Saturday, December 5, 2015

THUPUAN BU HI ENGTIN NGE I LO PAWM VE? (Neronic View AD 64-68 VERSUS Domitianic View AD 95-96)

1. THUKHUH KEU-HAWNNA
Johana Hnêna Isua Krista Thupuan Chhuah Bu (Book of Revelation) hi Bible-a Thil lo thleng tur Hrilhlâwkna/Thupuan (Eschatology/Prophecy) lam hawi Lehkha Bu pawimawh tawp-khâwk a ni. Thuthlung Hlui-a Thil lo thleng tur hrilhlâwk te kha an tawp dân tur sawina a ni ber. Genesis bu-ah khân, lei leh vân leh thil zawng zawng siam ţan dân leh lo awm ţan dân a inziak a, Thupuan Bu-ah hian lei leh vân leh thilsiam zawng zawngte tawp dân (leh Chatuan inţan dân) a inziak thung a ni. 

Thupuan Bu hi a chhunga thu inziak hmasa ber Greek “apokalupsis” (unveiling/uncovering- khuhna hawng, keu-hawng) tih hi a Bu hming leh kohna atân hian hman nghal mai niin alang. He Thupuan Bu hi Apostol Johana’n Mediterranean tuipui Patmos Thliarkâr-a a tân laia a hnêna inlâr, Tholeh Isua Krista khân, Thil lo thleng tur-te a hrilh a, chungte chu a ziak ta a ni. Thil awmdân-te chhui kualin, Apostol Johana’n Thupuan Bu a ziak hun hi Roman Emperor Domitian Lallai A.D 95 vêl niin alang.

Thupuan Bu hian Lal Isua Krista nihna ropui leh dik tak (glorious, full & true identity of Jesus Christ) a târlang a. Hun khirh tak lo thleng tur atâna inbuatsaih lâwk a ţulzia leh ropui taka Lal Isua Krista lo kal lehna beisei tlat tura ringtute fuihna a tel bawk a ni. Thupuan 1:3 thu hian, a Thuchâh ken chu a tichiang hle, “He hrilh lâwkna bu thu chhiartu leh ngaithlâa a chhunga thu ziak pawmtute chu an eng a thâwl e; a hun chu a hnai tawh si a.”

2. THUPUAN BU PAWMDÂN CHI 4-TE
Thupuan Bu hi Pawmdân (View/Approach) Chi 4 a awm a. Thupuan Bu kan pawmdân hian Bible pumpui leh Thupuan Bu-a Thu inziak-te kan thlir dân a sawi danglam (affect/influence) vek thei a ni. Chuvangin, a hnuaia Pawmdân 4-te hi ulûk tak leh ngun takin chhiar la, i lo pawm tawh dân emaw, i lo ngaihdân emaw kha dik tawk lova i hria a nih chuan, Pathian ropuina turin i ngaihdân dik lo kha thlâk leh tih-danglam hreh hauh suh ang che.

2.1. PRETERIST VIEW
PRETERIST-te chuan, Thupuan Bu hi Roman Emperor Nero (AD 64-68/Neronic View) hunlaia tihduhdah tuar mêk Kristian-te fuih nân Johana’n a ziak a ni, an ti. An hming put-chhan (Preterist) ang tak hian (Lat. preateritus – past), “Thupuan Bu-ah hian Hun kal tawh thil a inziak a ni” an ti hmiah a. Thupuan Bu-a inziak zawng zawng (Lal Isua lo kal lehna pawh) hi AD 70, Jerusalem khawpui tihchhiat a nih khân a thleng kim vek tawh, an ti bawk!!! PRETERIST-te hian Bible Hrilhlâwkna (Bible Prophecy) hi “thil lo thleng tur” (things to come) angin an ngai lova, “thil lo thleng tawh” (things that came) angin an ngai vek bawk a ni.

