kan hmuh angin, Davida chu “naupang” (Heb.gatan) a ni a, Savawm leh Sakeibaknei-te bei tlâka tha nei rual a ni daih tawh a ni.
Ţhalai-ten Zawlnei Elisa an deuhsawhna țawngkam “lukawlh-pa” tih hi zirchian a țul khawp mai. Juda mipa-te hi a tlângpuiin, lusun vang tih lohvah chuan lu (sam) an met khât a, khabe hmul thlengin an zuah țhin. Tin, Juda-ten nâtna (hri)-a an hlauh ber leh Pathian ânchhia ang hiala an ngaih chu “phâr hri” (leprosy) hi a ni. Phâr nâtna hri-in a ken tel (affect) pakhat chu sam/hmul a tlakawlh vek țhin.


Bible scholar-te chuan, Zawlnei Elisa hi hetih hunlai hian kum 25 vel niin an chhut a, phâr nâtna (Pathian ânchhe dawn vang) a nih ngawt loh chuan, a sam tlâkawlh deuh vek tur chuan a kum a la tlêm lutuk a, lu a sun bawk si lo nen, thil danglam leh mak tak a ni reng a ni. Ţhalai rualte hian Elisa hi tar ala ni si lova, kum 25 mi lek lukawlh chu Pathian ânchhia dawng, phâr hri vei, phâr hri ințanna-ah an ngai niin a lang.

Hetiang a nih avang hian, Juda-te chuan “lukawlh-pa” tia in koh chu, “in hmuhsitna leh in deuhsawhna țawngkam-ah” an hmang zui ta hial a ni (cf. Isaia 3:17, 24). Phâr leh lukawlh-te hi Pathian ânchhe-khumah an ngai a, Elisa pawh hi Pathian thuawih lo, Pathian hrêm mêk, misual, a dêra Zawlneia inchhâlah an ngai tihna a ni. Ţhalaite hian, pawnlam landan ringawt thlir a, Elisa nih loh pui an nih tir a, Pathian Zawlnei kha misual leh dawheh taka ngai a, hmusit tak leh deusawh taka an tih avangin Pathian thin a alh a, Elisa hmangin Thalai ho chunga hian action a la ta a ni.

3. Han Chho Tawh
Zawlnei Elisa hma-ah hian, Zawlnei Eliza pawh kha Pathian be turin Bethel-ah a lo kal ve fo tawh țhin a. Chuvangin, Ţhalai rualte hian Zawlnei Eliza Bethel-a a lo chho an hmu țhin a, Ţhawnga leivirin a lâk bo chungchâng pawh an lo hria a. Mahse, he țhalai rualte hian Zawlnei Eliza kha Pathianin țhawnga leivir hmanga a lâk bo a nih an ring lo tih an țawngkam-ah hian a lang tlat mai! Ţhalai rualten Elisa an deusawhna țawngkam, “han chho tawh” tih hi, Scholar-te chuan, “Eliza angin Bethel-ah te chho la, dâwt-in Ţhawnga leivirin vânah a hruai chho ta, an la ti ve dawn che nia! Dâwheha-te putu in ni” an tihna tluk a ni e, an ti. Ţhalaite țawngkam-ah hian Elisa mimal taka hmuhsitna leh Pathian, thilmak-titu chona lian tak a tel a, an țawngkam hi a nâ-in a lo râpthlak hle mai!

4. Savawm-In Mi 42 A Seh Hlum!
Ţhalai rualte hian Pathian an chona leh Elisa an hmuhsitna hi a nâ bawk a ni ang, action pawh a nâ ngiang mai! Bethel-a Pathian be tura Elisa chho tur an deusawhna țawngkam hian, Pathian awm an rinlohzia leh Zawlnei rawngbawlna an ngaihnepzia a tarlang chiang hle bawk. Sawi tawh ang khân, Zawlnei Eliza vâna hruaichhoh-a a awm kha an awih loh zia leh Pathian thiltihtheihna an hmuhsit zia leh nuihzat zia pawh a lang chiang bawk (cf. 2Tim.3:5).

