Friday, March 27, 2015

HLAWHCHHAM PHAWT HI HLAWHTLINNA (FAILURE IS SUCCESS)

1. THU KAMKEUNA
Kan Thu khel tur “HLAWHCHHAM PHAWT HI HLAWHTLINNA A NI” (FAILURE IS SUCCESS) tih hi mak kan tiin, hriatthiam a har kan ti viau-in ka ring. A chhan chu, kan rilru-in, “A Hlawhchham tawh ber chuan, a Hlawh-tling lo tihna a ni mai alawm” kan ti ngei ang. Mahse, Thufing chuan, “EVERYTHING HAS A PURPOSE” a ti a, ‘engkim hian tum a nei vek’ a, chhan neia awm leh chhan neia thleng vek an ni. Zirlai 10 aţangin kan zir dawn a ni.

Bible chuan, “Chawngzawng pakhat pawh a chhan awm lovin leiah a tla lo…” a ti a (Mat.10:29, Lk. 12:7). Mi tam tak chu kan fellohna te, kan chapona te, Pathian kan ngaihsak lohna te, kan dinhmun ţha lo tak-te aţanga harhchhuak turin vanduaina te, chhiatna te leh thihna te hial kan tawh phawt a ngai ţhin. Malsawmna-in a kaihthawh zawh tawh loh te chu Chhiatna hmangin Pathianin a kaitho ta ţhin a, chhiatna hian mihring nun-ah thu a lo sawi ring zawk nge nge ţhin bawk.
 
Chuvangin, Pathianin Lal Isua ringlo te, misual te, thil ţha lo (hlawhchhamna, beidawnna, nâtna, chhiatna, thihna etc.) te thlengin hmanrua atân a hmang ţhin. Pathian kan hriat theihna tur te, Rawngbawlnaa kan chak theihna tur te, Thlarau lama kan insiam ţhat theihna tur a ni. Pathianin ringlo te, misual te, thil ţha lo te pawh hmanruaa a hman zia tichiang turin, Assuria leh Balylon te pawh Pathianin “ka talh tum, ka tiang” a ti nghe nghe a nih kha (Isaia 10:5, 19:25, Ezra 6:22).


Pathian thilththeihnaa a innghah lehzual theih nân Tirhkoh Paula hnenah pawh khân ‘nâtna tihdam theih loh’ pek a nih kha (2Kor.12:9). Chutiang bawkin, Mithianghlim Joba kha a sual vang ni lovin, Pathianin a rintawk êm avangin a duh tawka a khawih turin Pathianin Setana kutah a pe phal. Pathian remtihnaa thilthleng a nih avangin Pathianin a tâwk chin a hria a, a tihchhiat tur a hria a, a tihdam dân tur pawh a hria. A chunga thil-thlengte aţanga Pathian aw ngaichâng thiam a, Thlarau Thianghlim hruaina zui ţhin chuan Pathian hnathawh dân te, remruat dân te, a nun atâna Pathian thiltum te a hrechhuak ngei ngei ţhin.
 
2.1. J.K. ROWLING– NOVELIST (HARRY POTTER)
Harry Potter Thawnthu ziaktu Joanne “Jo” J.K. Rowling hi tun hmâ chuan Restaurant-a Waitress hna thawk țhin a ni. A Lehkhabu hi Publishers 10 chuang ten an hnâwl sak hnu-in, a kal tawpna-a an C.E.O fanu kum 8 mi chuan a pa a ngen tlat avangin an chhuahsak ta hrâm a. Khawvela Thawnthu ziak hralh tam ber (best-selling book series in history) a lo ni ta a, Kum 5 chhung lekin, Multi-Millionaire a nih phah!! Kum 2008 ah khân United Kingdom-a Hmeichhe Hausa-ber 12-na a ni phâk hial!!
 
2.2. LUDWIG VAN BEETHOVEN– COMPOSER & PIANIST
A Violin tum thiam lo lutuk chu a Zirtirtu chuan beidawnthlâk a ti lutuk a, “Music lam leh Hlaphuah kawnga beisei-bo a ni” a ti tawp. Chutih nâk alaiin, Beethoven chuan a ri hriatna a hloh zel a, a beng a ngawng hlen ta hial!! Mahse, a kut-chhuak zinga ropui ber 4 te chu a Beng a ngawn hlen (completely deaf) hnu-a a siam (composed) an ni tlat si!!
 
