Wednesday, March 25, 2015

SETANA'N EVI A THLÊM DÂN KHA A MAK VIAU ELO???

1. A STYLE ALA NGAI RENG…
Thlêmnaa a tlûk avangin Evi kha dêm ngawt suh! Setana khân kan thlâhtute kha awmze nei takin a lo thlêm a, Evi kha hmeichhia zawk mah nise, Setana thlêmna îtawm tak te kha an nupa tân awmzia nei dawn êm-a a hriat avangin hnar phal lovin a zawm ta mai ni zawkin a lang. Thlêmna satliah-a tlu mai a ni lo tih hre hmasa ila. Setana hian kan Lalpa Isua ngei pawh kha Evi a thlêm dân ang style tho khân a lo thlêm ve leh a nih kha (cf. Matt.4:1-11).


Bible chuan, “Tin, rûl chuan hmeichhe hnênah chuan, "Thi teh suh e: in ei nî apang chuan in mit a lo vâr ang a, a chhia leh ţha hriain Pathian ang in lo ni dâwn tih Pathianin a hre reng a nih chu," a ti a. Tichuan hmeichhia chuan thing rah chu ei mi a ni tih leh, mit la tak a ni tih leh, mi tifing tûrin thing rah îtawm tak a ni tih a hriat chuan thing rah ţhenkhat chu a lo va, a ei ta a; tin, a pasal a pe ve a, ani pawhin a ei ve ta a” (Gen.3:4-6) tiin a ziak a. Keini pawh hi, kha a style pangngai ûn tak mai hmang bawkin Setana hian min thlêm leh mêk a ni, fimkhurin thlêmnaa kan luh lohna turin i ţang sauh sauh teh ang u.

2.1. TAKSA MAMAWH THIL HMANGIN…
Setana’n min thlêmthlûk awlsamna ber pakhat chu Taksa mamawh, ei tur leh silh leh fen hmangin a ni, “EI MI A NI leh MIT LA TAK” (good for food & pleasant to the eyes) kha Evi titlutu a nih kha (Gen.3:6, Mat.4:2-4). Taksa mamawh, ei leh in, silh leh fen-te hi min titlutu tam ber te an ni châwk. Ţhalaite ngat phei chu min titlutu lian ber a ni hial awm e. Ei ngai loh ei te, hâk ngai loh hâk te, mi neih loh ang neih te hi mihring kan nih chhunga kan châk ber te an ni fo ţhin.



Tunlaia chanchin kan hriat lungchhiat-thlâk tak, Tleirawltê (Sorkar hnathawk Nutling pawh an tel a ni awm e) ARÛKA INZUAR (Secret Service/Secret Call Girl) an tih-te khân, Taksa mamawh - Incheina, Electronic Gadgets (Cellphone), Ei leh In & Pocket money an duh avangin an Taksa pawh ui zo lovin an inzuar a ni tih thu-te kan hriat kha!!!
 

Tunlai khawvela hri hlauhawm tak “CORRUPTION” (hlêmhletna, eirûkna, etc.) lama sawi neuh neuh kai, an Hlawh phu lova In leh lo leh thil hlu tak tak nei thei-te hi thlêmnaa an tlûk chhan leh an rilru tur awm chu kan hre thei tawh mai awm e.

Aizawla Officer lian tak 1 ka kawm chuan hetiang hian a sawi a, “Kan nupa-in hlawh kan nei ve nâ a. Kan fate 2 phaia College kal kan chawm a, Loan la-in chenna tur In kan din thei hrâm a, nuamsa taka khawsak zui chu a har khawp mai” tiin. He Officer hi Kohhranah chuan Upa pawh a ni pha lo. A Hlawh aţanga a sak Concrete building chhawng 3 an nei a, Lirthei an nei a, chu zawng chu a ni.

