Wednesday, April 1, 2015

BIBLE KAN HRILHFIAH DÂN HI A DIK LO ELO??? (A Pawimawh Lutuk. Ulûk Takin Chhiar-chhuak Hrâm Rawh Aw)

1. THU KAMKEUNA
Bible hi mahni rilrêm zâwng leh kan awm dân milh (khawsak/nungchang support) tura kan hrilhfiah a, kan sawi-rêm a, kan fawmkhâwm châng a tam hle. Hei hian, Bible Hrilhfiah dân dik tawk lo leh chiang tawk lo a hring chhuak a. Kohhran leh ringtute kan buai phah ţhin. Zu ngaina mi chuan, “Bible-in Zu a sawichhe lo. Lal Isua pawhin Zu (wine) a ti-pung tho alawm” tiin, thudik chanve hmangin, mahni dinhmun leh thiltih milh leh support turin, mahni rilrêm zawngin Pathian thu an hrilhfiah ţhin. Bible-in Zu chanchin a sawi dân leh a Sawina hmuna mite dinhmun (context) kha Zir a, Hriat chian phawt hnu-a mahni tâna hman (apply) chi a ni zawkin alang.

Zoram-a Thlarau Thianghlim Hnathawh or Harhna a thlen apianga, kan sawi chhuah ve ziah ţhin pakhat chu, “THLARAU THIANGHLIM SAWICHHIAT” chungchâng hi a ni (Mat.12:32, Luka 12:10). Bible-in a sawi tum man silovin, Harhna leh Thlarau Thianghlim hnathawh a thlenna apiangah, “THLARAU THIANGHLIM SAWISÊL APIANG CHU… NGAIHDAM AN NI LOVANG” tih chu intihţhaih nân kan hmang a, a awmze dik tak hre hawt lovin, a hman apiangin kan sawi thla-zen mai niin alang.


Bible-a inziak tho, Hmêlmate chungchânga Pathian Thupek leh Thilthleng, Hmêlmate chu Tihlum vek tura Thupek te, Thah chimih vek an nih chungchâng (cf. Jos.11:11-12, Rorel.1:17, 1Sam.15) te hi kan ngaihthah leh lawi si??? Matthaia 7:5-ah phei chuan, “I mitin... I kutin a tih-tluk che chuan, kher chhuak la,,, tan la paih daih rawh” tih te a awm a. Ngaih châka Nula/hmeichhia a melh avanga a mit kher-chhuak ta emaw, Thil sual a tih avanga a thilsual tihna kut tan ta emaw chanchin hriat tur lah a awm si lo!!! Heng Bible kan Hrilfiah dân-te hi kan ti-dik nge, kan ti-dik lo??? tih hi ngaihtuah tham a tling.

2. BIBLE HI ALA RINTLÂK RENG EM??
BIBLE hi kan rin Pathian Chanchin leh kan Thurin innghahna, “RINNA LEH THILTIH TEHNA DIK LO THEI LO” a ni a. Sakhaw dang betute Lehkhabu thianghlim-te nên chuan a in-ang lo. A chung-nung larh a, belh-chian a dâwl a, chhui tham leh zir tham a tling. Khawvela Sakhaw Lehkhabu zingah hian (Kristian-te Bible tih lovah chuan) Hindu leh Islam sakhaw Lehkhabu-te hi rintlâk deuh leh ngaihhlut deuh te an ni.

Mahse, Hindu sakhaw Lehkhabu thianghlim BHAGAVAD-GITA pawh hi a hlui viau tawh na a, a chiang lo. Belhchian a dâwl lova, zirchian a dâwl lo. Thlarau lam leh tisa lama Hmasawnna atâna hman tur a awm vak lo tlat!!! Islam sakhaw Lehkhabu thianghlim QURAN pawh hi a Ziaktu Mohameda’n a ziakna ala rei lova, Kristian-te Bible entawn-a ziak nia rin a ni a, a inzul êm êm a, a aia hmasa zawk Bible a lo awm tawh avangin chhuichian leh belhchian a dâwl lo nghal ringawt mai bawk.