PRETERIST-ten Thupuan Bu-a Hrilhlâwkna-te hi AD 70 (first century fulfillment)-a thil thleng vek tawh anga an chhûtna (pawmna)-ah hian “Bible Châng Innghahna 5” vêl an nei a, chungte chu– Mat.10:23, 16:27-28 & 24:34, 29-31, Thup.1:7) te an ni. Tin, Thupuan Bu hi thilthleng tawh anga an chhût avangin Johana’n SAKAWLH A TIH HI ROMAN EMPEROR NERO (AD 64-67) KHA NIIN AN NGAI NGHET HMIAH BAWK. Thupuan Bung 1-3 hian AD 66-70 Jewish War hmalama Asia Minor-a Kohhran 7-te chunga thilthlengah an ngai a. Thupuan Bung 4-22 hi (Mat.24, Olivet Discourse nên-a hmehbelin) AD 70-a Rome Sipaite kuta Judate an tlâwm leh Jerusalem tihchhiat thu kha an hmehbel bawk.

Mat.16:27-28 thu-a Hmêldanglamna Tlâng (Mount of Transfiguration)-a thil thleng hi “Lal Isua lo kal lehna” niin an chhût bawk. An ngaihdânah chuan, Hmêldanglamna Tlângah khân, Lal Isua khân a pa ropuina, a vantirhkoh ropuina-in a inthuam niin an ngai a ni.

Kohhran Pate zingah hian Origen Adamantius (AD 185-254)-an AD 229 khân ngaihdân hrang (PRETERIST & IDEALIST inkawp) a rawn nei hmasa ber a, hei hi Augustine (AD 354-430) khân a rawn sawilâr ta mai chauh zawk a ni. Origen leh Augustine Ngaihdân hi, tunlaia Zoram Kohhran-a a Bân-râng chin ţhenkhat-ten PRETERIST & IDEALIST Ngaihdân an pawmpui nachhan a ni ber a ni awm e.

Origen hian, “Lal Isua lo kal lehna hi thlarauva a lo kal lehna a ni a, amah ringtute hnêna a lo kal lehna a ni. Kan thlarauvah Lal Isua hi a lo kal nawn a lo kal nawn a ni” a ti nghe nghe a nih kha (Origen interpreted the doctrine of the Second coming of Christ spiritually. He argued that it is the appearance of Christ in the souls of the pious. And Christ will come back to earth again and again within our souls).

Thupuan Bu leh Lal Isua Lo Kal Lehna bâkah hian, Origen chuan, “Hremhmun hi mitthite (misual leh miţha) siamţhatna hmun mai a ni” a ti leh bawk. Heng - Thupuan Bu, Lal Isua Lo Kal Lehna & Hremhmun chungchânga a Zirtirna Diklo-te avang hian, Byzantine Emperor Justinian I (527-65) khân Bible leh Kohhran Sawichhetu (heretic)-ah puhin, AD 543 khân Synod of Constantinople-ah Origen chu Heretic anga puan a ni ta nghe nghe a ni.

2.2. HISTORICIST VIEW
HISTORICIST-te chuan Thupuan Bu-te hi Western Europe-a Kohhran hun tawng mêk (Apotolte hunlai aţanga Khawvel tawp thleng) Entirna/Sawina a ni (Revelation is a Symbolic representation that presents the course of history of Western Europe from the Apostles’ life through the end of the age), an ti thung. Chuvangin, Roman Catholic Pope te, Protestant Reformation leh French Revolution etc. te kha Thupuan Bu-ah hian a inziak vek a ni, an ti bawk.

An Chhui zelnaah chuan, Thupuan Bung 1-3 hian, Roman Empire (Rome Lalram) a tawp hmaa Kohhran Hun 7-te a entir a. Bung 4-7 hian Roman Empire tlâwm dân a entir a, Bung 8-10 ah hian Vandals, Huns, Saracens leh Turks ten Roman Empire an beih dân (invasion) leh Protestant movement inţan chhoh dân a inziak a. Roman Catholic Pope hi Sakawlh niin an ngai nghet hmiah bawk. Bung 11-13 ah hian Roman Catholic Kohhran hnuaia Kohhran Dik tak tuarna chungchâng a sawi a. Bung 14-16 ah hian, Roman Catholic Kohhran chunga Pathian Thinurna Berbu leihbuak chungchâng a sawi a. Bung 17-19 hian, Roman Catholic Kohhran paihthlâk a nih tur thu a sawi niin an ngai bawk. HISTORICIST Ngaihdân hi tunlaiah chuan pawm a hlawh tawh lo deuh tlângpui a, Christian Fundamentalist or Anti-Roman Catholic ngaihdân a ni deuh ber tawh.

