Friday, March 6, 2015

RAM HRUAITU AUH-NAWMNAH HI A DIK EM???

1. THU KAMKEUNA
Ka post hmasa “Savawmin Mi 42 a Seh-hlum” tih-ah khân, Pathian ruat Hruaitu Auh-Nawmnah leh hmuhsit a ţhat loh-zia leh a hlauhawm-zia, chawp-leh-chilh-a an thih nghal thu kan sawi tawh a. Vawiinah thung chuan, Pathian ruat Hruaitu chu Pathian tirh ngeiin a Auh-Nawmnah thu leh chu Pathian ruat Hruaitu chuan ngawi reng a, lungawi taka a tuar thu kan ngaithla ve thung dawn a ni.

Bible hian thil engkim deuh-thaw mai nih-phung leh zia hi a sawi lang a. A chhânna leh a siamţhatna lam thlengin a ziak leh vek bawk a. Zawlnei Isaia chuan, “Lalpa thu-ah chuan zawng ula, kim lo pakhat mah a awm lovang a, kawppui nei lo pakhat mah a awm lovang” a lo ti daih tawh a ni (34:16). Chuvangin, Pathian ruat Hruaitu dinhmun pawh hian kawppui or side pahnih a nei a, Pathian ruat Hruaitute Hmuhsit leh Sawichhiat phal loh anga zirtirna a awm laiin, Hmuhsit leh Sawichhiat phal a nih dân a inziak ve leh tho bawk a ni.

2. “INDIRA GANDHI TLÂ MAWH SY”
Indira Gandhi Prime Minister a nih lai khân, Saihaah a lo zin a, Mara-mipui lo lawmtute chuan, “Indira Gandhi tlâ mawh sy” tiin an lo au rual dual dual a. Kawng kam velah-te pawh, an au hla chu ziakin (Poster) an târ nual bawk a. Aizawl lam aţanga a rawn hruaite zinga Pakhat kha an au hla chu an leh-tir a, Țawnglettu chuan, “Indira Gandhi tla rawhse” tiin an au a ni. An au-hla leh an Poster târ awmzia chu, “Indira Gandhi chu inthlan (election)-ah rêng rêng hian tla ngei ngei rawhse, tling tawh suh se” an tihna a ni e, tiin !!!

Indira Gandhi chuan mak a ti viau ni tur a ni. Saiha an thlen hnu chuan, Mara-ho zinga 1 chu a zawt ta a. Ani chuan, “Indira Gandhi dam reng rawhse” tihna a ni e, tiin a lo hrilhfiah ta a ni awm e!! Thil hriat fuh loh avangin, thil dik loh a sawi theih a, Hriatna a zim lutuk chuan, a inpal-hnawk theih viau bawk. A chungchânga “Duhsakna Au Aw” chu a ni lo zawng daihin hrilh mahsela Indira Gandhi hian a la nâ nghal ringawt mai lova, Thudik zawk leh thil dik zawk chhuina châng leh zawhna châng a hria hi a fing hle mai.

3. “SHIBOLETH” HAN TI TEH?
Mihringah chuan, Sawi tur sawi thiam lo, sawi loh tur sawi zawk a awm theih a. Țawngkam thiam leh lutuk a, engkim hre ber vek an awm leh bawk. Inti puitling over lutuk a, Upa cheta che an awm a, hetiang mi hi an ninawm. Puitling pui tawh, naupang chhe chêta che hi an ngei-awm leh-zual. Mahni nihna leh dinhmun leh thiamna a zir zela midangte zahder thiam te, midang lainat te, midang hrethiam te, midangte pheikhawk bun ve thiam te, midangte dinhmun-a indah thiam te hi ava pawimawh em!!!

Midangte dinhmun leh harsatna i hriatthiam pui loh chuan, engtikah mah mi ngaihsân leh ngaihsak i hlawh ngai lovang. Chaltlai tak taka midangte i ţawng-khum fo a nih chuan, miin an ţawngkhum ve che a nih pawhin i hnâr bâk i hmu lovang. In-sawifiah leh in-sawifihlim pawh tum la, i âwk thûk tial tial a ni mai. Chuvangin, i tihdân an zir thei a, i tihdânin an ti let ve thei che. He thu hi ava ţha êm, “Thil engkim miin in chunga an tih-a in duh tur ang apiang chu, mi chungah pawh ti ve rawh u” (Mt.7:12, Lk.6:31).

Bible-a kan hmuh angin, Ephraim-ho 42,000 zet an thih-phahna chhan kha “Shiboleth” tih an lam thiam loh vang a nih kha. Sawi tur sawi thiam lo, sawi loh tur sawi zawk ţhin, tih tur ti-thiam lo, tih loh zawk tur ti ţhin-te hi tihhlum vek tur ni ta se, tihhlum tur hi kan va tam dawn êm!!! (cf.Roreltu 12:6).