Bible erawhchu, khawvela Sakhaw Lehkhabu zawng zawng zinga hlui ber a ni a. Mosia’n Pathian Thupêka a ziak ţan lai kha, B.C. 1400 bawr vêl anga chhût a ni a, a Hnuhnung ber Thupuan-chhuah Bu hi AD 65-95 vêla ziak anga chhût a ni a, kum 1500 chhunga ziak a ni (OT- AD 90 Jamnia & NT- AD 397 Carthage). Bible Ziaktu hi mi 40 vêl an awm a. Hun hrang hrang, dinhmun hrang hrang, mi hrang hrang (Mosia-Politician, Solomona-Lal, Joshua-Army General, Daniel-Cabinet Minister, Amosa-Ranrualvêngtu, Paula-Theologian/Pharisai, Petera-Sangha mantu, Luka/Tirhkohte-Medical Doctor, etc.)-in an ziak na a, an Thuziak-te hi pakhat mah a inkalh lova, an inţanpui-tawn vek.

Kan Bible (Pathian Thu) hi chutianga hlu leh ropui a nih avangin, ulûk tak leh fimkhur taka Hrilhfiah a ngai a. A nih tur ang taka Bible Hrilhfiah leh Sawifiah leh Hman (rightly interpreting & applying the word of Truth) hi “BIBLICAL HERMENEUTICS” Pathian Thu Hrilhfiah Dân Dik kan tih chu a ni (2Tim.2:15).

3. BIBLE HRILHFIAH DÂN DIK LO A NI THEI ANG EM???
Ka Thiltawn mak tak aţangin Entirna la chhuak ta ila. Țumkhat chu, September 20, 1998 (Sunday) tlai dâr 3 pm khân, Nu 1 (ka hmêlhriat ngai pawh ni lo) hian, Khawlaiah, “JOSEFA I NIH KHA, JOSEFA I NIH KHA...” min ti ringawt mai a!!! Hemi hnu hian Rawngbawltu pakhatin Josefa ka nih thu min hrilhfiah leh mawlh mawlh bawk a!!! Chutianga mi 2 lai mai, ka hmêlhriat pawh ni lêm lovin “Josefa i ni” min tih min tih tâkah chuan, Bible-a Josefa chanchin ka zir tam phah a, Lehkhabu-a Chhuah tham ka nei hial!! Mahse, Bible-a Josefa chanchin leh a thiltawn dân ngun takin ka chhui a, min convince thei tlat lo. Ka chunga thilthleng leh ka thiltawn-te ka ngaihtuah let a, Josefa nên chuan kan in-ang lo lutuk tlatin ka hria a ni.

Thil mak tak mai chu, Kum 2010 khân ka Rawngbawlna (Fulltime Job) atangin bân ka ni a, Kum 2011-ah chuan, Pi leh pute aţanga kan awmna (lawina), kan ngainat êm êm Mara Kohhran (ECM)-in January 8 & 15, 2011 khân Kohhran aţangin min Hnawtchhuak (Excommunicate) a, Pastor leh Kohhran-ten Police-ah min man-tir a, Jail-ah ka tâng ta hial a!!! Circumstantial Evidence-in Thiamloh min chantir nghe nghe!!! Pathian min hruai dân kha a mak ngei mai, ka Insawifiah (defence) thei lova, Khin-let (appeal) pawh Lalpa’n rem a ti tlat lo!!! Kan ngawi a, kan tuar tawp mai a ni!!! Min Hnawhchhuah hnu hian, Kum 1 chhung zet Kohhran nei lova kan awm hnu-ah, Loh theih loh avangin December 23, 2011 khân Presbyterian Kohhran-ah luh kan dil a, min lo khawngaih a, kan lut ta!!! (((Ka Thiltawn dân kimchang hi Pa-u Fachhai Lehkhabu, “SUALA PUHTE JAIL-AH, SAKHAW PUITHIAM-TE THILTIH MAK” tih-ah a awm a, a chhiar-te chuan thil awmzia in hre thei ang))). 

Kum 2010-2011 chhunga Ka Thiltawn aţang khian, Kum 1998 daih tawh-a “JOSEFA I NI, JOSEFA I NI” min ti ringawttu Thusawi kha ka rilru-ah a rawn thar leh ţhin!!! Mahse, Josefa chu ka niin ka inhre tlat silo. A chhan chu, tuna ka awmna leh dinhmun aţang hian min Hnawtchhuaktute tân tihtheih engmah ka nei tawh tlat lo. Kan inkârah lei-khi thûk leh zau tak a awm tawh a, kan in-mihran tawh a, kan inhlat tawh lutuk, kan inţhen-hlen vang vang tawh. Chuvangin, Josefa nên kan in-ang lo, Josefa ka ni lo, ka ti ve tlat. Tin, Keima duhthu ngeiin, ka duhthlanna ngeiin Lehkha-in, Ziak ngatin December 23, 2011 khân Presbyterian Kohhran-a luh kha ka dil a ni.