2.3. IDEALIST VIEW
IDEALIST-te chuan Thupuan Bu hi “Thlarau lama Entir leh Zirtir nei (Symbolic/ Allegory) mai a ni a, a tak taka thil thleng leh thil thleng tur a awm lo” an ti ve thung. He ngaihdân hi Church Father Origen (AD 185-254) khan bul a rawn ţan a, Augustine (AD 354-420) khân a rawn tilâr ta a ni. An sawi zêlnaah chuan, Thupuan Bu-a thu inziak-te hian Pathian leh Setana Indona, leh Țha leh Sual indona a entir a. Mithianghlimte chu Sual thiltihtheihnain tiduhdah ţhin mahsela a tawp-khâwkah chuan chhanchhuahin an awm dawn a, Pathian chu Lal leh Hnehtu a ni dawn a ni, an ti.    

Chuvangin, Thupuan Bu hian a tak taka thil thleng tur engemaw sawi a tum lova, khawvêl hun kal tawh leh hun lo la awm zêl tura Thlarau lama Indona, ringtute chunga thlarau lama tihduhdahna thleng chungchâng sawina a ni, an ti. Thupuan Bu-a SAKAWLH hian, Hun kal tawh leh Hun lo la awm tura Setana fuihpawrh Political Leader-ten Kohhran an do leh an tihduhdah ţhin hi a entir a ni, an ti.

Nawhchizuar hi Kohhran dal, leh Khawvêl ngainatna entirnaah an ngai a. Chhinchhiahna te, Tawtawrawt te, Thinurna berbu te chu Khawvêla chhiatna thleng ţhin pangngai  te, indona leh ţam-te angin an ngai bawk.  

IDEALIST-te chuan, Thupuan Bu hi thlarau lama entir nei a nih avangin, Kohhran hun kal tawh leh hun tawng tur atân eng hunlai atân pawh thlarau lama a entir atân chuan a hmehbel (hman) theih vek a ni (book of Revelation applicable and relevant for all periods of church history), an ti bawk.

2.4. FUTURIST VIEW

FUTURIST-te chuan, Thupuan Bung 4-22 (Mat.24 Olivet Discourse tiamin) hi thil lo la thleng tur (will occur in the future) a ni, an ti ve thung. Tichuan, Thupuan Bu hi Hlawm 3-ah an ţhen a, Bung 1= Thil thleng tawh (the past), “i thil hmuh tawhte” (1:19), Bung 2-3= Tuna thleng mêk (present), “thil awm mêk te” (1:19), Bung 4-22= Thil lo la thleng tur (future), “tun hnua thil lo awm tur-te” (1:19), an ni tiin.

FUTURIST-te chuan, Thupuan Bu-ah hian, entir nei (figurative & symbols) te awm ve tho mahse, a tak taka Thil thleng tawh leh Thil thleng tur hlir a inziak a ni, an ti ve thung. An sawi zêlnaah chuan, Thupuan Bung 4-19-ah hian Kum 7 Hrehawmna nasa tak thleng tur (cf Dan.9:27) leh, hemi hun chhunga mihringte chunga Pathian thinurna thleng tur-te tarlan a ni. Bung 13-ah hian, Khawvel huap Political Leader & Religious Leader (Sakawlh 2) chungchâng a sawi a. Bung 17-ah chuan, Nawhchizuar hian, Kohhran-in Tlûksanna hun râpthlâk a tawn tur chungchâng a sawi bawk.

Thupuan Bung 19-20 ah, Lal Isua lo kal lehna leh Armageddon indo leh Kum Sâng rorel chungchâng te a chuang a. Bung 21-22 ah, Setana hnehna, Meidila paih (Thupuan Bu-ah hian Hrêmhmun leh Meidil hi thil hrang a nihzia chiang takin a chuang bawk), Mi zawng zawng tâna Rorelna Hnuhnung ber (Final Judgment) leh, Vân thar leh lei thar chungchâng te târlan a ni bawk a ni.