Tichuan, Elisa pawh a tuar ta ngang lova, țawngkam chhe dang hmang lovin, Pathian thu-in a lo sawi lawk tawh chu hmangin, ânchhia a lawh (chham-khum) ta a ni. Scholar-te chuan, Leviticus 26:21-45 thu, “Mi kalh zâwnga in awm a, ka thu in pawm loh chuan in sualnate a zirin… ramsa-te ka rawn tir ang a, chu chuan in fate a lâk sak ang che u…” tih hi Elisa’n a chham chu a ni e, an ti.
Zawlneiin Pathian thu a chham zawh veleh hian Savawmnu 2 chu ram lam ațanga lo chhuakin, țhalai mipa ho chu a rawn seh nghal bawrh bawrh a, mi 42 lai mai a seh-hlum ta a nih chu! Pathian an chona man leh Pathian Zawlnei dik tak an hmuhsit leh deusawh man chu a râpthlak hle mai. 

Tunlaia Zorama chanchin kan hriat turu tak, Pathian awm ring lote (Atheists) leh Setana biaknaa inhnamhnawih țhalaite pawh kha an sim loh chuan an chan tur chu a lang sa reng mai.
Setana betute khân, kum 2012-ah, thla 2 chhung ringawtah Biak In 3 suasam-in, Bible Thianghlim-te hial an hâl a nih kha (Dt. 30.4.2012-ah Kolasib Vengthar UPC (NEI) Biak in, Dt. 2.5.2012-ah Thingdawl-ah Roman Catholic Biak in, Dt. 8.5.2012-ah Kolasib Vengthar Presbyterian Kohhran Biak in). Pathian biakna hmun thianghlim emaw, Pathian ringtu dik tak-te emaw sawisak, hmuhsit leh deusawh hi Pathian mit-naute khawih ang a ni, direct-in action a awm ngei ngei țhin. Fimkhur hle ang che.

5. Thu Tlângkawmna
Khawvela Mission history te, Church history-te hi chhiar ila, a lang leh lang lova Pathian engah mah ngai lova hmusittute leh Pathian ringtute tiduhdah a, deusawh țhintute chungah hian kan Pathian nung hian hmuh-theihin action hi a la ngei ngei țhin tih hi sawi tur a tam mai. Missionary-te ngainep a, tiduhdahtute (Orissa & Mizoramah, etc) chunga Pathian action lâk dân chu sawi ngai lovin a râpthlak zia kan hre vek a ni.

Juda mipa țhalai-ho ang maia, pâwnlam landân ațang chauhva mi teh ching, Kristianna phaw atâna hmang a, Kohhran hi hmanruaa hmang a, bihruk nân-a hmang a, pâwnlam chauh Kristian hi Pathianin ro a relsak hun a la thleng dawn a ni. Tisa-a chan chau zawkte hmuhsitna te, hârsatna siam sak a, an ei tur leh chan tur chhuhsak te hi Pathian pawi sawina a ni. Pathian rawngbawltu tak tak-te hmuhsitna leh Pathian thiltihtheihna ngaihnêpna hi Pathian pawikhawihna lian tak a tling a ni, tih hria-in fimkhur hle ang che, chutilochu, Pathian tirh Savawm-in a seh-hlum ve palh ang che.

Zoramah hian Rawngbawltu (Pastor, Revival Speaker & Upa, etc.) kan tam ta hle mai! Ngaihtuah zui atâna țul tak pakhat erawhchu, Zawlnei Elisa anga, “Pathian thiltihtheihna a lanchhuah theihna tura Pathian tirh Savawm ko-chhuak thei” hi Zoram rawngbawltu zingah hian engzât tak awm ang maw? tih hi zawhna pawimawh tak chu a ni ta!
==============================================
Dictionary:- Eliza=Whose God is Jehovah, Elisa=God his salvation, Jeriko=Place of fragrance, Bethel=House of God.

0 comments :

Popular Posts