4. PATHIAN RUAT HRUAITU DIK TAK CHUAN…
 

4.1. SAWISEL & ÂNCHHELAWH A TÂWK ȚHIN
Sawisel tawk lo tur leh Ânchhe lawh dawng lo tur chuan Țhat-famkim a ngai a. Khawvela tungchhova piang zingah chuan ţha famkim chu an awm dawn si lo!!! Mihring chu tisual ţhin, bawhchhe ţhin, tlu ţhin kan ni. Kan tlûk tâk avanga kan tlûkna hmuna mu kumkhua tur erawhchu kan ni hauh leh si lo!!! Chuvangin, Thufing chuan, “Mifing chuan Fakna aiin Sawiselna a lawm zawk ţhin” a lo ti hial. Sawisel leh Sawichhiat i haw tlat a nih chuan Hma i sawn ngai dawn tawh lo tihna a ni.

Hei hi a chhan chu, Sawiselna chuan Fellohna leh Chaklohna (sin & weakness) a hmuh-chhuah-tir a, Hmasawnna kawngah a hruai ţhin vang a ni. Hei hi a hria a ni ang, Lal Davida pawh khân, Simeia ânchhelawhna kha a ngai hlu a, a haw duh rêng rêng lo a nih kha!!! (2Sam.16:5-13). Sawisel tlâk tawh loh, Sawisel tur pawh awm tawh lo khawpa tlachhia, Sawisel peihawm loh mihring nih hi a zahthlâk zawk. Miin an sawiselna che ţawngkam ila hriat chhung chuan lawm mai rawh. Nangmah-ah Beisei tur ala awm tihna a ni e. Church Reformer John Calvin-a khân, “Min sawiseltute hi kan Vantirhkohte an ni” a lo ti hial rêng a nih kha.

4.2. LUNGA VAWM A TÂWK ȚHIN
Theirah duh tak Thingkung chuan vawm a tawk thin. An vawm nachhan hi theirah an ei duh vang a ni. Thingkunga theirah ei tur chuan lawh emaw vawm-thlak emaw a ngai. Mahni Huan chhunga mi a nih loh emaw, a Thingkung ţona a rem loh viau chuan va lawn a, theirah va lawh chu a harsa a. Lunga vawm leh Sairawkherh-a perh-thlâk a awlsam thin.

Chhungte ni lo pawnlam mite tân chuan theirah tlân duh-te chuan an vawm-thlâk leh an perh-thlâk mai kha an tih tur dik tak a ni. Theirah ei thei turin an vawm-thlak a ngai a, Theirah vawm-thlak beisei avanga Thingkung an vawm avang khan Thingkung kha an hmusit lova, an ti-nawmnah hek lo. A rah an tlan duh vanga vawm an ni mai.

Miin Lunga min vawm duh tawh lova, min Auh-Nawmnah peih tawh lova, kan Fellohna leh Chaklohna-te pawh min hrilh duh tawh lova, kan hmaia Hnap-khir bet te tak ngial pawh min hrilh duh tawh lova, kan Zipper in-zip lo-te hial pawh min hrilh duh tawh loh hun a thleng a nih chuan, keimahni-ah ei tur theirah beisei tur a awm tawh lova, beisei tur kan awm tawh lo hrim hrim tihna a ni zawk ang.

4.3. MIHRING RILRU A HMANG NGAI LO
Lal Davida nun atanga kan Zir-chhuah pawimawh tak chu, miin kan chungchâng thu-ah, thil ţha emaw, thil chhia emaw an lo sawi pawhin, ngaihtuahna sen hmasak ţhin hi a pawimawhin a finthlâk hle. Pawng-paw zuam, pawng-paw huat bur emaw, pawng-paw thinrim emaw, pawng-paw ba-sa ngam ringawt hian thil pawi a khawih ţhin. Zawhfiah tur zawh fiah a, in-enfiah tur kan neih te in-enfiah a, zir tur kan neih te zir a, sawifiah tur kan neih chuan sawifiah hi a lo ţha ber fo.

“I Thinrim lai leh Harsatna i tawh lai hian i Nihna dik tak a lan chian êm avangin, Tunge i nih chiah tih hriat tumin miin an châng reng che” tih hi a dik fu a ni. Lalna leh thuneihna i chan laia i ţawngkam leh chetdân te, harsatna leh buaina i tawh a, i thinrim laia i ţawngkam leh che-zia te khân i nihna dik tak chu nangmah ngeiin i rawn pho-chhuak ţhin a ni.  