FUTURIST ngaihdân hi tunhnai lawka lo chhuak a ni lova, Kohhran Pate (Church Fathers)-te aţanga lo inţan daih tawh a ni. Clement of Rome (AD 96), Publius Papinius Statius (AD 92), Justin Martyr (AD 100-165), Irenaeus, Bishop of Lyons (AD 120-202), Dio Cassius (AD 150-235), Quintius Septimius Florens Tertullian (AD 160-220), Hegesippus (AD 150), The Muratorian Canon (AD 170), Clement of Alexandria (AD 150-215), Eusebius Pamphili (AD 260-340), Victorinus (AD 304), Jerome (AD 340-419), Ephiphanius (AD 380), Sulpius Severus (AD 400), Orosius (AD 420), Syriac Witnesses (6th & 11th Centuries, AD), Andreas of Cappadocia (AD 600), Isidore of Seville (AD 600), Venerable Bede (AD 672-735), Arethas (AD 850-944), Arethas of Caesarea (AD 850-944), Theophylact (AD 1107), etc. ten an lo tuipuiin, Thupuan Bu hi “THIL LO LA THLENG TUR” a nih thu leh Emperor Domitian (AD 95-96) hunlaia ziak a nih thu hi an pawm nghet hle a, an thuziakah pawh an lo telh daih tawh a ni.

Kohhran Pate zingah chuan Origen Adamantius (AD 185-254)-an AD 229 khân PRETERIST (Idealist nen-a inkawp tel) Ngaihdân hrang a rawn nei hmasa ber a, hei hi Augustine (AD 354-430) khân a rawn sawilâr mai chauh zawk a. Origen-a hi Lal Isua lo kal lehna leh Hrêmhmun chungchânga a ngaihdân dik lo avangin, “ORIGEN CHU ZIRTIRNA DIK LO THEHDARHTU LEH KOHHRAN DOTU LEH KALSUAL (HERETIC) A NI” tiin Synod of Constantinople, AD 543-ah khân an puang ta nghe nghe a ni.

FUTURIST (Domitianic View AD 95-96) sawi dânah chuan, Johana hi Emperor Nero lal laiin Patmos Thliarkar-a tân tir a nih thu hi hriat a ni ngai lo. Emperor Nero hian hetiang hrêmna - thawnbo (exile) lam hi a ti ngai lo. Emperor Domitian thung chuan, Kristian-te a lo thawn bo fo tawh a. Johana pawh hi AD 95 ah khân Patmos Thliarkârah a thawn bo zawk a ni.

Johana hian AD 95 vêlah ziak mahsela, Jerusalem chhiat (AD 70) thu a târlan loh chhan hi, a lehkhathawn dawngtute vang a ni a, a Lehkhathawn dawngtute hi Asia Minor-a awm-te an ni a, an tân Jerusalem kha chuti teh lua-in a pawimawhna a awm lem lova. Chuvangin, Johana pawh hian Jerusalem chhiat thu hi a târlang lo mai ni zawkin a lang. Tin, Lal Isua hnên atanga Inlârna a hmuh chin chiah a ziak a, Jerusalem chhiat (AD 70) thu hi Inlârnaah a tellova chuvangin a ziak tel ta lo tihna a ni. Mizo History-ah Khampat Bungpui kha Mizo-te tân a pawimawh êm êm a. Mizo Historian zawng zawng deuhthaw-in Zofate tâna a pawimawhna an sawi châmchi a. Chutihlaiin, a ram neitute Burmese ho tân chuan Khampat Bungpuiin awmzia a nei lo ang deuh a ni.

FUTURIST Ngaihdân (Domitianic View AD 95-96) hi tunlai Evangelist lâr Rev. Billy Graham, leh Khawvêla Evangelist lâr, hming lang pha chin zawng zawng deuhthaw-in an pawm a. Anni bâkah hian, Bible Scholar lamah chuan (a lâr zual tlêm chauh târlang ila)- Clarence Larkin, Arno C. Gaebelein, A.J. Gordon, James M. Gray, R.A. Torrey, Hary Ironside, John F. Strombeck, Lewis Sperry Chafer, Alva J. McClain, Charles Lee Feinberg, C.I. Scofield, Charles Ryrie, John F. Walvoord, John R.W. Stott, Roy B. Zuck, J. Dwight Pentecost, John F. MacArthur, Ed Hindson, leh  Tim LaHaye, etc. te an ni a. Theological College-ah hian (a lâr zual chauh) - Dallas Theological Seminary, Biola University, Philadelphia Biblical University, Grace Theological Seminary, Liberty University, Bob Jones University, The Master’s College & Seminary leh Moody Bible Institute ten Hunhnuhnung lam Zirtirna leh Thuziak lamah ţhahnemngai takin an lo thehdarh bawk.

