Thursday, July 9, 2015

PATHIAN FAPA-TE LEH MILIANHO-TE HI TUTE NGE AN NIH?

1. THU-HMATHEH
Țhian țhenkhat ațangin,“Gen.6:2 & 4-a ‘Pathian Fapa-te,’ a tih leh ‘Milianho-te’ a tih te hi Tute nge? Joba 2:1, 38:7, Sam 29:1, 89:7, 2Pet.2:4 leh Juda 6-7 ten an sawi Vântirhkoh (Fallen Angels)-te nên hian thuhmun an ni em?” tih Zawhna hi ka dawng nual a. Midangte thiamna leh finna-te phâk lo mahila, kan Zirna leh Thiamna-te beithamin, hniam viau mahse, phâk tâwk te-in sawifiah ve kan tum dawn a ni.

Mi pakhat chuan, “Zoramah hian, Theology Zirna nei miah lovin, Tute emaw hnên ațang leh Internet (Google) ațangin an duhzawng fawmkhâwm a, Pathian thu huai deuh deuhva hrilhfiah pawp pawp ching an awm țhin a. Mipui nawlpui mai bâkah Kohhran mite pawh min ti-chiai viau țhin a. Pastor leh Theologian-ten hetiang Issue hi a awm chuan an ngaihdân-te ziak tam ve thei se ka ti hle mai” a ti a. Hei hi ka rilru-ah a riak reng mai. Titi-a an sawi țhin, “Mizo-te hi chu, Medical Doctor aia Tor lo râwn tam zawk, Theologian aia Gian-lo thu ngaihsak a, pawm zawk kan ni” an lo tih țhin hi a dik thei mai awm mang e aw, tiin ka ngaihtuah ta hial mai!!!


Genesis Bung 6 thu hi Mihring sualnain Pathian thinurna a tawng-buak tâk avanga Pathianin Tui a let-tir chungchâng a ni a. Genesis 6 hrefiah thiam tur chuan Genesis Bung 4 & 5 kan hriat-fiah a țul hle bawk. Tin, Gen.6:2 & 4 thu-a “Pathian Fapa-te” tih leh “Milian-ho” tih te hi Genesis Bung 4 & 5 bâkah, Bible Bu dang (OT & NT)-a a inziah dân te, Israel History leh Kohhran Inkhawmpui Thurêlte thlenga Enkual a, Khaikhin (Compare & Contrast) vek hnu-a ngaihdân siam a him ber ang tih hi mipangngai tân chuan a chiang hle.

2. NGAIHDÂN HRANG 3 A AWM (3 THEORIES):
Gen.6:2 & 4-a “Pathian Fapa-te”(Heb.Bene Elohim) tih leh “Milian-hote” (Heb.Nephilim) tih-ah hian Ngaihdân (Sawifiah dân) 3 a awm a. Heng Ngaihdân/Sawifiah dân 3-ah hian, an Țanchhan leh Sawifiah dân (Supporting Documents/Evidences & Explanation) ațang hian, Mipangngai chin leh Lehkhathiam chin chuan a pawmawm ber tur chu kan hrethiamin, Ngaihdân kan siam thiam mai awm e.

2.1. LAL CHHUNGKUA/RORÊLTUTE SAWINA A NI
He Ngaihdân 1-na Pawmtute chuan, “Pathian Fapa-te hi Lal Chhungkua & Rorêltute (DYNASTIC RULERS) an ni a. Mihring Fanute hi Mipui mimir (Common/Ordinary People) sawina a ni a. Pathianin a Duhloh chhan ber leh a Hremna chhan ber chu, Lal chhungkua & Rorêltute hian mipui mimir zing ațangin nupui tam tak an nei țhin (practice of polygamy) a, hei hi Pathianin a duh lo a ni. Hemi Ngaihdân tinghet tur hian Aramaic Targums (Aramaic Bible)-in chiang takin a tarlang a ni” an ti.

