Thursday, June 30, 2016

AW ZORAM, MITTHI KHAW THLENGIN I ZUK KAL DAWN ASIN!!! (Kapernaum Khawpui Aţanga Mizoram Thlirna)

1. THUHMAHRUAI
Lal Isua Khawvêla a len lai khân, Khawpui a tlawh zin ber-te zingah Kapernaum hi a tel phâk a. Jerusalem khawpui tih lohvah chuan a tlawh zin ber a ni hial ang. Kapernaum khuaah hian Thil mak pawh a ti nasa a ni ngei ang, Lal Isua’n a sawichhuak hial. Chuvangin, Kapernaum Khaw chungah hian a thîkthu pawh a chhe hle a, a thusawi pawh hi a râpthlâk hle, “Nang Kapernaum, vân thlengin chawimawi i ni dawn em ni? Mitthi khaw thlengin i zuk kal dawn asin; nangmaha thil mak tak tihte kha Sodom khuaa tih ni sela, tun thlengin a la awm reng ang. Nimahsela, ka ti a che u, ngaihtuah ni-ah chuan, i tuar ai chuan Sodom ram tuar tur chu a zia a awm zawk ang," a ti a (Mat.11:23).

Kapernaum Khawpui aţang hian Zoram hi ava langchiang em! Kapernaum Khawpui chunga Thilthleng râpthlâk tak aţang hian Zoram hian i zirchhuak mawlh teh ang u.

2. KAPERNAUM KHAWPUI, LAL ISUA KHAW-CHUAM, KHAW DUHAWM CHU….Kapernaum khua hi Galilee Dil kam hmâr lam, Jordan lui aţanga Mêl 2 vêla hlaa awm a ni. Galilee ram hi hmânlai atâ tawh, Tuipui Kawng (Via Maris – the Way of the Sea) tih hiala koh a ni a. Damaska leh Syria aţanga Aigupta ram ropui tlawh tum-te chuan Galilee hi an paltlang ngei ngei a ngai a. Zinmi leh Sumdawng - Africa aţanga Europe, Asia aţanga Africa Khualzin zawng zawng deuhthaw-in Kapernaum khua hi an paltlang ţhin a, Judai ram aiin Galilee ram hi Khualzin miten an tlawh tam daih a ni. 


Matthaia chuan, “Lal Isua Khua” (Jesus’ Own City/City of Jesus) tih hialin a record nghe nghe bawk (9:1). Lal Isua hi Bethlehem-ah a piang a, Nazareth-ah a seilian a, a chenna ni silo Kapernaum khua hi a ngaina êm êm a, khawsak nân ber a hmang niin alang. Matthaia chuan, Thuthlung Hlui Hrilhlâwkna anga Lal Isua’n rawngbawlna a ţanna chu Kapernaum khua hi niin a ziak a, Galilee Biala a rawngbawlnaah pawh Kapernaum hi innghah nân (center of His Galilean ministry) a hmang bawk a ni (4:13-16, Isai.9:1-2).

Kapernaum khawpui hi a lian lo naa, khawpui pawimawh tak erawh a ni thung. Kapernaum khuaah hian Chhiahkhawnna Hmunpui (Tax Office) pawimawh tak a awm a. Rom Sipai Ţhuthmun pawimawh tak (Garrison) a ni bawk. Thil mak tak leh chhinchhiah tlâk tak pakhat chu, Kapernaum khuaa Synagogue chu Rom Sipai Zahotu-in a sak sak thu record a awm nghe nghe a ni (Mat.9:9, Luk.7:5).  

Tin, thil Chhinchhiah tlâk dang awm leh chu,  Lal Isua Zirtirte zinga 5 lai – Petera, Andria, Jakoba, Johana leh Matthaia-te chu Kapernaum khua leh a chhehvêl aţanga Lal Isua’n Zirtir atâna a koh te an ni tlat mai bawk (Mark.1:16-20, Mat.9:9-13). Kapernaum khua hi Lal Isua Zirtir Petera-te khua a ni a. Kapernaum khuaa rawngbawlna a neih apiang hian Lal Isua hi Petera te inah a thlengin a khawsa tam hle ţhin niin a lang. 

3. LAL ISUA’N KAPERNAUM KHUA A VEIIN A HMANGAIH…
Mat.4:13-ah chuan, “Tin, Nazaret khua a kalsan a, Kapernaum khuaah a awm ta reng a (chu chu Zebulon leh Nephthaleim biala, dil kama awm a ni): Zawlnei Isaia kaah, "Dil kama, Jordan râla, Zebulon ram leh Nephthaleim ram, Jentailte Galili; Zawlnei Isaia kaah, "Dil kama, Jordan rala, Zebulon ram leh Nephthaleim ram, Jentailte Galili; Thim hnuaia ţhute chuan êng nasa tak an hmu a, Thihna hmun leh a hlima ţhute chungah chuan, Êng a lo chhuak ta a," tia a sawi kha a lo thlen theih nân. Chuta chinah chuan Isuan, "Sim rawh u! Vân ram a hnai tawh e," tiin a hril ţan ta a,” tiin a inziak a.
Lal Isua hian Kapernaum khuaa a kal hian, Synagogue-ah a lut a, Pathian thu a zirtir nghal mai niin alang. Thunei taka thil a tih avang leh a zirtirna danglam tak avangin mak an ti hle a ni (Mark 1:21-34, Lk.4:31-36). Lal Isua hian, Kapernaum khuaah hian a tlêm berah Thilmak 8 chu a ti niin alang. Ramhuai bawlhlawh pai a hnawhchhuah sak avangin Galilee ram leh a chheh vêlah Lal Isua chanchin a thang chhuak, tih record a awm nghe nghe (Mark.1:27).

