Monday, March 23, 2015

SETANA THLÊMNA THANG HLAUHAWM BER 3-TE

1. THU-HAWNNA
Kan Hmêlma-pa Setana hian Ringtute min Thlêmna leh min Hnehna Hmanrua tam tak a nei a. Chung zingah chuan a Hlauhawm zual 3 a awm a. He Thlêmna 3-te hi Kristian zingah Pitar-putar, Nula-tlangval, Ramhruaitute leh Rawngbawltu tê ber aţanga Hotu-ber thlenga kan tawh ţhin an ni a, Hneh pawh an hâr êm êm a ni. Tirhkoh Paulan, “Chuvangin, dinga inring chu fimkhur rawhse, chutilochuan a tlu dah ang e,” (1Kor.10:12) a lo ti hial a. He Thlêmna-ah hian tlu lo turin inringin, i fimkhur ang u.

2.1. WEALTH (RO-SUM)

Sum leh pai, ro-sum, hausakna duh leh ît avangin mi tam tak sualah an tlû a. Pathian Rawngbawltu fel tak tak-te pawh hman tlak lohvah an chhuak ţhin. Sum hmang hian Setana’n Ram Hruaitu ţha tak tak leh Pathian Rawngbawltu tam tak a lei tawh a, a lei mêk zel a ni. ‘Sum tel lovin rawng kan bawl thei lova, hna kan thawk thei lova, kan nung thei lo’ tih hi thudik a ni. Mahse, Sum leh Dinhmun ţha te hi kan ngaih pawimawh ber a ni tur a ni lova, Sum leh Dinhmun ţha leh sâng hian kan thlarau nun leh rawngbawlna a hma-khalh-in, a tichhe tur a ni lo.

Kan Mizo Ordained Reverend/Pastor-te zingah pawh, Rev.C.L.Rema (IAS) leh Rev. Lalbiaksanga Chinzah (College Principal), etc. te chuan, an Hlawh sâng tak leh Dinhmun ţha tak kalsanin, Krista an hmangaihna avangin retheihna leh dinhmun hniam zawk an thlang a. Hetiang mi duhawm Zoram Kohhran-in kan la nei hi a ropuiin, an entawn-tlâk tak meuh meuh a ni. Tirhkoh Paula chuan, Ringtute kan fimkhur a ţul zia hria-in, Vaukhanna chiang leh khauh tak min pe a, “Tangka sum ngainat hi sual tinrêng bul a ni si a; chu chu ţhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a” tiin min lo hrilh-lawk diam tawh a ni (1Tim.6:10).


2.2. POWER (NIHNA/LÂR DUHNA)
Miin Nihna (position) emaw, Lâr (popularity) emaw an duh tawh chuan eng thil tih mah an hreh lo. Miţha leh mifel-te tih-chhiat te, dik lo taka midang dâwta puh (false accusations) te, Pawisa hmanga tute emaw rawih a, mi chunga kut-thlâk te, mi Zalenna lei te, Hun-pum Rawngbawlna tlâwmsana dinhmun ţha um leh Setana biak te thlengin an ti duh mai ţhin. He thil hi khawvel mite zingah te, Politics huangah te chauh a thleng lova, Pathian rawngbawltu duhawm tak tak-te zingah pawh a thleng mêk a ni. Setana ngei pawh kha Nihna (power/position) a duh avangin Van aţanga paithlâk a nih kha (Isaia 14:12-17).

U.S President, Lyndon B. Johnson (1963-1969) khân, Rev. Billy Graham chu a Cabinet Member atân a sawm a, a ai awh chho turin a beisei thu a hrilh bawk a. Mahse, Rev. Graham hian a hnial fithla a ni. U.S President Richard M. Nixon (1969-1974) pawh khân, Rev. Graham chu Ambassador atân a sawm leh a. Mahse, Rev. Graham chuan a hnial leh a ni. Kum 1973 khân, President Nixon hi WATERGATE SCANDAL avangin a mualpho hle a, Billy Graham chuan nâ takin a zilhau nghe nghe a ni.