An Sawifiah-zui zelnaah chuan, Ex.21:6; 22:8-9, 28; Sam 2:6-7, 82:1, 6-ah te hian, Lal leh Rorêltute hi Pathian an nih thu chiang taka ziakna a awm, an ti. HE AN NGAIHDÂN (DYNASTIC RULERS THEORY) LEH AN HRILHFIAH DÂN DIK TÂWK LO-TE HI LO SAWIFIAH LAWK ILA:-

2.1.1. Bible Reference an pêk zinga, Ex.21:6,8,28 thu-te khian Lal & Rorêltute hi Pathian an nih thu sawina lam a kâwk lova, “Lal & Rorêltu” leh “Rorêlna Hmun” (Judicial Court) kha “Pathian Aiawh” (Judgment was given in the name of God, Ex.22:7-8, Deut.1:17, 19:17) anga an ngaih thu a sawina zawk a ni.

2.1.2. Sam 2:6-7 pawh khi, chhiar chiang ta ila. Lal leh Rorêltute sawina a ni lova, Lal Isua chungchâng a sawina a ni daih bawk tih kan hmu thei ang.

2.1.3. Tin, Psalms 82:1,6 pawh khian, Lal & Rorêltute Pathian anga a sawina ni lovin, Israel Rorêltute (Judges & Authorities in Israel) chu Pathian Aiawh-a Rorêltute an nihna lam kha sawi a tum zawk a ni (cf. Sam 45:6; Ex.21:6; 22:8-9).

2.1.4. He Ngaihdân 1-na Pawmdân hi tunhma chuan Orthodox Rabbinic Judaism zuitute pawmdân a ni țhin a. Mahse, tunlai-ah chuan Modern Orthodox Rabbinic Judaism huangah chuan an hnawl daih tawh a, Bible Scholars tam zawk daih-te pawhin an hnawl tawh a ni.

2.1.5. Chuvangin, Ngaihdân 1-na Pawmtute hian, an Țanhmun tinghet turin an Bible châng duhzawng an fawmkhâwm a, chungte chu anmahni rilrêm zawngin an hrilhfiah mai mai a ni, tih a chiang hle.

2.2. VANTIRHKOH SUAL-TE (FALLEN ANGELS ) AN NI
He Ngaihdân 2-na Pawmtute chuan, Gen.6:2-4 thu hi, VANTIRHKOH (Pathian fapate/Angels) leh MIHRING (Mihring fanute/Human) Inneihpawlhna ațangin CHITHLÂH THAR (NEW HYBRID RACE. Heb.Nephilim - Milian-hote/Hmasang Mi-chak/Mi-hmingthang) an lo chhuak a ni, tiin an bel ve thung.

An Sawifiah dânah chuan, PATHIAN FAPATE hi Vantirhkoh, thlarau thi thei lo, (Angels, immortal beings) te an ni a. MIHRING FANUTE hi Mihring, taksa nei, thi thei (human, mortal beings) an ni, an ti!! An Hrilhfiah dânah chuan, Joba 1:6, 2:1, 38:7, Sam 29:1, & 89:7-ah te pawh, Vantirhkohte hi Pathian fapa anga sawi leh târlan an ni a. Thuthlung Tharah, 2Pet.2:4 & Juda 6-7-ah te pawh hei hi a in-ziak a ni, an ti!!

An sawi zelnaah chuan, 2Pet.2:4 & Juda 6-7 ah hian, Vantirhkoh Sualte (Fallen Angels) chungchâng hi a in-ziak a. Heng Vantirhkoh Sualte hian an awmna hmun (Vânram) chu kalsanin, mihringte zingah an khawsa ta a, Mihring fanute chu nupui-ah an nei a, chumite thlâh ațang chuan CHITHLÂH THAR (NEW HYBRID RACE – Heb.Nephilim) Milian-hote/Hmasâng Mi-chak/Mi-hmingthang te kha an lo chhuak ta a ni, an ti!!

An Țanhmun tinghet turin BOOK OF ENOCH an hmang a. He Lehkhabu-ah hian, Thlarau, Vantirhkohte (Watchers)-ten Taksa-nei Mihring fanute nupuia an neih a, an pâwlna ațanga Milian-te an lo pian chungchang leh heng Thlarau-sualte leh milian hoten mihringte leh hmeichhiate leh khawvel chunga chhiatna, inawpbehna, indona an thlen dân a târlang bawk a ni (Ref. BOOK OF ENOCH, Chap.15. Translated by R. H. Charles, THE APOCRYPHA AND PSEUDEPIGRAPHA OF THE OLD TESTAMENT, 2 Vols. Oxford: Clarendon Press, 1913; Reprint, Berkeley: Apocryphile Press, 2004).