Simon Petera Pizawn khawsik a ti dam a (Mark.1:29-31, Luk.4:38-39), Inchung rek pawpa an thlâk Zêng a lo tidam a (Mar.2:1-12), Kut-zêng a tidam a (Mark.3:1-8), Sipa Zahotu chhiahhlawh a tidam a (Luk.7:1-10), Kana khuaa a awm laiin Kapernaum khuaa Upa fapa dam loh avangin an rawn ko a, va kalin a tidam bawk (Joh.4:46-53), Kapernaum khaw pana Lawnga an kalnaah Lal Isua chu Tuichungah a kal thu kan hmu bawk (Joh.6:16-21).

Kapernaum khuaa an awm lai hian Temple Chhiah pêk tur kha Sangha kâ aţangin an phawrh chhuak bawk a ni (Mat.17:24-27). Kana khuaa inneihnaa Wine a tihpun hi, Galilee bial chhunga mi tho a ni a, Kapernaum leh Kana khua-te hi Galilee bial hmêl lanna an ni a, Kapernaum khuaa thilthleng ni lo mahse sawi tel ve tho ila a ţha awm e (Joh.2).

A Rawngbawl hun chhung hian, Khaw mal-khaiah chuan, Kapernaum khua hi chen nân Lal Isua hian a hmang nasa ber niin a lang a. Hei bâkah hian, Kapernaum khua aia Thilmak a tih tamna khaw dang hi sawi tur a awm lo niin alang bawk. Hei hian, Lal Isua’n Kapernum khua a ngaihsak zia, a hmangaih zia leh a vei zia a târlang nghal a ni.

Chuvangin, an luhlul leh rilru khauh avang chuan Lal Isua rilru pawh a nâ hle a, a hau nâ hle nghe nghe a, “Nang Kapernaum, vân thlengin chawimawi i ni dawn em ni? Mitthi khaw thlengin i zuk kal dawn asin; nangmaha thil mak tak tihte kha Sodom khuaa tih ni sela, tun thlengin a la awm reng ang. Nimahsela, ka ti a che u, ngaihtuah ni-ah chuan, i tuar ai chuan Sodom ram tuar tur chu a zia a awm zawk ang," tiin (Mat.11:23).

Fate zinga kan ngaihsak ber, kan chhungkaw innghahna anga kan ngaih, theihtawp chhuaha, neih-thing-lungkhawnga kan chawm seilenin, min sual bosan sela, kan beisei loh ang deuhvin khawsa ta daih ang sela, chutiang huna Nu leh pa rilru nât dân tur nên tehkhin ta ila, Kapernaum khawpui chunga Lal Isua rilru nât dân hi a hriatthiam theih ber awm e.

4. KAPERNAUM KHAWPUIIN CHHIAT A TÂWK NASA!!!
Kapernaum khawpui hi Archaeologist ten kum 1920 vel aţang khân, he Khawpui chunga thil thlengte hi zirchian tumin an hai ţan a. Kum 1968, 1981 leh 1986-a an Thillaihchhuah (archaeological discoveries)-te chuan, Kapernaum khua hi a lo awm ngei a, Bible-in a sawi – Petera In te, Synagogue leh thil dang tam tak chu thudik a nihzia an rawn nemnghet nawn leh a ni. Thillaihchhuah (archaeological discoveries) dang tam tak hi chu sawi rih lo mai ila.

Lal Isua’n Kapernaum Khawpui chungchânga a thusawi hi lo thlûrbing ta ila. Achunga kan sawi tâk ang khian, Lal Isua’n Kapernaum khawpui a vei êm êm a, an tihdik lohnaah nâ takin a hau nghe nghe a nih kha. Bible-ah hian a inziak si lova, Kapernaum khua hian Lal Isua hi engtinnge an lo tih ang le? tih hi Zawhna pawimawh tak a ni. Kapernaum khua hian, Nazareth khua angin, a lang-a-pauvin Lal Isua hi an do lova, an bei bawk lova, Lal Isua khênbeh a nih theihna turin hma an la bawk lova, Lal Isua chhiatna tura thil tih an nei lem lo niin alang. Mahse, Lei leh Vân Lal Isua Krista a lungawi tlat silo???  Engnge a chhan ni ta ang le???