2.3. COLONEL HARLAND SANDERS– FOUNDER OF KFC
Sanders chuan Kum 65 mi a nih-in a “CHICKEN RECIPE, KENTUCKY FRIED CHICKEN” siam hralh turin hmun hrang hrang 1000 chuangah a kal a, a hlawhchham. Kum engemaw zât a vahvaih-pui hnu, kum 75 mi a nih-in, a company din “KENTUCKY FRIED CHICKEN” (KFC) chu Dollar million 15-in an lei sak a, Tunah chuan ram 120 ah dawr 18,000 chuang a nei tawh!!
 
2.4. WALT DISNEY– CO-FOUNDER DISNEYLAND & FILM PRODUCER,
The Walt Disney Company (Disneyland) a din hma hian Walter Elias Disney chu a thawhna Newspaper Editor ațangin “idea a nei thlawt lo” tiin an bân tawp a. Sum leh paiah vawi tam tak a tlachhia a, titi-ah chuan vawi 302 zet Company ten an hnawl an ti!! Tunah chuan DISNEYLAND lâr zia leh tlawhtu a ngah-zia chu sawi a ngai tawh lo.
 
2.5. SIR CHARLES CHAPLIN– COMIC ACTOR & FILMMAKER
Charlie Spencer Chaplin (British Comic Actor & Filmmaker) kha a naupan lai ațangin retheihna leh harsatna râpthlak tak takin a tuam a. Fahrah Enkawlna hmunah hial dah a ni!! A chanchin ziaktu David Robinson phei chuan “Khawvela tungchhova piang zinga rethei lutuk dinhmun ațanga hausa tak dinhmuna inhlângkai chanchin ngaihnawm leh rilru khawih ber a ni” a ti hial! Kum 1975 khân Chawimawina sâng tak, KNIGHT COMMANDER OF THE MOST EXCELLENT ORDER OF THE BRITISH EMPIRE hlan a ni a. Kum 1962 khân University of Oxford leh University of Durham chuan Honorary Doctor of Letters an hlan hial!!
 
2.6. JACK CANFIELD & MARK HANSEN– CHICKEN SOUP FOR THE SOUL
Jack Canfield & Mark Victor Hansen ten CHICKEN SOUP FOR THE SOUL Lehkhabu an ziak (Compiled) zawh khân Chhuahsak tura an ngenna chu New York-a Publishers 33 ten an hnawl a, California-a American Booksellers Association zinga 90 ten an hnawl bawk. New York Publishers phei chuan hmusit takin, “Nobody Wants to Read a Book of Short Little Stories” a lo tih sak!! A tawp-khawkah, HEALTH COMMUNICATIONS INC., chuan an chhuahsak ta a. Tunah chuan Ţawng hrang 31 laia lehlin niin, 53 Million Copies chuang zet an hralh tawh!!
 
2.7. ELVIS PRESLEY– KING OF ROCK & ROLL
Kum 1954 khân, Jimmy Denny, Manager Grand Ole Opry chuan Elvis Aaron Presley chu rawih tlâkah a ngai ngang lova, hmusit takin “Ka fapa, tih thiam leh tih theih dang engmah i nei lo ve, Truck khalh leh mai la, chu chu i tih theih leh thiam awmchhun a ni,” tiin a bân tawp a. Mahse, Elvis Presley chu a beidawng duh mai lo. Tunah chuan KING OF ROCK AND ROLL tih hiala koh a ni a, Zaithiam lâr ber (One of the Most Popular Musicians of the 20th Century) a ni ta hial!!
 
2.8. STEVEN SPIELBERG– FILM DIRECTOR & PRODUCER
Steven Allan Spielberg chu University of Southern California (School of Theater & Film and Television)-a zir a dilna chu, amah-ah beisei tur awm-a an hriat loh avangin vawi 2 lai an hnawl a. Mahse, tunah chuan, khawvela film hmuhnawm ber ber-te (Biggest Movie Blockbusters in History) chu a kut-chhuak an ni ta thung!! Film Industry chuan, Lemchan Khawvela Steven Spielberg Hlutna hi Dollar 3.2 Billion a ni e, an ti! February 5, 1994 khân, vawi 2 lai amah lo hnawltu University of Southern California chuan Honorary DOCTOR OF FINE ARTS in Chawimawina an hlan ta thung!! TIME Magazine chuan ‘100 GREATEST PEOPLE OF THE CENTURY’ zingah a telh hial!!
 
