Tuesday, December 15, 2015

BETHLEHEM KAIHHNAWIH – PART 1 (I Lo Chhût Ve Țhin Em?)

1. THU KAMKEUNA
Kum tin December 25-ah Misualte Min Chhandam Tura Lei leh Vân Lal, Lal Isua a lo Pianna Champha kan hmang ziah a. Lal Isua Pawmlotu leh Ringhleltu (Sceptics)-te chuan Lal Isua lo Piandan hi Rom mite Thawnthu (Roman Mythology) lâkchhawn a ni e, an ti a. Nazareth aţanga Bethlehem kalkawng te, Khualbuk leh Khualbuk Vengtu te, A Pianna hmun (In/Ran In) leh Ranthleng te, Chhiarpui te, Mifing te, Berampu te, leh Heroda chungchâng te, Aigupta rama tlânbo chungchâng etc. te nên, Hahdam taka pawm harsa an tih mai bâkah, Theologian leh Pastor-te zingah pawh Pawm hahdam chiah silo, sawichhuak hreh si-te pawh an awm a.

US-ah phei chuan, Theologian leh Pastor tam takin Lal Isua Nula Thianghlim Mari Laka a Pianna (Virgin Birth) hi thil thleng tak tak (real historical event) a nih an rin loh thu huai takin an sawi chhuak tawh a ni. Tin, Theologian leh Kristian ţha tak inti zingah pawh hian, Bible-a Krismas Thlen Dân inziak hi kan chiang kek-kâwk lo a ang riau bawk. Hetiang teh nuaih a nih avang hian, Bethlehem-a Lal Isua lo pianna leh a kaihhnawih ţhenkhat chungchânga Ringhleltute leh Awihlotute Zawhna leh Rinhlelhna (Sceptics’ Questions/Doubts)-te bâkah, Sawifiah deuh ngai ni-awma ka ngaih-te chu sawifiah kan tum dawn a ni.    

2. NUIHSANTUTE/HMUSITTUTE LEH AWIHLOTUTE (SCEPTICS):
Lal Davida chuan, Pathian Hmusittute Țhutphahah ţhu lo turin min duh a (Sam 1:1), Juda leh Petera chuan Ni hnuhnungah chuan Lal Isua Nuihsantu leh Hmusittute an lo chhuak ang (2Pet.2:10, 3:3, Juda 18) tiin an lo sawi lawk tawh bawk a ni. Bible-in Hmusittu leh Nuihsantu a tih-te hi Mi chi 2 - Lal Isua Ringduhlotu (Unbelievers)-te, leh Pathian Awm ringlo (Atheists)-te an ni. Atheist-te hian, Pathian awm rinna lam hawi hrim hrim an hnawl a, Ringlote (Lal Isua pawm lo) hian, Lal Isua chanchin hrim hrim hi an ringhlelh a, an awih lo (pawm lo) a ni. Hengho-te Zawhna leh Buaina hi tlêm-a-zawng lo luhchilh dawn a, hemi rual hian Kristian zingah pawh Bethlehem leh Krismas Kaihhnawih thil hrechiang lo-te tâna ţul-te kan sawi tel bawk dawn a ni.

2.1. MARI RAIPUAR-IN MÊL 70 LAI KE-IN A KAL THEI DAWN EMNI?
Nazareth aţanga Bethlehem hi Mêl 70-80 vêla hla a ni a. Miţhenkhat chuan, “Josefa leh Mari hi chhungkaw rethei tak an ni a, Zinna atan hian Sabengtung an nei zo lovang tih a hriat theih. Mari rai puar luah hian Mel 70-80 hi ke-in a kal thei lo hrim hrim ang, hei hi thil awihawm lo lutuk a ni. Hei hian Bethlehema Isua piang hi phuahchawp a nihzia a tichiang a ni,” an ti. Mahse, Luka 2:5-a kan chhiarin, “Galili rama Nazaret khua aţangin, Mari a nupui hual rai ţeuh chung nên chuan hming ziak turin, Judai rama Davida khua Bethlehem an tihah chuan an kal ta a” tih kan hmu a.

