Saturday, March 7, 2015

BIBLE LEH SCIENCE HI A INKALH EM???

1. HMUHMAHRUAI
1Timothea 6:20-ah, “Aw Timothe, i hnena kawltira awm chu vawng ţha rawh. Pathian zah lo lam thu sawi mai mai leh, dik lo taka “Finna” an vuah hnialna hi hawisan rawh” tih kan hmu a. Ngaihtuah mang lova chhiar liam puat chuan, ‘Bible hian Science lam rêng rêng hi chu a do a nih hi’ tih mai a awl hle. Hei hi Mi tam tak-te ngaihdân leh sawi ţhin dân pawh a ni rêng a ni. Chuvangin, ngaihdân dik famkim lo neiin, Science hmanga thil hmuh-chhuah leh siamchhuah-te chu Ramhuai hnathawh angin an ngai ta vek ţhin a, Damdawi-te, Science lam thiamna eng-ang chi pawh an hmang duh lova, an hnual-suat a, an hnawl ta ţhin a ni.


Țhenkhat chuan, Paula sawi tum hi HERETICAL SCIENCE (GNOSTICISM) a ni a, Greek miten “Finna & Hriatna Danglam bik” (Gnosis) hmanga Pathian Pawl theihna chungchâng an zirtir kha Paula hian a do a ni e, an ti. Mahse, hei hi Bible Scholar zawng zawng deuh-thaw-in an hnawl. A chhan chu, GNOSTIC ZIRTIRNA (Greek. Gnosis- Special Knowledge) hian “Special Spiritual Knowledge” lam a kâwk a, Scientific Facts emaw, Pure Science zirna lam emaw a sawi lova, a hawi lo hrim hrim, an ti ve thung. He Heretical Science ngaihdân hi chu sawi-zui tlâk lovah dah ta mai ila.


2.1. SCIENTIFIC FACTS
Paula hian “SCIENCE DIK TAK LEH SCIENCE PANGNGAI” (Scientific Facts or Pure Science) kan tih hi a do lova. A chunga Bible châng kan tarlan khian, Science Dik tak leh pangngai a duhlohna lam sawi a tum lo. Bible-ah vêk hian hmun tam takah kan hmu a, Khawvel leh a chhunga thil awm zawng zawng-te hi Pathian siam a nih thu te, Vânsanga thil awm-te khian Pathian ropui zia an puanchhuah thu te a sawi zawk a ni (Sam 19 & 24, etc.). Vân leh thilsiam dangte nihna zir leh hriatchian hi Scientific Facts a ni a, hetiang lama Zirna leh Hriatna hi Pathian thil ruahman zingah a tel a, Pathianin a phal loh thu Bible khawiah mah a inziak lo.


Paula chuan, “A thil hmuh theih loh (a chatuan thiltihtheihna leh a Pathianzia chu) khawvel siam tirh ata fiah taka hmuhin a awm a, THIL SIAMAH CHUAN A LANG A NI; CHUVANG CHUAN CHHUANLAM TUR AN NEI LO” a ti a (Rom 1:20). Miin, Engkim Siamtu Pathian hi a awm a ni, tih a hriat theihna tur kawng pawimawh tak pakhat chu a “Thilsiam Chanchin Zir Leh Hriat” (Knowledge of Scientific Facts) hi a lo ni reng mai!!! Chuvangin, Thilsiam ropui leh mak tak tak kan hmuh leh kan hriat-te aţang hian Siamtu Pathian ropui zia kan hmuh-chhuah zel hi Pathian duhzawng a ni.

2.2. PSEUDO SCIENCE – FAKE/DUPLICATE
Science Pangngai/Science dik tak ni lo (not scientific facts), Phuahchawp, “PSEUDONYMOUS SCIENCE” zawk hi Bible-in a duh loh bur chu a ni. 1Timothea 6:20-a, “Aw Timothe, i hnena kawltira awm chu vawng ţha rawh. Pathian zah lo lam thu sawi mai mai leh, dik lo taka “FINNA” an vuah hnialna hi hawisan rawh” a tih-a, “FINNA” a tih tak Țawngkam pawh Greek. “PSEUDONEMOU” a hmang a. Hei hi English-in, PSEUDO (Fake/Duplicate- a lem/ a tak ni lo/ siamchawp) tia an hman zui tâk hi a ni.


“PSEUDO SCIENCE” chuan Science Pangngai (Scientific facts) leh Mihring Finna (Philosophy/Human Reasoning) la-kawpin, ngaih dân leh thlir dân hrang a duang-chhuak ţhin a ni. Hei hian a tak tak awm lo thu vuvûk leh hmasâng thawnthu leh finfiah theih loh Ngaihruat thil/ Zêldin thu (Myth, Legend & Imaginary) hmangin Bible leh History leh Thilsiam-te Chanchin an Hrilhfiah ţhin a ni (1Tim.4:7). Hei hi Paula chuan, “Pathian zah lohna leh pitarte thawnthu mai mai duh suh” a tih kha a ni. Hetah hian Paula hian, Myth, Legend & Imaginary te hi Pathian tello hriatna, Pathian zahlohna a nih thu a sawi tel kher a ni, tih hi chhinchhiah tlat ila.

