Thursday, May 21, 2015

KAN SÂWM HLAWHCHHAM VE MAI ANG EM??? (An Function-ah Zai Turin Zaithiam Lâr tak an Sâwm, Mahse, an Sâwm Hlawhchham!!!)

1. THU KAMKEUNA
Țumkhat chu Mizorama Thuziak lama lâr tak pakhat hi Kohhran-in Thuhriltu atân rawih kan duh a. Sâwmna Lehkha-te kan thawn a. Min rawn chhân dân aţang chuan, beisei awm riauva kan hriat avangin an khuaa va kal a, va sâwm ngei ngaia kan hriat avangin Zan 2/3 riak turin kan kal ta a. Mahse, ni 2 zet kan inkawm hnu chuan, kan sâwmna leh kan ngenna chu a tih-hlawhtlin theih loh tur thu min hrilh chiang ta a ni. Keimahni (a Sâwmtute) thiam loh a awm lova, amah pawh fellohna leh sawisel tur, ngaihţhatlohna tur thil langsâr engmah a awm lo.

Mahse, min chhânna chu, “Hetiang langsâr rawngbawlna lam hawi hi ka duhloh avangin hmânah pawh mi ka kian tawh a, tunah hian kha kha ka la let leh thei tawh lo. A thiang lovin ka hria” a ti ta tlat mai a ni!! A tirah chuan kan ngaihdân a ni lo viau a. Mahse, kan ngaihtuah thui deuh hnu chuan, a rilru ţhat-zia, zau zia leh a ngaihtuah thui zia leh a rilru ngheh zia kan ngaihtuah chhuak a, kan chhuang rilru ta hle zawk a ni.

Khawvelah chuan, kan hnena awm-a function/program min hmanpui tur te, min ţanpui tur te, min thlamuan tur-te hian kan duh duh kan sâwm thei lova, sâwm pawh ni ila kan hlawhtling vek thei lo. Keimahni a Sâwmtute vang emaw, kan Sâwma-te vang emaw-in kan intawng remchang thei ţhin lo a ni. Keimahni lamin kan zir ngang loh vang emaw, anmahni lam an lian lutuk emaw a nih phei chuan kan tân beisei ngam loh tur thlengin an kat nuk mai a ni.


Chutiang a nih lai chuan, Lei leh Vân Lal, Pathian Fapa Isua Krista dinhmun erawhchu a danglam hle mai. Amah beiseitute tân leh amah mamawhtute tân chuan PEON ang hialin a inpeih sa reng a. A Sâwmtute leh Amah Beiseitute a tih-beidawn emaw, a tih-hlawhchham emaw sawi tur kan hre ngai lo!!!

2.1. LAL ISUA CHU MIN AWMPUITU ATÂN SAWM THEIH RENG A NI
Khawvelah chuan, keimahni (a Sâwmtute) dinhmun-in a zir loh emaw, anmahni (kan Sâwm tur-te) dinhmun-in a zir loh emaw chuan, kan duhzawng mihring kha kan hun pawimawh program leh function atân kan sâwm ngawt thei lo. Kumin January 26, 2015 khân, “Super Power” tih hiala koh U.S President, Barack Obama chu Indiaah Republic Day min hmanpui turin sâwm a ni a, a lo kal thei mai. Obama kha Mizoram-in sâwm ve ta ila, lo kal duh eng-ang mahse, a lian lutuk a, a lal lutuk a, neuh neuh a tam lutuk a, a lo kal hnaisai lovang.

U.S President chu sawi loh, kan Bharat Prime Minister, Narendra Modi tak ngial pawh hi, Saiha-a AMFU program-ah lo kal turin sâwm ta ila, a lo kal aiin, a lo kal loh a rinawm zawk. Zep ţit-ţet lovin sawi ta ila, Saiha AMFU Program hmanpui turin a lo kal piiiit lovang. A chhan tam tak awm zingah, kan Sâwm-a te leh Keimahni a Sâwmtute dinhmun inthlauh lutuk vang a ni mai.  A awmzia ber chu, “Lenlai a rual lova, kan intawng remchâng thei lo” a ni ber e. Prime Minister tân chuan Saiha AMFU program chu a tê lutuk a, “ZAWH DAWRA SUK TIN” ang vel a ni, a ngaihna a awm thlawt lo!!