Bible-ah “Ke-in an kal” tih a inziak lova, hetih hunlaia Zinna atâna an hman ber Sabengtung chu Mari leh Josefa pawh hian an hmang ngei ang tih hi a rin theih a. Josefa hi Thingrem siam (Carpenter) a ni a, Thing Mistiri hna hi hetih hunlai hian Eizawnna tling a ni. Chuvangin, Sabengtung nei zo lo khawpa Chhungkaw rethei an ni loving tih a chiang a. Sabengtung hmangin Nazareth aţang hian Bethlehem thlengin an kal ang, tih hi pawm a hahdamthlâk hle a ni.

2.2. ISUA KHA BETHLEHEM AN THLEN ZÂNAH A PIANG EM?
Miţhenkhat chuan, “Mari rai puar ţeuh chungin, Nazareth aţangin Bethlehem hi an pan a, Bethlehem an thlen zânah a hrin a hun ta si a, Lal Isua hi a hring ta a ni,” tiin an sawi a. Khawngaihthlâkawm deuhvin an sawi ţhin.

Luka 2:6-7-ah, “Tin, heti hi a ni a, chuta an awm laiin a hrin a lo hun ta a. Tin, a fa tirah mipa a hring a” tih kan hmu a. “CHUTA AN AWM LAIIN” tih hian, Mari leh Josefa-te hian Isua pian hma-in Bethlehem hi an lo thleng daih tawh tih a kâwk zawk. Kâr khat lai pawh an lo châm tawh a ni mai thei zawk a ni. Chuvangin, Josefa leh Mari pawh mi-â nileng an ni lova, Naute pian hun hisap thiam lo khawp khawp chuan an â lovang tih rin ngam a ţha ang.

2.3. KHUALBÛK LEH KHUALBÛK VÊNGTU HI A AWM EM?
Mi tam tak chuan, Tunlai hun anga an ngaih avangin Bethlehem-ah hian Khualbûk (Hotel) a awm a, chu chu Chhiarpui avangin mi an khat vek a, Mari leh Josefa-te hi Khualbûkah hian an leng ve ta lo, angin an ngaihtuah a, an sawi ţhin. Mahse, Bible-a inziak leh Bible Background (Lal Isua hunlaia Judate culture, etc.) zirchian chuan, Josefa & Mari-te hian an Chhungte (relatives) Inah an thleng niin a rin theih, Luka 2:5-naah, “Josefa chu Davida chhungte leh a thlahte a nih avangin…” tih a inziak kher a. Bethlehem khuaah hian an Chhungte, an Thlâhte an awm nual ang tih a chiang nghal a ni.

Tin, Bible-in “Khualbûk Vêngtu” (Khualbûk Pangngaia Vêngtu) chungchang hi a sawilang miah lo hi thil mak tak a ni bawk. Hei hian Mari leh Josefa-te hi Khualbûk Pangngai (Hotel) angah an thleng lo niin a lang ta a. Chuvangin, Historian ţhenkhat phei chuan, a hunlai ngaihtuahin, Bethlehem Khaw tê tak tê-ah hian Mikhual thlenna tur Khualbûk pangngai (Hotel) hi a awm an ring lo hial a ni.

Tin, Luka 2:7-a “KHUALBÛK” tih hi Greek “Kataluma” tih a ni a. Hei hi Lal Isua’n a Zirtirte Zanriah Hnuhnung a Ei-puina hmun – Pindan Chungnung sawina nên a in-ang bawk (Mark 14:14-15). Judate hian, Mikhual riahna tur room (guest chamber/room) an nei hrang deuh vek a. Josefa & Mari-te thlen ve theih tâk lohna pawh hi Hotel, Mikhual thlen luih luihna ni lovin (Rahabi-te Khualbûk/Hotel ang ni lovin) an Chhungte In-a Mikhual room bîk (Kataluma) kha a nih a rinawm hle a ni.

Mikhual Thlenna Khualbûk Pangngai (Hotel/Motel/Inn) chu Bible-ah hian a sawi-lang ve thova. Luka 10:34-35-ah SAMARI MIȚHA chungchangah khan kan hmu a, “A va kal a, a pemah te chuan hriak leh uain a leih a, a tuam a, ama sa chungah a chuantir a, KHUALBÛKAH a kalpui a, a enkawl ta a. Tin, atukah chuan duli pahnih a phawrh a, KHUALBÛK VÊNGTU hnenah a pe a, 'Lo enkawl la, he mi bâka i sen zawng chu ka lo kir leh hunah ka rawn rul leh ang che,' a ti a” tiin.