3. THU TLÂNGKAWMNA
Tunlaia Zoram Kohhran ţhenkhatah chuan PRETERIST leh IDEALIST Ngaihdân pawmtu hi Kohhran Hruaitute (a Bân-râng chin) zingah an tam zawk mai thei. Hei hi a chhan chu an Zirna hmun (Theological College)-a an Zir dân leh an Ngaihdân leh Pawmdân (Theology) a nih vang a ni berin a lang.

Tin, India rama Theological College tam takah hian, ESCHATOLOGY lam emaw, Thil lo thleng tur lam inziakna Bible Bu – Ezekiela, Daniala, Zakaria, Juda leh Thupuan Bu, etc. (Eschatological Books) te hi an tuipui lova, Hun lo la thleng tur ang pawhin Zir a hlawh lem lova, PRETERIST & IDEALIST Ngaihdân bâk khian an zir chhun tlêm-te ah pawh an zir lo. Hemi avang hian, achunga kan sawi tâk ang khian, “THIL THLENG VEK TAWH” anga an zir a nih loh vêk chuan, “ENTIR NEI LEH THLARAU LAMA ENTAWN TUR” (Symbolic/ Figurative/ Allegory/ Spiritual implications) ang vekin an zirin an ngai (pawm) bawk a ni.

Chuvangin, “KRISTA LO KAL LEHNA” (Second Coming of Christ) chungchâng hi tluang-tlam leh awlsam takin an sawi a, an khâr-chhawng (whole-sale) awlsam tawp mai ţhin a. Zir thûk deuh leh Zir zau deuh (Mithianghlim lâwr/Kum sâng rorel/Sakawlh/etc. tuipui leh pawmtu)-te chu, “KAL-SUAL” en-in an en ti-tih mai ţhin. Mahse, an rin angin “KRISTA LO KAL LEHNA” hi sawi awlsam mai mai chi a ni lova, Bible-a inziak tam tak-te hi ulûk tak leh ngaihtuahna thui tak sênga, Thlarau Thianghlim Pâwlna tak tak leh Finchhuahna/Tih-ênna hmanga zir chhuah theih a ni a, chutianga zir chhuah a ngai a ni, tih hi an theihnghilh si ţhin.    

Kohhran Hmasa huna Hruaitute kha, an thlarau lam nunah an entawn tlâk êm êm laiin, an Theology leh Pathian Thu an Zirtir Dân, Pawmdân leh Hriat dân ţhenkhat hi chu, Siamţhat ngai te, Thlâk ngai te, Belh-chhah ngai te a awm nual tawh a, Protestant Kohhran leh Reformed Kohhran-te hi a entirna ţha tak a ni. Hei hi a chhan ber chu, Thiamna-te a sâng zêl a, Hriatna te a pung zêl a, ARCHEOLOGICAL EVIDENCE-ten Bible-a Thil inziak tam tak hi, chiang zawk leh fiah zawkin min rawn Hrilhfiah sak ţhin a ni.

FUTURIST LEH DOMITIANIC VIEW (AD 95-96) hian Thupuan Bu hi “THIL LO LA THLENG TUR” (Eschatology/Things to come) a nihzia a tichiang hle a. Hei hi a dik-zia chiang lehzualin, EXTERNAL & INTERNAL EVIDENDENCE hmangin (Bible pâwn-lam leh Bible chhung aţangin) chiang takin a Finfiah (proof) theih a ni. PRETERIST NGAIHDÂN DIK LO LEH FUTURIST (DOMITIANIC VIEW AD 95-96) PAWMDÂN DIK ZAWK DÂN hi remchâng hmasa berah a ţul chuan ka rawn chhunzawm ang.

0 comments :

Popular Posts