Welsh Preacher I.D.E. Thomas (Book of Enoch pawmtu) chuan, “Tunlaia sawi hlawh tak UFO (Unidentified Flying Object)-te hi Ramhuai, Vantirhkoh Sualte (Fallen Angels) kha an ni a. Genenis Bung 6 thu leh Matt 24:37 “Nova damlai ang” tih thu-te hi sawitum in-ang an ni a. Nova hunlaia Fallen Angels ten mihringte an bei ang bawk khân, Lal Isua lo kal (Second Coming) hnaih tawh hunah hian an rawn inlâr leh a ni e” a ti (Ref. I.D.E. Thomas, THE OMEGA CONSPIRACY, Herndon, VA: Growth Publishing, 1986, pp.236-38). HE NGAIHDÂN 2-NA (FALLEN ANGELS’ THEORY) DIK TAWK LOH DÂN TAWITE-IN LO SAWI ZUI ILA:-

2.2.1.Theological College pangngai takah chuan hetiang Ngaihdân (Ngaihdân 2-na ang) hi an zirtir âwm ka hre lo. India rama Theological College Evangelical bera an ngaih UBS, Pune-ah te, SAIACS & Acts Academy of Higher Education (William Carey University), Bangalore-ah te ka kal tawh a. AECS, Bangalore-ah kum 3 ka thawk tawh a. Mițhenkhatten Theological College Liberal bera an sawi UTC, Bangalore-a Professors & Students-te pawh ka kawm-nel viau a, Foreign-a Theological College & University – Cambridge Univ., Oxford Univ., Harvard Univ., UCLA., Northwestern Univ., Midwest Univ., Northcentral Univ., Dallas, Fuller, Princeton, Westminster, etc., ațanga lo kal Professors-te ațang pawhin, he Ngaihdân 2-na ang nei hi tumah ka hre lo bawk!!! Ka zir tlêm lutuk a, ka hawi zau lo lutuk a, experience ka ngah lo lutuk a lo nih hlauh chuan… thudang nise.

2.2.2.Tin, Nova Hunlaia Thil Thleng leh Lal Isua Lo Kal Lehna a Tehkhinnaa (Gen.6, Matt 24:37-39, Days of Noah) a THU-LAI-MU (CORE MESSAGE) chu, RINGLO MITE CHUNGA CHHIATNA THLENG CHUNGCHANG A NI. Bible Zirtirna ngun taka kan en chuan, Nova hunlai khân, Misual, Pathian ring duh lo (wicked/unrighteous peoples) ho khân, Pathianin Tuilet hmanga a hrem tur chungchâng kha an awih lova, an thi vek ang khân, Lal Isua lo kal leh hunah pawh, Lal Isua ring duh tlat lo, misual, luhlul chhuah tlat-te an awm dawn a, chung hote chungah chuan chhiatna a thleng ve dawn a ni, tih a sawina a ni zawk. Chuvangin, Gen.6, Matt 24:37-39, Luka 17:26, 1Pet.3:20 te ulûk taka zir hian, Vantirhkoh Sualte (Fallen Angels or UFO) leh Mihringte inthlâhpawlh leh indona lam a sawi lo niin a lang.

2.2.3. Vantirhkohte (thlarau) leh Mihringte (taksa) an inneih pawlh thu ziakna hi Bible Bu/Châng dangah pakhat mah a awm lova, Support-tu a nei lo. Khawvel/Mihring history-ah pawh hetiang lam hawi thudik tak ziakna a awm lo. Mythology leh Rinthu leh Zeldin Thubawl Thawnthu phuahchawpah chuan a awm țeuh mahna. Mahse, chhinchhiah tlat tur chu, he Ngaihdân 2-na Innghahna ber hi Enoka Lehkhabu (Book of Enoch) a ni a, He Lehkhabu hi Judate Sakhaw Hruaitute leh Kristian hmasate zinga Hruaitute zingah tumahin an pawm thu kan hmu lo.