India ram ropui tak pawhin a duh hun hunah leh a duhna hmun hmunah U.S President hi a sâwm ngawt thei lo. U.S. President chu sawi loh, kan Ram, India ram Prime Minister ngawih ngawih pawh Saiha AMFU program-ah kan sawm hlawhtling thei dawn miah lo. Chutiang chu he khawvela Lalte dinhmun a nih laiin, Leilungte din a, mihringte min siam a, min tlan tura a taksa leh nunna kan tâna inpe zo vektu Lei leh Vân Lal Isua Krista erawhchu, Sâwm hlawhchham a awm thei lova, A rethei ber aţanga a hausa ber thlengin, lehkhathiam lo aţanga lehkhathiam ber thlengin, mifelte chauh ni lovin, misualte hlei hlei Sâwmna a ngai pawimawh emaw tih tur a ni. Tute tân pawh-a Sâwm theih a nih thu hi amah ngeiin a sawi a, “Nangni thawk rim leh phurrit phur zawng zawngte u, Ka hnênah lo kal ula, Keiman Ka chawlhtir ang che u” tiin, amahin min sâwm zawk a nih chu!!! (Mat.11:28). Lal Isua hi i harsatna leh buaina, lungngaihna leh manganna sutkian sak tur che-in, i nun-a Lal turin tih-takzetin i sâwm ve tawh em???

2.2. LAL ISUA’N AMAH SȂWMTUTE A HNAR NGAI LO
Ka tawn-hriat hi tuman huatah an châng êm lovang chu maw. Evangelist Faktea (H.Lalfakawma) lâr vang lai khân, Saiha lam khân rawih ve kan duh êm êm a. Saiha District-a Kohhran (denomination) lian ber Mara Kohhran leh Kohhran Pawl dangte inthurual khân, Evan. Faktea chu Saihaa Rawngbawl turin an va sâwm a. Mahse, Evan. Faktea hian “Khawpuiah chauh rawngbawl turin Pathianin a koh thu leh Saiha-ah chuan a lo kal theih loh tur thu” a lo hrilh a, an mitirh-te kha beidawng takin an lo haw a ni. Khatihlai kha chuan Aizawla Evan. Faktea rawngbawlna kha a ropui bawk a, Thingtlâng lam (Zo khaw lam) chuan kan chang thei lova, kan Sâwm hlawhtling thei lo a ni ber e. 

Khawvela Lalte, Miropuite, President, Prime Minister, Governor, Chief Minister, MLA, MDC leh Revival Speaker/Evangelist leh Zaithiam lâr tak tak-te pawh kan Program min hmanpui tura Sâwm hlawhtlin an har êm êm laiin, Lei leh Vân Lal, Pathian Fapa Isua Krista erawhchuan, Amah Beiseitute leh Amah Mamawhtute tân engtik lai pawhin a inpeih reng a. Țhenkhat chuan Lal Isua (leh Thlarau Thianghlim) hi PEON ang hialin kan hmang a, kan duh duh ti turin kan hrilh a, kan tir-kawi nasa ngang mai a tih theih hial awm e.

Tin, khawvela milian leh miropuite chuan, anmahni Thlangtlingtute, Chawmseiliantute, Duhsaktute leh Țantute tih-beidawn châng an ngah mai. Anmahni dik loh vang emaw, midang (mipui)-te thiam loh vang emaw chu a ni ngei ang. Chutihlaiin, Lal Isua erawhchuan, Amah Sâwmtute leh Amah Beiseitute a tihbeidawn thu emaw, a tih-hlawhchham thu emaw sawi tur leh hriat tur a awm hauh lo thung!!! Min Țanpui leh min Chawisân sauh sauh duhin, “In thinlung mangang suh se; Pathian in ring e, kei pawh mi ring ve rawh u. Ka Pa inah awmna tam tak a awm a, a awm loh chuan ka hrilh tawh tur che u a ni; in tân hmun siamin ka kal dawn hi. Tin, in tân hmun ka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nân,” tiin min chah zui lawm lawm a ni (John 14:1-3)

Fakna Hla chuan, Lal Isua danglam bik zia leh ropui bik zia chiang deuhvin hetiang hian a sawi a, “Kan Isua ang ţhian dang rêng an awm lo. Kan sual ngaidam thei mi dang an awm lo. Amah tluka inngaitlâwm an awm lo. Kan hnêna awm loh châng ni a awm em? Min thlamuan theih loh zân i hre ngai em? Chu Țhian ţha chuan mi a thlâhthlam ngai em? Mi sual a hnarte pawh i hre ngai em? Chu Chhandamtu ang chu mi an awm em? A chhandam zawh loh mite an awm em?” tiin (KHB 134). 