Zawlnei Mika sawi angin, “MIIN DIK TAKA A TIH” chuan Babel in sâng sak te, thil ropui leh ţha tak tak neih ţen ţun a, nuamsa taka khawsak zui chu a har hle ang tih chu thil chiang sa a ni (Mika 6:8). He thil hi Zoram dung leh vângah han hawi vel ila, Chhui thui êm êm pawh ngai lem lovin, Sum thianghlim aţanga lei leh sak a nih leh nih loh chu a lang-chiang nghal vek mai.

Lal Isua ngei pawh a ril a ţâm khân ei tur hmang bawkin Setana’n a rawn thlêm a, “Tin, ni sawmli leh zan sawmli a nghei hnu-in a ril a lo ţam ta a. Tin, Thlêmtu chu a lo kal a, a hnenah, "Pathian Fapa i nih chuan heng lung hi chhanga chang turin thu pe rawh," a ti a” tiin (Mt.4:3). Taksa tâna mamawh leh ţul hmanga Setana thlêmna kan tawh ţhin-te hi Lal Isua leh Evi lo tawn tawh hnu a ni. Chuvangin, Lal Isua’n ‘Silh leh fen aiin nunna a hlu zawk’ a lo tih hialna chhan kha hei hi a ni (Mt.6:24-34).

2.2. MIMAL HAMŢHATNA TUR HMANGIN…
Setana thlêmna 2-na chu Mimal tisa leh thlarauva ţhatna tur leh hlâwkna tur lam aţangin a ni thung. Evi khân “THI THEI LO” (immortal) nih kha a châk hle a, Setana’n “THI TEH SUH E” tia a bumna kha a tlûkpui chhan pakhat a ni (Gen.3:4). An nupaa chatuana an nun theih kha a thlahlel ngawih ngawih a ni. Lal Isua pawhin hetiang chiah thlêmna hi a lo tâwk veleh bawk a. Biak In chhip aţanga a tlâk a ‘TIHNÂT-A A AWM LOH TUR’ thu kha Setana tawk-tarh a ni (Mt.4:5-7).


Kan mimal sahimna tur te, hlâwkna tur leh ţhatna tur kan ngaihtuah luat avangin thlarau lamah malsawmna kan dawng thei lova, kan ţhang thei ţhin lo. Mahni in-hmangaihna leh mahni hmasialna-in kan khat a, midangte ţhatna tur kan ngaihtuah chang lova, he nun hian nasa takin thlarau lam nun-ah min tichhia-in min tiţhuanawp ţhin a ni.

Thlarau lam thilah hlei hlei hian mahni hma kan sial lutuk chuan Pathian a ropui thei lova, Pathian hi kan ropui khalh zawk fo ţhin. Thufingin, “Mihring hmêlma chu mahni a ni” a tih hi a dik ngawt mai. Fakna Hla chuan, “ROPUIA A LAN HUN APIANGAH ROPUIIN KAN LANG VE ANG” a ti a. Lal Isua ropuina tur leh Pathian chawimawia a awm theihna tur hi kan tum ber nise, Ama ropuina a lan hun apiangah keini pawh ropui zingah kan tel ve dawn hi a lo ni zawk a ni. Chuvangin, Bible chuan, “Mahni ta ta mai en lovin, midang ta pawh en ţheuh zawk rawh u” (Phil.2:4) a ti a ni.

2.3. DINHMUN ȚHA DUHNA HMANGIN…
Thlêmna kawng 3-na chu, Thiltihtheihna leh Dinhmun ţha neih/chan duhna hi a ni. Thiltithei ber, dinhmun ţha ber, hausa ber, ropui ber, lâr ber nih duhna kan neih hi Evi pawhin a dang zo ngang lo a ni. Setana’n “PATHIAN ANG IN LO NI DAWN” tia a thlêmna kha Evi khân a do zo lova, Pathian anga thiltihtheihna leh ropuina neih ve, Pathian dinhmun-a din ve kha a châk ngawih ngawih a ni (Gen.3:5). Lalna te, thuneihna te, ropuina te, hausakna-te hi khawvel miten an awh ber leh an zawn ber chu a ni.