2.2.4. He Ngaihdân 2-na Țanchhan ber leh Source atâna an hman ber “Enoka Lehkhabu” (Book of Enoch) hi “BIBLE PHUAHCHAWP” (PSEUDEPIGRAPHA) zinga mi a ni a, Juda Sakhaw Hruaitute leh Kristian Kohhran Inkhawmpui Lian-in an pawm loh leh an hnawl hnu a ni. **Pseudepigrapha chungchâng hi a hranin kan la sawi leh ang**

2.2.5. Petera & Juda (2Pet.2:4 & Juda 6-7)-te hian Bible Phuahchawp – Enoka Lehkhabu (Book of Enoch) hi an refer ngei em? tih hi finfiahna a awm lova, a chiang lo. Tuna Book of Enoch tia an sawi hi Petera & Juda khân an refer kha a ni chiah em? tih finfiahna a awm lo. Enoka chungchang a sawiah hian, Juda hian Oral Tradition zawk a refer em? tih pawh zawhna pawimawh tak a ni leh bawk. Achunga Zawhna-te khi chiang taka chhan theih leh finfiah theih an nih loh avangin Kohhran Hmasate khân Book of Enoch hi Bible (Bu 66)-a telh tlâkah an ngai lova, an hnawlna chhan zinga pakhat a ni rêng a ni.

2.2.6. Tin, Apostol-te leh Kohhran Hmasa-te khân Book of Enoch hi a rintlâk thu (Authenticity of Book of Enoch) hi an sawi lang miah lova, hei bâkah hian, Juda Sakhaw Hruaitute tak-ngial pawhin an Hnawl tlat avangin Book of Enoch hi a rintlâk lo a ni, tih a chiang tawk hle. Chuvangin, Apostolte, Kohhran Hmasate, Inkhawmpui Lian leh Juda Sakhaw Hruaitute pawhin an pawm loh leh an hnawl Bible Phuahchawp, Enoka Lehkhabu (Book of Enoch) hi chu Ringtu pangngai leh Lehkhathiam pangngai tân chuan Source-ah emaw, Hmanrua-ah emaw hman loh a him ber a, a țha ber a ni.

2.3. PATHIAN FAPA-TE HI SETH-A THLÂH-TE AN NI
Ngaihdân 3-na Pawmtute chuan, “Pathian Fapate hi Seth-a (Pathian thuawih-ho/Godly line) Thlâhte sawina a ni a. Mihring Fanute hi Kaina (Pathian thuawihlo-ho/Ungodly line) Thlâhte sawina a ni” an ti thung. Hei hi a Bible Context (Gen.4-6) en hian a fiah lehzual a. Gen.6:4 thu hi Genesis Bung 4, 5 leh 6 te lâk-kawp a, zir-kawp vek lo chuan a fiah thei lo. Genesis Bung 4, 5 & 6 te Zir-kawp a, Enrêm vek a, Bible Bu dangte nen Khaikhin-kual (compare & contrast) vek chuan, he Ngaihdân 3-na hi a dik zia rinhlelh ruallovin alang chiang hle a ni, an ti. TICHUAN, HE NGAIHDÂN 3-NA PAWMTUTE (GODLY LINE THEORY) CHUAN, HETIANG HIAN AN SAWIFIAH A:-

2.3.1. Genesis Bung 4-ah khân, Pathian Thuawihlo-ho (Ungodly line), Kaina Thlâh-te a chhui a. Genesis Bung 5-ah thung chuan, Pathian Thuawih-ho (Godly line) Seth-a Thlâhte a chhui thung a. Tichuan, Genesis Bung 6-ah chuan, Pathian thuawih- Seth-a Thlâhte (Pathian fapate) leh Pathian thuawihlo- Kaina Thlâhte (Mihring fanute) inneih pawlh chungchang a rawn sawi ta a. Tichuan, Inneih-pawlhte chuan “Pathian Thuawihlo Thlâh tam tak” an nei ta a, Pathian duhlo zawngin an nun an hmang chho ta bawk a. Hei ngei hi Pathian duhloh leh a thinurna chhan ber chu niin alang.

2.3.2. Pathian ring duhlo mi leh thlâhte (Ungodly races) nên-a inneih-pawlh hi Pathianin a duhloh thu chiang takin Israel fate pawh a hrilh nghe nghe a nih kha. Hei hi Thuthlung Tharah pawh ringtute tân thu pawimawh tawp-khâwk ala ni reng a. Mosia te, Puithiam Samuela te, Nehemiah leh Tirhkoh Petera leh Tirhkoh Paula-te pawhin, Ringlo mite (hnamdang) nên-a inneih pawlh hi Pathianin a phal loh thu leh a duh lo thu tlang tak leh chiang takin an lo sawi tawh bawk a ni.