4.4. ÂNCHHELAWHTU LALPA TIRH A NIH A PAWM
Lal Davida kha, Simeia khân ânchhia a lawh a, hmusit takin thisen chhuah hmang leh Beliala (Setana) fapa tiin a auh-nawmnah a, lungte-in a vawm a ni (2Sam.16:5-13). Mahse, Lal Davida hian, Pathian thiltum leh remruat a hre tlat. A fellohna leh a sualna-te avangin Pathian tirh Simeia hian a hmusit a, ânchhia a lawh a, lungin a vawm a, vaivutte-in a theh tih a inhria a, Lalpa Zilhauna a ni tih a pawm hmiah. A ţawngkam chhuak leh Simeia chunga Thil ţha tak a tih-zui dân aţangin Davida hi a inhmu-chhuak chiang hle a, a nun pawh a insiam-ţha nghal ngei ang tih a lang (2Sam.19).

Mi tam tak chuan, harsatna kan tawh a, miten min diriam a, min hmuhsit a, ânchhia min lawh a, lunga min vawm a, min auh-nawmnah te hian mahni in-enlet na-châng kan hre lova, insiamţhat na-châng kan hre ţhin lo. Pathianin malsawmna leh thil ţha hmanga min koh-chhuah zawh tawh loh avang leh min siamţhat theih tawh loh avangin harsatna leh chhiatna hmangin min kova, min tlawh mêk a ni tih hriat-chhuah a hun tawh hle.

Fakna hla chuan, “Mihring siamţhat nân khawdur a ngai a ni” a ti a. Khawvel lama kan lawmna leh hlimna leh malsawm kan dawn-te hian kan nun siamţhat aiin, nawmchenna leh duhâmna lamah te, midangte hmuhsitna leh hnuaichhiahna hmunah-te min hruai zawk ţhin. Thuneihna te, In leh lo ţha te, sum leh pai hausakna te, ei leh in ţha leh hriselna-te pawh hi hman-sual theih leh Pathian min hlattirtu leh suala min hruaitu an ni thei tih a hriat chian avangin Israel fate kha Pathianin warning a pe mawlh mawlh a nih kha (Deut.8:11-20, 31:20, 1Lalte 21). 

5. DAM TUR CHUAN NÂ TUAR A NGAI
Lal Saulan, Israel fate Hnehna lawm au-hla “Saulan a sang sang a that, Davida’n a sing sing a that” an tih chu thudik tak a nih laiin a haw êm êm a, a nât pui tlat zu nia!! Davida huat phah nân a hmang zui hial lehnghal!!! Cancer nâtna tihlum thei tur chuan Chemo khai a ngai a. Chemo hian cancer zungzâm kha a zu that ţhin a. Chemo khai erawh hi chu mi tam takin an tlin lo ţhin. Mahse, Cancer nâtna aţanga dam an duh chuan, an nâtna that-theitu Chemo kha tlin lo chung chung pawha an khai luih a ngai ta ţhin a ni.

Tin, nâtna serious leh Cancer nâtna angah te hi chuan Nâchhawkna hniam (Paracetamol mai mai) pêkin awmzia a nei lo, a chhâwk mai mai thei tawh lo. Nâchhawkna chak chi a chiu leh Chemo vawi engemaw zât khai a ngai tawh ţhin. A Dam lo pawh khân a tuar hle ţhin a ni. A nâtna a nât dân leh a zual dân a zirin damdawi (tihdamna) pawh a sâng ve zel ţhin. Thil hote kan tihsual chuan, hote-in a sawi fel theih, thil serious deuh kan tihsual chuan serious deuhva sawi fel a ngai ve thung.

6. NGAIHTUAH-ZUI ATÂN
Thing rah duh apiangin vawm a tâwk duh bik. Thudik tak hre tur chuan hun a duh rei ţhin. Bel ri ring apiang hi a ruak a ni chawk. Sawiselna leh Sawichhiatna, Ânchhia leh Hmuhsitna ânka te hi hmasawn nân, harh nân, inhmuhchhuah nân hman a ngai. Sawisel tlâk tawh loh khawpa chhia nih a hlauhawm zawk. Sawiselna, Sawichhiatna, Lunga vawm, Vaivuta theh, Auh-Nawmnah te hi hmang ţangkai ang che.

Ram hruaitu emaw Sakhaw Hruaitu emaw Auh-Nawmnah hi a Dik a, a Dik lo thei bawk. Auh-Nawmnah ngai khawp khawpa awm loh chuan, an Au-Nawmnah kher lo mai thei. Kawng lehlamah chuan, Auh-Nawmnah ngaia awm kher lo pawh, Miin an lo Au-Nawmnah ve mai thei bawk. Auh-Nawmnah hi a Dik leh Dik loh lam aiin, Ka thiltih hi a dik em? Thil ţha leh thil dik ka ti em? Insiamţhat nân ka hmang em? tih hi a pawimawh ber.

0 comments :

Popular Posts