2.3. KAN HNÊNA AWM TURIN LAL ISUA I SÂWM VE ANG U

Bible-a kan hmuh angin, Emau kawnga kal mêk Zirtirte khân hrechiang lovin Lal Isua kha an hnena riak a, châm ve turin an lo sâwm a, an va ti-fuh tak êm!!! (Luka 24:13-32, Marka 16:12-13). Liandova-te unauvin, mite duhloh rethei leh hri ţha lo vei emaw kan mikhual an tih laia Lal hausa leh thiltithei Lersia an lo mikhual reng ang khân, Lal Isua sâwmna châng hre lova hnar ta te, mikhual pangngai emaw ka thlen an tih laia Lal Isua lo thleng ta si te hi Zoramah hian chhungkaw engzât tak awm ang i maw???

Zoram hian harsatna lian tak tak leh boruak mak tak tak a hmachhawnin, a tawng chho mêk a, a tawng zel dawn. Kan Ram leh hnam dinchhuahna turah te, kan chhungkaw harsatnaah te, mimal harsatnaah te, eirûk chungchangah leh, zu leh damdawi hmansual leh hmeichhiat-mipatna hmansual chungchangah te hian, kan buaina leh harsatna min sutkian-sak tura Lal Isua sâwmna châng kan hria em le? Țawngkam-a sâwm satliah mai mai a ni lo. I Thinlung chhungril ber aţangin Lal Isua hi i sâwm tak tak em? tih hi a pawimawh. Hei hian kan nun-a Lal tur leh Thu nei tura sâwmna te, mahni taksa ngeia Pathian tâna inhlan-zuina thlengin a huam a ni (cf. Rom 12:1-3).

Mizo Bible-a inziak, “KÂ-IN AN CHELH A, KAN HNÊNAH AWM TA CHE; KHUA A TLAI DÂWN TA A, NI PAWH A TLÂK DÂWN TAWH HI” tih-a “KÂ-IN AN CHELH A” tih lai tak hi Mizo-ţawnga a inziak dân ang hi chuan a sawitum a phawk zo lovin, a pâwn-lâng lutuk hretin alang (Luka 24:29). A ţawngbul lamah chuan, Greek “parebiasanto” hman a ni a. English-ah pawh, “they urge him strongly” or “constrained” tia dah a ni. A ţawngbul chuan, “thupe-a tilui, nasa taka thlêm leh taksa ngeia tir-lui, etc.” (compel, oblige, force physically, pressurize, persuade, push, provoke, insist, persist, etc.) tih te a huam a ni. Kan sawi tum ber chu, “EMAU KAWNGA KAL MÊK ZIRTIRTE, LAL ISUA SÂWMTUTE KHÂN ŢAWNGKAM ŢHA SATLIAH MAI MAI NI LOVIN, TIH TAKZETIN, NASA TAKIN AN HNÊNA AWM TUR HIAN AN NGEN CHIAM A NI,” tih hi a ni.

I mimal harsatnaah te, in Chhungkaw harsatnaah te, i fate chungchanga i harsatnaah te, i nupui/pasal chungchanga i harsatnaah te khân, Lal Isua hnênah tihtakzetin, nasa taka ngen-in i thlen tawh em? Lal Isua hi i harsatna sut-kian pui tur che leh, i lungngaihna chhâwk tur che-in i sawm tawh em? tih hi lo in-zawt ang che. JAKOBA ANGA, “MAL MIN SAWM LOH CHUAN KA THLÂH LOVANG CHE” TIA, NGENNGAWL TAKA, TIHTAKZETA PATHIAN I DAWR CHUNG PAWH-A CHHANNA I HMU LO FO A NIH CHUAN, AMAH PATHIAN NGEI CHU I DEM DAWN NIA (Gen.32:26). Thinlung keh-chhiaa tihtakzeta Lalpa au-tu hnênah Pathianin a khawngaihna hmêl a thup ngai lo, “KA HMING PU KA MITE CHUAN INNGAITLÂWMA AN ŢAWNGŢAI A, MIN ZAWN A, AN AWM DÂN SUALTE AN HAWISAN CHUAN, VÂN AŢANGIN KA LO NGAITHLA ANG A, AN SUALTE KA NGAIDAM ANG A, AN RAM CHU KA TIDAM LEH ANG” tia Pathian Inpuanna leh Thutiam ropui tak hi ala ding reng a ni (2Chro.7:14).