2.3. SCIENCE AGAINST THE BIBLE
Bible-in Scientific Facts a do loh laiin, a do tlat leh a duh loh êm êm a awm ve thung a. Chu chu, “SCIENCE THLIRNA AŢANG RINGAWTA PATHIAN THU HRILHFIAH TUM” (Reading & Interpreting the Bible Only From Scientific Perspective) hi a haw êm êm a, Paula khân Pastor Timothea hnenah pawh khân tlân-san turin a chah mawlh mawlh a ni. Pseudo Science rêng rêng chuan Bible a do ngei ngei ţhin. Hei hi a chhan bulpui ber (main reason) chu Setana tactic, Ringtute leh Ringlo-mi, Khawvel thila inti-fingte a hruaibo-na hmanraw pawimawh tak a ni.


Paula sawi dân aţang khian thil lang chiang êm êm pakhat a awm a. Pseudo Science chuan, thil engkim hi Science Thlirna aţang ringawta Hrilfiah leh Sawifiah a tum a. A Sawifiah theih loh chu a hnawl ta ţhin a ni. Hei hian nghawng ţha lo tak a neih chu, Lal Isua Thilmak tih leh Thlarau Thianghlim Hnathawh mak tak tak (Virgin birth & all Miracles in the Bible) te a Hnawl-tir vek a. Mihring Finna (Scientific Facts & Philosophy/Human Reasoning) aţanga chhui-chhuah phâk loh tam tak awm-te chu a hnawl fai nghal ta vek bawk a ni.
Thlarau lam thil (Religious & Spiritual Facts/Truth)-te hi Science Hmanga Hrilhfiah vek theih loh tam tak a awm a. Thuthlung Thar-a Lal Isua Thilmak tih 37-te pawh Scientific Facts leh Human Reasoning aţang chuan Sawifiah ngaihna a awm lova, an Sawifiah ve a nih pawhin, Myth, Legend & Imaginary Thlirna aţang chauhvin an Sawifiah ang a. Pathian Thiltih mak a nih thu pawm duh si lovin, Experiment han pe dawn se, an thei chuang dawn lo a ni.

Hei tak mai hi Pseudo Science leh Scientific Facts pathian-tu (Science hmang-sualtu)-ten Bible an kalh ţhin dân chu a ni. Paulan hetiang mite chanchin hi a lo sawi-lawk diam tawh a, “THIL LAWILO AN NGAIHTUAH TA ZAWK A, AN THINLUNG Â CHU A LO THIM TA A. FINGA INNGAIIN MI-Â AH AN LO CHANG A, thi thei lo Pathian ropuina chu thi thei mihringte leh sava te, fuliafa te, rannung te lem angah an chantir ta a” (Rom 1:21-23) tiin.

3. TLÂNGKAWMNA
Science hi Pathianin a ngai pawimawh a. Amah kan hriat-fiah deuh deuh a, a ropui zia leh a thiltihtheih zia kan hriat fiah leh zual theih nân, kan zir tam leh kan hriat tam hi Pathianin a duh tih a chiang hle. Carl Boberg, “AW LAL PATHIAN, I KUT-CHHUAK THIL SIAM TINRÊNG” (How Great Thou Art) tih hla Phuahtu pawhin, khawpui ri dur dur leh thli-tleh thut (thunderstorm, etc) a tawn aţangin, Siamtu Pathian ropui zia leh a thilsiam mak zia leh ropui zia a hmu-thar leh a, Hla-in a rawn phuah-chhuak ta a nih kha.


Ringlo-mi Medical Doctor-te pawhin, mihring taksa pêng leh kawchhung leh thisen zâm awmdân engkim an zir a, an hriat chian aţangin, Mihring siam dân mak-zia leh ropui zia an hmuchhuak tam tial tial a. Bible sawi angin, “Mak tak leh Hlauhawm taka Mihring Siamtu Pathian (Creator God)” hi a awm an rin phah a (Sam 139:14). Siamtu ropui chungchuang (Supreme Being) leh Engkim Siamtu Pathian (Creator God) hi a awm ngei a ni, tih hi an hriat-chian phah ţhin a ni.

Amaherawhchu, thil ţha leh finna ropui tak-te hi kan hmansual a, Amah kan hlat phahna tur atân-a kan hman chu Pathianin a duh hauh lo thung. Chuvangin, Science (Medical, etc.) thiamna ringawt te, Mind Power (logical thinking & human reasoning) hmang ringawt te, Mihring theihna (power, energy & might) ringawt hmachhuan a, Bible-a Thilmak te leh Thlarau Thianghlim Hnathawh dang zawng zawng-te Hrilhfiah kan tum a, chutiang anga kan hrilhfiah theih loh chu awih-awm lo anga kan zir-chhuak dawn a nih chuan, Bible-in chutiang Zirna leh Thiamna chu a hnawl hmiah a, a do nghal a ni tih kan hriat rêng a pawimawh.

0 comments :

Popular Posts