Achunga Bible changah khian, KHUALBUK TIH CHU GREEK  “PANDOCHEION” (πανδοχειον) HMAN A NI A. KHUALBUK VENGTU TIH PAWH “PANDOCHEI”, (πανδοχει) HMAN A NI TA A NI. Hei hian, Mari leh Josefa-te Thlen Theih lohna Khualbûk (Greek Kataluma) leh Suamhmang tâwka Thlenna Khualbûk (Greek Pandocheion) hi chu a in-ang lo a ni, tih a chiang hle. 

Tichuan, Mari leh Josefa mai ni lovin, an Chhungte Mikhual dangte pawh an lo thleng ve a. An Chhungte zinga Mikhual zahawm zawk (Upa zawk/ Rabbi/ Lehkhaziaktute/ Pharisaite, etc.)-ten an lo luah tawh avangin Mikhual room (Kataluma) hi Mari leh Josefa hian an chang ve lo, tihna a niin alang. Hei hi Bible sawi tum ber pawh niin a hriat a ni (Theory dang - Mari Nau-neih laia a thianghlim loh avanga Mikhual room tak ngial pawh luah thei lo anga sawi pawh a awm bawk). Chuvangin, Khualbûk Vêngtu-in Mari & Josefa-te thlen a lo phallo anga ngaih chu a dik lo deuhvin a lang

2.4. VÂNTIRHKOHTE KHA AN ZAI RÊNG RÊNG EM NI??
Mizo Kristian Zia hi Sâp (Mingoho- English/American)-hovin min hlan-chhawn leh min rochun deuh vek an ni ti ila kan tisual tampui awm lo ve. Heng zingah hian, kan “ZAIKHAWM HLA THLÛK” (Traditional Songs/Tune- Khuang 2 Hla)-te hi Mizovin “kan ta liau liau” kan la tih theih-te chu a ni deuh mai awm e. Lal Isua Pian zâna, Vântirhkohten Hla an rawn sa anga kan ngaih tâkna chhan pawh hi Sâp-ho vang niin a lang. Sap-ho Hlaah rêng rêng hian, Vântirhkohten Berampute hnênah khân Pathian Faka an Zai angin Hla an phuah a, an sa a, an sawiin, an ziak kur ngei nguai a ni.

Luka 2:13-14-a, “Tin, thâwklehkhatah Vântirhkoh hnênah chuan vâna miho mipui an lo awm ta chiam a, PATHIAN AN FAK A. "Chungnung berah Pathian ropui takin awm rawh se, Lei chunga a awm êm êm mihringte hnênah remthu lêng rawh se," an ti a” tih hi reference-a hmangin, VÂNTIRHKOHTE HIAN PATHIAN FAKA AN ZAI ANGIN KAN SAWI TA A NI BER AWM E. Vântirhkohte hi Pathian fakin an zai ve tho tih erawh theihnghilh lo ila (Job.38:7, etc).

”Pathian fak” tih laia “FAK” tih ţawngkam tak hi Greek ţawnga “ainounton” (from the root aineo) hman a ni a. Hei hian, Tuemaw (object/event) chanchin ţawngkama nasa deuhva sawi-mawi (fak) te, Țawngţai te, Thupuang te, Au vak vak te, Zai te a huam thei vek a ni (cf. Ezra 3:11, Lk.2:13, 20, 19:37, Acts 2:47, 3:8, Jak.5:13, Thup.19:5, etc.). Vântirhkohte hian engnge an tih chiah? tih a chian/fiah lehzual theih nân, a context leh a ţawngkam dang enchian deuh a ngai ta a ni.