2.9. STEPHENIE MEYER– PRODUCER (THE TWILIGHT SERIES)
Tunlaia film lâr tak Twilight Thawnthu ziaktu Stephenie Meyer (Novelist & Producer) chuan Publishers (Literary Agencies) 15 hnenah Chhuahsak turin a dil a. An zinga 9 chuan an hnawl sak hmiah a, 5 chuan Chhân (reply) tlâkah pawh an ngai lo!! An zinga 1, JODI REAMER OF WRITERS HOUSE chuan beisei sâng vak lo chungin “chance” a pe a. Mak tak maiin, TWILIGHT SERIES 3 ziak turin Dollar 750,000 pêk an tiam nghal ta mai!! Kum 2010 ah chuan, Forbes chuan a Thuziak etc. ațanga Dollar 40 Million a thawhchhuah tawh thu an chhuah!!
 
2.10. MICHAEL JORDAN– PROFESSIONAL BASKETBALL PLAYER
Michael Jordan (American Professional Basketball Player) hi mi tam tak chuan hlawhchham awmzia a hre lo emaw kan ti mai thei. Ama inpuanna ngei hi i ngaithla teh ang, “Game 300 zetah ka chak lova, vawi 26 zet ka chunga mawhphurhna pawimawh lutuk innghatah ka hlawhchham chiang hle. Ka hun chhung khan vawi tam tak ka hlawhchham nawn ka hlawhchham nawn a. Khami avang tak khân ka hlawhtling ta a ni” a ti!!
 
3. I ZIRLAI KHA ZIR CHHUAK RAWH LE!!!
Ringtuten misual te, tiduhdahtu te, hlawhchhamna, vanduaina, natna leh chhiatna te kaltlanga harsatna kan tawrh hi Pathianin a phal. Pathianin a phalna “Chhan pawimawh tak” a awm. A chang chuan ringtute hi kan awm nuam lutuk a, kan inthlahdah a, rawngbawlna lam te kan ngaihsak tawk lova, Thlarau lam thil kan hlamchhiah a, kan thlarau nun a lo chak loh phah ţhin. Hei hi Pathianin a hrechiang êm êm a. Kan awmna bu zawlnuam tak te min tihchhiat sak a, nâtna, hârsatna, chhiatna leh vanduaina te hmangin min ti-harh a, min kaitho ţhin a ni. Kan awmna bu zawl nuam tak (comfort zone) chhuahsan a, Lalpa tana mi ţangkai kan nih theih nan Pathianin hârsatna leh buaina leh lungngaihna te hmangin min chawk harh ţhin a, min kaitho ţhin a ni.
 
Tirhkohte pawh khan, Jerusalem-a thlamuang taka rawngbawl a, anmahni ngaisângtu ringtute hnena ei tur leh in tur sem kha nuam an ti êm êm a, kal chhuak a, Chanchin ţha hril tura Thupek kha an theihnghilh hial a. Chuvangin, Stephan aţanga ţanin, Jerusalem aţanga hnawhchhuah a, tih-darh hial an lo ngai ta a nih kha (Tirh. 2:42-47, 6:1-7, 11:19). 

Ringtute hi hmantlak kan lo nih lehzual theih nan, Setana hmanrua – Hlawhchhamna, Tuarna, tahna & rumna kaltlanga khawih harh kan ngai ţhin. Hei hi Davida chuan a hrechiang tawh khawp a, “I thuruatte ka zir theih nan, tihhrehawma ka lo awm kha ka tan a ţha a ni” a lo ti nghe nghe a nih kha (Sam 119:71). Fakna hla kan sak fo thin pawhin, “Mihring Siam that nan khawdur a ngai a ni” a lo ti a, sawifiah hran-pa a ngai tawh awm lo ve. Chuvangin, HLAWHCHHAM PHAWT HI HLAWHTLINNA a ni. 

“NEVER EVER GIVE UP BELIEVING IN YOURSELF.”

0 comments :

Popular Posts