Josefa kha chu, ama duhthlanna tel miah lovin, a dil ni miah lovin Median-ho hnenah khân a Unauten an hralh a. Khuarkurum aţanga la-chhuak a, Median-ho hnena hralh turin a U-te kha a dil lo hrim hrim a, duh a thlang miah lova, a ngen hauh lo bawk. Median-ho khân Aiguptaah khân an hralh-chhawng leh a. Tin, Aiguptaa kal leh Roreltu-a awm kha Josefa khân Pharaoah hnênah a dil lova, a ngen lo hrim hrim bawk. A duhthlanna leh ngenna emaw (decision & request) tellovin Aiguptaah khân hruai (hralh) a ni a, Aigupta Roreltu-ah khân ruat a ni (Gen.37-50). Chuvangin, JOSEFA CHU A DUHTHLANNA TEL LO LEH HMANG HAUH LOVA PATHIANIN AIGUPTAA A HRUAI LEH RORELTUA A RUAT A NI. Kei erawhchu, Keima Duhthlanna ngeia Presbyterian-a lut ka nih avangin Josefa nen-a in-Tehkhin tur chi-ah ka inruat lo.

Tin, a hunlai dinhmun (a Unaute thiltih duh dân & Pharaoah Lalna leh thuneihna) ngaihtuah leh chhût hian, Josefa tân Aigupta lama kal dil emaw, Aigupta Roreltu-a awm tura dil chi leh ngen chi a ni lo hrim hrim a, a duhthlan theihna pawh a ni lova, Josefa hian sawi theih leh tih-theih engmah a nei lo tih a chiang hle bawk. Hei hi amah Josefa ţawngkam aţangin a chiang khawp mai, “Chutichuan, heta mi kaltîrtu hi nangni in ni lo va, Pathian a ni zâwk e: Ani chuan Pharaoa paah leh a chhûngte zawng zawng hotuah leh Aigupta ram zawng zawng rorêltuah mi siam ta a” tiin (Gen.45:8).  

4. BIBLE HRILHFIAH DÂN DIK CHU ENGTIN NGE???
Pathian Thu hi Fimkhur taka kan Hrilhfiah a ngai a. Chutilochuan, Thudik chanve (interpretes only half-truth) hmangin kan hrilhfiah palh thei a, a Inbuk-tâwk lovin (interpretes with im-balance) kan hrilhfiah hlauh thei a, Dik lo bak-sakin (interpretes wrongly) kan hrilhfiah daih thei bawk, tih hi kan hriat reng a ţul. Chuvangin, Pathian Thu kan Hrilhfiah dawn chuan, heng a hnuaia 3 (Text, Context & Application)-te hi kan hre rêng tur a ni. Hei hi “BIBLICAL HERMEUTICS” an ti a. Hetianga Bible hi kan Hrilhfiah chuan Kalsualna leh Hriatsualna lakah kan Fihlim zawk ngeiin a rinawm a ni:–

4.1. TEXT:
Bible Original ţawngkam leh awmzia leh a sawi tum dik tak hriat hi a pawimawh hle. Bible-a ţawngkam tam tak hi mahni ţawng ţheuhva kan lehlin hnu hian chiang tawk lo a tam hle. Entirnân, “HMANGAIHNA” chungchângah, Mizo ţawngah chuan, ţawngkam 2 – “hmangaih” leh “ngaina” tih kan nei a (cf. John 21:15-20, Thup.2:4, etc.). 

Kan hriat angin, Greek ţawng (Original Text)-ah chuan, ţawngkam 4 an nei a – (1). AGAPE (Selfless/Unconditional Love), 
(2). PHILIA (Friend’s love), 
(3). STORGE (Family/Parental love), 
(4). EROS (Erotic/Emotional love), te an ni. 

Tichuan, Greek ţawngah chuan, “Hmangaihna ţawngkam” a hman a zirin, Eng-ang hmangaihna nge? Tu nên-a an inkâr nge? Eng-anga nasa nge? tih te thlengin a hriat theih nghal vek a ni. Chuvangin, a Original Text-in a sawi tum hriat-chian hi a ţul êm êm a, Pathian Thu Hriat-fiahna leh Hrilhfiahna kawngah nasa takin min pui thei a, Kalsualna lakah pawh min veng thei a ni. 