Pathianin, Ringlo mite (hnamdang) Nupui-pasala neih a khapna chhan ber nia lang chu- (1). Culture leh sakhua in-ang lo an inneih chuan, thlarau lam, chhungkua leh chi leh hnam than-len zelna turah harsatna tam tak a thlen thei, (2). Ringlo mi (hnamdang)-te hian sakhaw (pathian) biak an nei hrang a, an biak-pui ve a hlauhawm, (3). Ringlo mi nupui emaw, pasal emaw an neih chuan an rinna a phat-tir (bânsan-tir) theih dawn avangin a ni bawk, (cf. Gen.28:1-4, Deut.7:1-6, 4:15-20, 17:17, 1Lal.3:1, 11:1-14, Neh.10, 13:23-27, 1Kor.7:12-39, 2Kor.6:14, 1Pet.3:1-2).

2.3.3. Joshua hova Kanan ram an enthlâk khân, Nephilim-te hi, mit ngeia an hmuh thu chiang takin an report a. Chuti a nih chuan, Nephilim-te kha Vantirhkoh (thlarau, taksa leh ruh nei lo) ni lovin, Mihring pangngai, palian leh chak satliah mai (ordinary yet strong human beings) an lo ni, tih hi a chiang ta hle a ni (cf. Numbers 13:33). Tin, Hebrai țawnga “Milian” (Heb.Nephilim) tih hi, Mihring sawina a ni a, Mipa sawina (Masculine Gender) a ni bawk. A Awmzia hi, Palian, Tluchhia, Thinchhia, Nunrâwng tihna te a huam thei vek (a giant, a feller, i.e. a bully or tyrant).

A chunga Ngaihdân 2-na anga - Gen.6:4-a Pathian Fapate tih hi 2Pet.2:4 & Juda 6-7 nên-a Thu thuhmun, Vantirhkoh Sualte (Fallen Angels), an awmna hmun (Vânram) kalsan a, mihringte zinga khawsa a, Mihring fanute nupui-a nei a, chumite thlâh ațanga CHITHLÂH THAR “NEPHILIM” (NEW HYBRID RACE), Milian-hote/Hmasâng Mi-chak/Mi-hmingthang-te lo chhuak anga kan hmeh-bel chuan, Bible Bu danga a inziah dân nen-a inrem thei lova, kan tisual duai tihna a ni.

2.3.4. “Pathian Fapate” tih hi Vantirhkoh-te anga ngaih pawlh theih tura ngaihdân rawn siamtu chu SEPTUAGINT a ni. Septuagint hian helai țawngkam hi a dah sual hlauh niin alang a, Greek “οἱ ἄγγελοι τοῦ θεοῦ” (the Angels of God) tia a rawn hman avangin “Pathian Fapate” tih hi Vantirhkoh Sualte (Fallen Angels) anga ngaihna min pe ta a ni.

Mahse, Hei hi Hebrai țawngah chuan, “Pathian Fapate” Heb.“בֵּן אֱלֹהִים” (Bane ha-el-o-heem’/Sons of God) tih a hmang zawk. Hei hian Pathian Vantirhkohte tih a inziak lo tih a chiang. Bible hmun țhenkhatah chuan a Context (a sawina dinhmun) a zirin, “Vantirhkohte chu Pathian fapate, etc.” tia ziak/koh an ni ve bawk (cf. Joba 1:6, 2:1, 38:7, Sam 29:1, 89:7, Dan.3:26). Hei hi a chhan zawk chu, Hebrai țawng hian țawngkam bungrua a neih tlêm avangin, a Context azira thil awmzia lang fiah chi țawngkam a awm nual a ni.