Cabinet Member & Ambassador hna sâng tak a zawm duhloh chhan hi Rev. Graham chuan, “Lei leh Vana Lalber Hna thawh tluka hlu leh sâng a awm hleinem!” tiin a chhang, an ti. Keini ang rinnaa chak lo chu, Sorkar hna sâng thawk turin min han sawm hlauh mai sela chuan, i-he lovin “Rawngbawlna zau zawk a ni alawm” tiin, tlâng-rel-thang pawh dawn lovin ka zawm duh nghal mai ka in-ring a ni.

2.3. WOMEN (PLEASURE/SEX)
Achunga târlan bâkah khian, Setan hian Tisa nawmchenna leh Hmeichhiat-mipatna (pleasure & sex) hmangin Rawngbawltu duhawm tak tak a suat mêk a. Kristian Ţhalai bâkah, Nu leh pa te pawh an bâng lo. Pastor, Evangelist, Missionary leh Rawngbawltu ropui tak tak-te pawh he Hmanraw chimawm tak hmang hian Setana hian a hneh fo ţhin. India rama Missionary Society lian leh hlun tak, Indian Evangelical Mission Dintu leh Hruaitu Mipat-hmeichhiatnaa a tlûk thu-te khân India rama Kristian-te rilru a tinâ-in, kan lung a ti chhe ngawih ngawih a nih kha.

He Setana Thang hlauhawm leh chimawm taka mi a âwh tawh chuan, an tâlchhuak mai mai tawh ngai lo. He Mipat-hmeichhiatna Sual hi Pathian Huat ber-te zinga mi a nih avangin a Hrêmna pawh a nâ hle a nih kha (1Kor.10:1-33). Khawvela Ramhruaitu ropui, U.S President hlui Bill Clinton chanchin, a Secretary nen-a Mualpho-thlâk taka an chetsual chungchâng pawh kan la hre rêng awm e. Rawngbawltu i ni emaw, Khawvel-mi i ni emaw, Sex chungchângah hian Fimkhur hle ang che.

3. NGAIHTUAH ZUI ATÂN…
Achunga kan sawi tâk “Setana Thlêmna Thang Hlauhawm Ber 3-Te” aţanga Filhlim lo Rawngbawltu i nih chuan, Pathianin a Hmang tak tak thei lovang che, tih hre reng ang che. Hei hi a Chhan ber chu PATHIANIN AMA TA (RAWNGBAWLTU DIK TAK) CHU A HRE KIAU A, AMA TA NI LO, SUAL KALSAN LO, SETANA THANGA LA ÂWK RENG MIHRING CHU A RAWNG BAWL TUR LEH A ROPUI NÂN A HMANG TAK TAK THEI LO A NI (2Tim.2:19, 26).

Tirhkoh Paula’n a sawi chiang viau mai, “Mi ţhenkhat sual chu a langsâr a, an tuar nghal bawk ţhin, ţhenkhat erawh chu a lang lawk lem lo va. Chutiang bawkin thil ţha tih lang nghal a awm a, lang nghal rih lo mah se thup hlen theih a ni lo” tiin (1Tim.5:24-25). Rawngbawltu ţhenkhat Sualna chu, Ni 2/1 aţanga Kum 2/1 chhungah emaw a lang chhuak mai ţhin a, a rah (consequences) pawh a lang nghal thuai ţhin. Rawngbawltu ţhenkhat-te Sualna erawhchu a lang lawk lem lo. An Rawngbawlnaah hming ţha takin kum rei tak an kal a. Mahse, a rûka an Sualna-te chu thup-hlen theih a ni lo, a lang-chhuak ngei ngei ţhin.

Chuvangin, tum rêng vang emaw, duh rêng vang emaw ni lova suala i lo tlu palh a nih chuan, Pathian hnenah Sim-in, ti-nawn leh tawh miah lo turin kir thuai ang che. TUM RÊNG VANG LEH DUH RÊNG VANG A, HRE RÊNG CHUNGA I TISUAL LUI FO (INTENTIONALLY, WILLINGLY & KNOWINGLY COMMITTED SIN HABITUALLY) A NIH NGAT CHUAN, I THLARAU NUN A NGAIHTUAHAWM HLE TIHNA A NI. Rawngbawltu ni siin, hetianga Pathian laka Sual lian tak i khawih a nih chuan, Nangmah chauh i chhe dawn lova, Midangte pawh i ti-chhe tel dawn tih i hre reng dawn nia (1Kor.10:1-33, 2Kor.4:2, 6:3, 1John.3:1-24).

0 comments :

Popular Posts