4.2. CONTEXT:
Bible ziak hunlaia thil awmdân leh dinhmun chiang taka hriat a pawimawh leh bawk. Entirnân, Lal Isua’n “Mihring hi Chhang chauhvin an nung lo” (Mat.4:3-4) a tih hi kan rama Chhang (bread & cakes) hi a sawi tum a ni lo. Keini chuan Chhang hi Chaw-ah kan ring lo. Judate erawhchuan Chhang hi chaw-ah an ring a, heta “CHHANG” a tih hi Judate tân chuan “Chaw” a ni. Mizo context (dinhmun) aţang chuan, “Mihring hi Chaw chauhvin an nung lo” tia chhiar leh ngaihruat a ngai.

Tin, ANŢAM CHI chungchâng tehkhinna a sawi leh a (Mat.12:31, Mk.4:31, Lk.13:19). Anţam chi chu leia chi zawng zawnga tê ber a ni a, a lo ţo chuan thing a lo ni a, chunglêng Sava te a zârah te an riak tih kan hmu a. Hetah pawh hian, Isarel rama Anţam leh Mizorama Anţam chu a in-ang lo hle tih kan hriat a ngai leh bawk. Keini Anţam chu a sâng ber pawl pawh khûp chen lek an ni a, thing a ni pha lo hrim hrim bawk. Israel rama Anţam thung chu, pil leh ban aia sâng vek an ni a, Sava-te pawhin riah nân an hmang ţhin a ni. Chuvangin, Bible Context hriat chian loh chuan Pathian Thu Hrilhfiah hi fimkhur hle a ngai tih a lang chiang lehzual a ni.

4.3. APPLICATION:
Bible (bu/bung/châng/thumal) hian ziak-chhan, ziak tum leh thuchâh (purpose & message) hrang hrang a nei a, chu chu hriat-thiam a ngai hle bawk. A ngial-a-ngana hman tur leh pawm tur chi a awm a, hei hi hriat a ţul. Ringtu nun atâna (thlarau lama) entir nei-te a awm leh a, hei hi hriat a ţul bawk. Judate tân bîka ziak a awm a, hriat hran a ţul leh a. Gentile-te tân bika ziak a awm leh a, hriat hran a ţul bawk. Mi zawng zawng huap (mitin tâna hman theih) chi a awm hrang leh a, hei pawh hi hriat chian a ngai hle bawk.

Bible-a Serhtan tura Thupek kan hmuh-te rêng rêng hi Judate tân bik a ni. Hemi chungchâng hi Jerusalem Inkhawmpui khân chiang takin a sawifiah a nih kha (Tirh.15). Tin, Mipa Sam sei chungchâng leh, Inkhawmnaa Hmeichhe Lu-khuh hi Judate (Korinth khuaa Rom/Greek culture hnuaia awm-te) tân bika fuihna a ni (1Kor.11:1-16). Judate zingah chuan, Hmeichhia-in, Vantlâng zinga an chhuah-in an Lu an khuh ţhin. Tin, Kum zabi 1-na lai vêlah hian Judate bâkah, Rom leh Greek mite (Greco-Roman) pawhin, Hmeichhe Lu-khuh (public head covering of women) hi tihdân-phung pangngai (culture)-a an neih mêk a ni bawk.

Matthaia 5:29-30-ah chuan, Thupek rum râpthlâk lutuk mai kan hmu a, “I mit ding lamin a tihtluk che chuan, kher chhuak la, paih daih rawh; Tin, i kut ding lamin a tihtluk che chuan, tan la, paih daih rawh” tiin. He Bible châng hi engtia ngaih tur nge ni ang???

He thu hi a ngial-a-ngan (literal sense)-a lâk/pawm tur a ni lo. Hetiang ţawngkam hi “GRAPHIC  HYPERBOLE” tiin an vuah a. Thil an ngaih pawimawh leh sawi-uar duh kha uar taka an sawina ţawngkam mai a ni. A sawi tum ber chu, Gehenna (hremhmun/meidil)-a kal dawn ai chuan, min titlutu leh suala min hruaitu taksa pengte hloh (tan/paih) kha a pawi lo fe zawk e, a tihna a ni. Gehenna-a kal a hlauhawm-zia leh a pawi zia uar taka sawifiahna a ni. A ngial-a-ngana mit kher chhuah leh kut tan lam sawi a tum lo. 