Hemi tifiah tur hian Entirna pakhat chauh lo la-chhuak ila, Bible-ah hian, “Mihring fapa/fanu” tih hi “Mihring pangngai fapa/fanu” (son/daughter of human being) sawina atân hman a nih laiin (Gen.6:4, Sam 8:4-6, Heb.2:6), Lal Isua’n Ama chungchâng sawi nân “Mihring Fapa” tih țawngkam hi a hmang ve leh tho a ni (Mat.20:18, 28, etc.). Chuvangin, Bible-a “Mihring fapa/fanu” tih hi a ‘Thumal pakhat’ ringawt ațanga hrilhfiah chi a ni lova, a sawina dinhmun (context) leh Bible Pumpui Zirtirna ațanga hriatfiah leh hrilhfiah tur a ni” tih a chiang hle a ni.

3. THU TLÂNGKAWMNA
Pathian Thu hi ‘Pathian thu’ a ni a, Vân lam thil leh Thlarau lam thil a nih avangin, Mihring, Leitlanga siam hian a hrefiah zo sêng tak tak thei lo. A chunga kan sawi tâk zingah khian, NGAIHDÂN 3-NA, Seth-a Thlâh (Godly line of Seth) leh Kaina Thlâh (Ungodly line of Cain)-te khi Pawmdân tlânglawn ber leh Hahdamthlâk ber chu a ni. Kohhran Hmasate, Kohhran Pate leh Church Reformers-te Pawmdân a ni a. Evangelical Scholars zawng zawng deuhthaw pawmdân a ni.

Taksa, thisen leh ruh nei lo thlarauvin, Engtinnge taksa, thisen leh ruh nei mihring chu nupuiah an neih theih ang? Engtinnge fa an neih theih ang? Chutiang chu khawi hmunah nge a thlen tawh? tih Zawhna hi tuma’n an chhang thei lo. Chuvangin, he NGAIHDÂN 2-NA (FALLEN ANGELS’ THEORY) hian, he Pathian Thu hi min Sawifiah sak a, Harsatna min sutkian-sak aiin Buaina leh Harsatna thûk zawkah min hruai lut a, Zeldin thubawl leh Ngaihruatna Lasi Thawnthu (imagination & myths) bâk chu țanchhan tur a nei lova, a awm lo hrim hrim bawk a ni. Lal Isua ngeiin, Chhanna tawite Matt 22:30-ah min pe a, Vantirhkohte’n nupui-pasal an nei ngai lo, tih chiang takin min hrilh a ni.

Chhinchhiah tlat tur pawimawh tak erawhchu, Gen.6:4, Numbers 13:33-a Milianho (Nephilim) chanchin a sawi-te hi chu, Mihring pangngai (mortal human beings) an ni a. 2Pet.2:4 & Juda 6-7 thu erawh hi chu a sawi tum a dang daih a, Vantirhkoh Sualte (Fallen Angels, immortal beings) chanchin a sawi thung. Heng Fallen Angels-te hian an awmna hmun (Vânram) kalsanin, Setana lamah an țang a, Pathian an do avangin, Pathianin Hremhmunah a paih a, ni ropui rorelna atân, thim hnuaiah chatuan phuarnaa phuar chungin khuarkhurum thimah a khung a, a khêk mêk chungchang min hrilh a ni. Khang, Vantirhkoh Sualte (Fallen Angels-te) kha Leilung din a nih hmâ ațanga tun thlengin Hremhmunah, khuarkurum thimah Pathian Pathian rorêlna nghâkin an la awm mêk a ni, an la chhuak lo hrim hrim tih hi i chiang ang u.

Ngaihdân 3-na khi chuan, tuna Bible kan hman mêk Bu 66-te, Juda Sakhaw Puithiamte, Apostolte, Kohhran Hmasate, Kohhran Pate, Church Reformers te, Kohhran Inkhawmpui Thurel te, leh Evangelical Scholars-te Ngaihdân te chu Source atâna a hman avangin, kan hriatna leh thiamna-te thûk lo mahsela hahdam tak leh thlamuang takin a pawm theih.

BOOK OF ENOCH hi Source atâna rintlâk-a kan ngai dawn a nih chuan, Pseudepigrapha, Apocrypha, the Forgotten Scriptures & The Lost Gospel dang zawng zawngte bâkah, The Da Vinci Code te, The Last Temptation of Christ te, Angels & Demons leh Mizo Lasi Thawnthu etc. te thlengin kan hnawl a thiang lovang a, Thudik-a ngaiin kan pawm vek a țul dawn a ni.

0 comments :

Popular Posts