Hetiang Case hi Bible-ah a awm nual a. Hebrai mite ţawngkam bungraw tlêm vang emaw, kan context inang lo lutuk avanga fiah lo emaw a ni thei. Emau kawnga kal te chungchangah pawh khân, “kâ-in an chelh a” (Luka 24:29) tih a ni a. Kâ (ţawngkam) ringawta chelh chu a nêp ang reng hle. Greek “Parebiasanto” hian, “nasa taka ngen, ti-lui” (to force physically, strong persuasion, over-power, compel, constrain) tih lam a kâwk daih zawk a ni.       

Luka 2:13-a “PATHIAN AN FAK A” tih lai ţawngkam pawh hi, chiang taka hre-fiah tur chuan a ţawngkam dang hi enzui a ngai a. Chu chuan, an zai (sing) nge, an sawi (speak) nge, an puang (announce/proclaim) tih chu a rawn tichiang dawn a ni. Mizoţawnga “AN TI A” (SAYING) tih lai hi a pawimawh lai tak chu a ni ta a ni. HELAI “AN TI A” TIH LAI TAKAH HIAN GREEK ȚAWNG “LEGONTON” (FROM THE ROOT LEGO) HMAN A NI A. HEI HIAN, “THU KHEL LAI CHUNGCHANG KHÛN-KHÂN TAKA SAWI/ PUANG” A KÂWK TA A NI (to proclaim, utter, tell or speak, with apparent focus upon the content of what is said, cf. Luk.24:29) (Ref. J. P. Louw and E. A. Nida, Greek-English Lexicon of the New Testament: Based on Semantic Domains, Vol. 1. Gerhard Kittel, Geoffrey W. Bromiley, and Gerhard Friedrich, Eds, Theological Dictionary of the New Testament, 1964). CHUVANGIN, VÂNTIHKOHTE KHA AN ZAI LOVA (HLA AN SA LOVA), LAL ISUA PIAN THU KHA URHSÛN/KHÛN-KHÂN TAKIN AN PUANG (ANNOUNCE/ PROCLAIM) ZAWK NIIN A LANG.

3. THU TLÂNGKAWMNA
Ka Thuziak hi duh aiin a thui ţhin a. Cellphone aţanga FB leh Internet khawihtute tân Chhiar a harsat thu ka dawng fo va. Chuvangin, a lai lak-lawh-ah hian ka rêk-bung rih mai ang. PART 2-ah chhunzawm zâwk ila a ţha ang e. Kan sawi tâk ang khian, Zawhna leh Rinhlelhna hrang hrang – Mari raipuar-in mêl 70-80 lai ke-in a kal thei dawn emni? Isua kha Bethlehem an thlen zânah a piang em? Khualbûk leh Khualbûk vêngtu hi a awm em? Vântirhkohte kha an zai rêng rêng em ni? tih te khi, Lal Isua hunlaia Judate Culture leh Bible Bu danga inziak-te nên-a enkawp (enrem/compare) chung leh Scholar-te leh Archeological Evidence aţanga ngaihdân lâk-khawm ka rawn chhawp-chhuak a ni.  

Kan lo pawm tawh thin dân nên a inrem ta lo a nih pawhin rilru zau put a ţha mai thei. Chutihlaiin, a chunga kan sawi-te khi Vânram kaina tur a ni lova, Vânram kaina a dâl hek lo. Khawvêl mite pawhin, Hming/Khua/Vêng dik lova in koh an duh lova, Bombay chu Mumbai ah, Calcutta chu Kolkata ah, Poona chu Pune ah, Bangalore chu Bengaluru ah, an tih sup sup chhan hian awmzia a nei a ni, tih erawh hre tel ila.

BETHLEHEM KAIHHNAWIH - PART 2-ah chuan, Ran Inah Lal Isua a piang chiah em? Lal Isua kha BC 4-ah a pian ngei em? Krismas Ni, “December 25” hi Rome pathian Pianni a ni a. Hemi Ni-a Krismas kan lo hman ve hi a dik dawn emni? Krismas (Christmas) sawi awlsamna (chhinchhiahna) atâna “X-MAS” (kros kaw-kalh) kan hman ţhin hi a dik dawn emni? Zawlnei Jeremiah 10-ah “Christmas Tree” hman hi a khap a ni lawmni? Hman zel chi a ni dawn em? etc. tih te kan khel leh dawn a ni.

0 comments :

Popular Posts