3. THU TLÂNGKAWMNA
Khawvel hian changkân lam a pan zel ang a, mihringte pawh kan changkâng chho zel ang. Ram leh hnam inkaihhruaina dân leh administration te pawh a ţha tulh tulh ang. Amaherawhchu, KHAWVEL HI SETANA THUHNUAIA AWM A NIH TLAT AVANGIN, KHAWVEL CHANGKÂNG ZELAH HIAN SUALNA PAWH A CHANGKÂNG VE ZEL ANG. Țawngkam mawi lo ni suh sela, “KAN SUAL DÂN A CHANGKÂNG TULH TULH ANG A, KAN BUAI DÂN A CHANGKÂNG TULH TULH ANG A, KAN THIH DÂN PAWH A CHANGKÂNG TULH TULH BAWK ANG” tih hi kan hriat rêng a ţul. Bible-in a lo sawi lâwk tawh angin, Ringtute pawhin rinna leh thlarau lam thil hi kan hlamchhiah chho tial tial dawn a, kan thlarau nun leh rawngbawlna te pawh a sâng lam ai chuan, a hniam tulh tulh dawn a ni (2Tim.3:1-9, 2Pet.3:1-18, 1John 2:15-17). He Thudik hi Khawvela Church/Mission History aţangin a lang chiang hle.

Rawngbawlna kan thlir dân dal tawh zia hi kan hre thei mai awm e. KUM 100 CHU SAWI LOH, KUM 50 VÊL KAL TÂA PASTOR-TE KAN THLIR DÂN LEH KAN HMUH DÂN TE, AN INPÊKNA (COMMITMENT)-TE KHA NGAIHTUAH LET ILA, VAWIIN-A KAN HUN HMAN MÊK NÊN-A KHAIKHIN CHUAN INTHLAU TAK A NI. SORKAR HNA A VÂNG TIAL TIAL A, HLAWH TLÊM-TEA, RETHEIH THLANGA LAL ISUA ZUI A, HUN PUMA HARSA TAKA RAWNGBAWLNAA INHMAN RAL VEK CHU… CHONA LIAN TAK A NI TA!!! ZORAM, “KRISTIAN 100%” TIA INCHHÂL RAMAH PAWH HIAN, MAHNI HREHAWM PAWISA LOVA NITIN-A KRAWS PU-A LAL ISUA HNUNGZUI TUM CHU MI-Â NIH AN HLAWH TA NIIN ALANG!!! Dema anga Rawngbawlna tlâwm santute pawhin, inthlahrung hauh lovin mahni duhzawng Bible châng kan fawm-khâwm a, mahni nungchang milh-in Bible kan hrilhfiah ţan ta a nih hi!!! Zoram Ringtute hian kan nun-a Lal turin Lal Isua kan sâwm nawn mawlh mawlh hi ava ţul tehlul êm!!!

Hetiang hun harsa leh thim kan tawn chhoh mêk lai hian, Kohhran-ah Thlarau Thianghlim pâwlna leh chakna leh ei tûr i hmu tlêm ţan a nih chuan, in chhungkua tal kha ngaihtuah ang che. I chhungkua tal vêng la, humhim tum ang che. Chhungkaw kima Chhandamna Lawnga in lawi vek theih kha a pawimawh ber!! Israel mipuiten, “David, i chhungkua ngaihtuah mai rawh” an tih ang khân, Nangmah leh i Chhungkua vêng him turin, Sâwmtute hnar ngai lo Lal Isua hi thinlung chhungril ber aţangin… “KAN HNÊNAH AWM TA CHE” tiin i sâwm ve ang u.    

0 comments :

Popular Posts