Thursday, June 30, 2016

AW ZORAM, MITTHI KHAW THLENGIN I ZUK KAL DAWN ASIN!!! (Kapernaum Khawpui Aţanga Mizoram Thlirna)

0 comments
1. THUHMAHRUAI
Lal Isua Khawvêla a len lai khân, Khawpui a tlawh zin ber-te zingah Kapernaum hi a tel phâk a. Jerusalem khawpui tih lohvah chuan a tlawh zin ber a ni hial ang. Kapernaum khuaah hian Thil mak pawh a ti nasa a ni ngei ang, Lal Isua’n a sawichhuak hial. Chuvangin, Kapernaum Khaw chungah hian a thîkthu pawh a chhe hle a, a thusawi pawh hi a râpthlâk hle, “Nang Kapernaum, vân thlengin chawimawi i ni dawn em ni? Mitthi khaw thlengin i zuk kal dawn asin; nangmaha thil mak tak tihte kha Sodom khuaa tih ni sela, tun thlengin a la awm reng ang. Nimahsela, ka ti a che u, ngaihtuah ni-ah chuan, i tuar ai chuan Sodom ram tuar tur chu a zia a awm zawk ang," a ti a (Mat.11:23).

Kapernaum Khawpui aţang hian Zoram hi ava langchiang em! Kapernaum Khawpui chunga Thilthleng râpthlâk tak aţang hian Zoram hian i zirchhuak mawlh teh ang u.

2. KAPERNAUM KHAWPUI, LAL ISUA KHAW-CHUAM, KHAW DUHAWM CHU….Kapernaum khua hi Galilee Dil kam hmâr lam, Jordan lui aţanga Mêl 2 vêla hlaa awm a ni. Galilee ram hi hmânlai atâ tawh, Tuipui Kawng (Via Maris – the Way of the Sea) tih hiala koh a ni a. Damaska leh Syria aţanga Aigupta ram ropui tlawh tum-te chuan Galilee hi an paltlang ngei ngei a ngai a. Zinmi leh Sumdawng - Africa aţanga Europe, Asia aţanga Africa Khualzin zawng zawng deuhthaw-in Kapernaum khua hi an paltlang ţhin a, Judai ram aiin Galilee ram hi Khualzin miten an tlawh tam daih a ni. 

Popular Posts