Lal Isua’n Setana thlêmna a tawhna-ah pawh khân, Khawvel ram zawng zawng leh a ropuina chu a entir hnu-ah, KHAWVEL RAM ZAWNG ZAWNG CHUNGA THUNEIHNA kha Setana’n pêk a tiam a nih kha (Mat.4:8-9).
 

Lal Isua tân do zawh a hâr dân tur hi kan chhut-thiam mai awm e. Lal Isua’n khawvel ram zawng zawng leh a ropuina zawng zawng a neih vek a, a thuhnuaia an awm vek chuan, Kross-a mualpho taka a thih a ngai dawn lova, awlsam takin a ta an ni vek mai dawn a ni!!! Mahse, Pa Pathianin leilung piantirh ata a thiltum leh ruahman tawh kha Lei leh Van Lal Isua Krista khân pen bosan a tum lova, pum-pelh zawn a tum lova, kawng nuam leh awlsam pawh a thlang duh lo, a hnawl hmiah mai a nih kha!!

Bible Scholar pakhat chuan, “Setana’n Kristian-te a hnehna hmanraw ropui ber ber 3-te chu Sum, Thiltihtheihna leh Hmeichhia (Money, Power and Woman) te hi an ni,” a ti thlawt mai!!! He thu hi ava dik tehlûl êm!!! A chunga Setana hmanraw hmang khian Pathian mi, rawngbawltu duhawm tak tak leh Thuhriltu ropui leh lâr tak tak-te pawh tihchhiatin an lo awm tawh!!

Ţhenkhat chu Sum ngainatna (love of money)-in a tihchhiat an awm a, ţhenkhat chu Mipat-hmeichhiatna (sexual immorality)-in a tihchhiat an awm a, ţhenkhat chu Nihna, Dinhmun ţha, Lârna duhna leh Ropui duhna (power, status & popularity)-in a tihchhiat an awm bawk. Setana hmanrua hi a chimawmin, ava huatthlala-awm tehlul êm!!

3. NGAIHTUAH ZUI ATÂN…
Hmân deuhva Aizawla Setana betuten ‘SETANA AN BIAKNA CHHAN’ pawh kha Chhan 3 a awm a, (1). Hausak, (2). Lâr, (3). Exam-naa pass ţhat, an duh a nih kha!!! Ngaihtuahna seng thui deuh ta ila, Engah nge Chhungkuaa pafa leh unau-te hial Court-ah an inkhin a, Hmangaih taka innei Nupa te meuh nâ taka an intihbuai a, thin ţhawng dawt khawp tualthahna hial-te a thlen ţhin?? tiin zawt ta ila, a chunga kan sawi tâk-te khi a chhan zingah a tel ngei ngei ang tih a chiang a ni.


Taksa mamawh thil ngaih pawimawh luat vang emaw, Mahni mimal hamţhatna tur chauh ngaihtuah vang emaw, Dinmun ţha zawk (nihna & dinhmun ţha) duh vang emaw, Tangka (sum, ram in leh lo) ît vang emaw, Midang aia ropui zawk leh lâr zawk nih duh vang emaw-in Ringtu inti-te leh Rawngbawltu duhawm tak tak-te hi thlêmnaah hian kan tlu ţhin a ni.

Pathian min hruai dân ang ni lova, MAHNI HMASIALNA AVANGA tisa leh thlarau lam thila duhâm tak leh dik lo taka hmasawn kan tum avang leh midangte leh-pelh kan tum ţhin avangin Evi ang khân thlêmnaah kan tlu ţhin a ni.

Setana’n kan thlâhtu bul Evi a thlêm dân kha a mak lova, a danglam lova, a style kha ala thlâk lo tih a lang chiang hle. Chuvangin, Setana min thlêmna lakah hian i inveng fimkhur ţheuh ang u.

1 comments :

Hnam Sakhua said...

A hranpain setana hi a awm meuh em mi le.

Popular Posts