5. NGAIHTUAH ZUI ATÂN
Thil sual leh thil ţha lo, Pathian duhloh zawng tihna remchâng atâna Bible châng kan fawmkhâwm a, Bible thu kan hrilhfiah a nih chuan kan tân leh midangte tân a hlauhawmin thil ţha lo tak a thlen thei ang. Keimahni nungchang, awmdân leh thiltih dân ţha lo ţanpui (support) tura Bible châng kan zawn a, kan hman (apply) phei chu a ţha lo lehzual ang. Kan hnung deuh khân, Lehkhathiam tak pakhatin hetiang hian min ti a, “Kan Missionary-te rawn tirtu Arthington kha, Zu zuar chhungkua aţanga hausa leh seilian a ni a. A Zu zawrh aţanga sum avangin Mizoram-in Chanchin Țha kan lo hriat phah alawm. Zu hi sawisêl vak tur a ni lo” tiin, Zu zawrh a sawimawi hle a, Example a pêk chu tifuh a inti hle tih a hmêlah pawh alang thei.

Achunga rilru ang khi pu-in, hetiang hian ngaihtuah ve thung ila. NEW YORK CITY GANG, THE MAU-MAUS HOTUPA NICKY CRUZ kha misual tawrawt lutuk, tual thah leh sualna dang rêng rêng khawih fai vek a ni a. Pastor David Wilkerson-a rawngbawlna avangin a piangthar hlauh mai a, Evangelist hial a lo ni ta a. Tunah khuan NICKY CRUZ OUTREACH (EVANGELISTIC CHRISTIAN MINISTRY) changtlung tak a din nghe nghe. Chuti a nih chuan, kan Țhalaite leh Nu leh pa-te hi sual zual sauh sauh tur te, sual tawrawt êm êm tur te, tual te pawh that hial tur te-in kan fuih ang a, sual tawrawt-te leh tualthat-te kan sawi mawi zel ang a, mi pawngsual tur te, rûk ru tur te, tualthat tur te, Hel pawl leh Misual pawl (Terrorist/Gang)-te din a, mite Lambun turin kan fuih chiam dawn emni ang??? Kan Chhânna tur chu, “TEUH NÂNG, A TEUH LO MAI” tih hi a nih mai ka ring. 

Țumkhat pawh, rawngbawlna kan neih laiin, Taksa chêtna chang, khûr ţhin-te zinga pakhat chuan, “Bible-ah hian khûr/taksa chêtna chungchâng sawina a lo awm reng alawm le!!” tiin, Bible châng, “Heng thil engkim hi ka kutin ka siam a ni si a, chutichuan heng thil engkim hi a lo awm ta a ni, LALPAN a ti: Amaherawhchu mi, rethei taka awm, rilru-a inchhir ngawih ngawih, KA THU-A KHÛR ŢHIN-a lam hi ka en zawk ang” tih thu hi a rawn chhiar-chhuak a (Isaia 66:2).

Mahse, helai Bible châng, “KHÛR ȚHIN” tih hian Taksa chêtna emaw Thlarau pâwlna changa khûr te hi a sawi tum a ni si lo. Thlarau Thianghlimin ringtute a pâwlna kawng pakhat, Taksa chêtna/khûr hi a awm ngei a. Mahse, a chunga Bible châng khi chuan, chumi Taksa chêtna leh khûr chungchâng chu a sawi lo. Zawlnei Isaia sawi khi chu, Taksa chêtna (kan hmuh fo ţhin) chan vang ni kher lovin, Pathian hriatna leh ţihna avang zawka Pathian hmaa hlau tak leh tlâwm tak leh thuawih taka awm a sawina a ni zawk.

Bible (Pathian Thu) Hrilhfiahna-ah hian Theologian, Pastor leh Pathian Thu Zir-chhuak zawng zawngte hi an râwn tlâk vek lêm lo tlat hi a buaithlâk lai tak chu a ni. Chutihlaiin, Theologian leh Pastor-te hi Kohhran leh Pathian Thu Sawihona hmunah chuan a Bân-râng chin leh a Hnâr-kai chin an ni leh vek lawi bawk si!!! A Bân-râng chin, Theological circle-a a Dai-zau chin, a Theologian berin a Hrilhfiah (interprete) dik lohva, a Hman (apply) dik lohva, a Sawi (preach) dik loh chuan Mipui tân chuan Hriatfuh ngaihna a awm lovang a, a Bân-rângin a Kawhhmuh dik lohva, a Zawh dik loh chuan Mipui tân Kawng dik zawh ngaihna a awm lovang. THUTAK THU FEL TAK LEH DIK TAKA HMAN (RIGHTLY DIVIDING THE WORD OF TRUTH) HI AVA PAWIMAWH TEHLUL ÊM!!!

0 comments :

Popular Posts