Kapernaum Khawpui chunga Thilthleng râpthlâk tak han zirchian chuan, Bible Scholar ţhenkhat chuan, Lal Isua Lungawilohna Ţawngkam chhuak hi, “Kapernaum Khawpui Chhiatna tura Thuchham” a ni e, an ti hial mai! He Khawpui, Lal Isua Khawpui-chuam leh ngainat tak hian, Lal Isua hi a hring-a-hranin dovin, beiin, a chhiatna tur thil ti lo mah se, Lal Isua hi an ngaisâng lêm lo (disregarded) hle tihna a ni a, a thusawi-te pawh an zawm ţha duh chuang lova, Lal Isua Thil mak tih-te pawh an ngai pawimawh vak lêm lo tihna a ni. Hei hian, anmahniin Lal Isua hi an hlawkpui loh mai bâkah, midangte tân pawh harsatna an siam sak tihna a ni tel nghal a ni.          

Hei vang hi a ni ang, Kapernaum Khawpui hian Lirnghing avangin chhiat a tâwk nasa ngang mai! Kum Zabi 4-naah khân Kapernaum Khawpui hi Lirnghing nâ takin a nuai a. Tlâng pawng zawng zawng deuhthaw a rawt-hniam vek hial a!! Kum Zabi 7-naah ahma ang bawka nâ-in a nuai nawn leh a! Mi tam tak an thi a, tam takin an pêmsan hnu-ah, Khawpui luahtu tlêm-te chauh an awm ta hial! Kum Zabi 11-naah Lirnghing nâ takin a nuai nawn leh ta a! Hemi ni aţang hi chuan Kapernaum Khawpui chu luah-tlâk lohvin a awm a. Luah tuma he Khawpuia kir leh tum pawh an awm ta lo! Luahtu nei lo, Khawpui ram a lo ni ta hial a ni! Lal Isua’n a lo Vaukhan lâwkna chu a dik hle mai! Mitthi-te chan ang chauh a chang ta a ni!

5. AW ZORAM! I PATHIAN TÂWK TURIN INPEIH RAWH!
Mizoram leh Zofate hi Pathianin a Hmangaih chungchuang kan ti lo thei lo. Mizoram awmna a kil tehlûl nên, Khawvêla Hnam awm zingah Mizote hi Hnam mâwl ber pâwlah kan tel ngei ang. Malsawmna dawng bik tura Hnam duhawm fâl tak chu kan ni hauh lo tih pawh a chiang hle. Heti chung hian, Pathianin London aţangin Sap Missionary hran liau liau min rawn tirh sak a. Zofate chu Lal Isua ringtu ţha takah min siam a. Zoram leh Zofaten khawvêl pum huapa lang phâk khawpin malsawmna kan dawn phah a. Vawiin-a Mizoram leh Zofate dinhmun en hi chuan, Pathianin Zofate min Hmangaihna leh Mal min sawmna ropui tak hi a mak tih loh rual a ni lo.

Hetihlai hian, Zoram leh Zofate hian eng kan ti ta nge? Kan awmdân leh kan khawsak dân-te chu ava mak ta êm! Lalpa Malsawmna kan dawn-te leh Pathian Khawngaihna kan chan-te kan hman dân leh kan chen dân leh kan tihpun dân te hi inenfiah a hun ta hle mai! Lal Isua’n, rilru nâ taka, a duhsak êm êm Kapernaum Khawpui a hau ang khân, Lal Isua’n duhsak tak leh rilru nâ tak siin Zoram leh Zofate hi min hau mêk a, Warning min pe mêk a ni, tih hi i ngaihtuah ngai em? Khawvêl thila inhmang mêk leh Rawngbawltu pawimawh tak tak zawng zawngte u, ngun takin i in-enfiah ţheuh teh ang u! LALPA ENGKIMTITHEIAN THU A SAWI E! 

Hmanni lawka Lirnghing khân, Zoram mipuite min ti-thlabâr nasa hle mai ti rawh? Kha aia nâ khân ala rawn nghing leh dawn asin! A nghing zing tial tial dawn lehnghal! Aizawl khawpui chhung leh Zoram hmun hrang hranga chhiatna râpthlâk lo thleng zêl turah hian, thlamuang taka lo dawngsawng turin i inpeih chiah maw? Aizawl khawpui ngat phei hi chu, a ram leilung leh kan Building tam zawk daih-te hian, Lirnghing nâ tak tâwk turin a inpeih mawlh lo tih i hriat chian êm kha, Aizawl khawpui hi Mitthi khaw thlengin ala kal dawn a ni! Chuvangin, i Pathian tâwk turin inpeih mawlh ang che! ENGPAWH TÂWKIN, THLENG DAWN SELA, THLAMUANG TAKA LALPA TÂWK TURIN I INPEIH TAWH EM? ILA INPEIH LO A NIH CHUAN, I TLAI LUTUK PALH ANG E, CHHANDAM-A I AWM THEIH NÂN, THO LA, I PATHIAN KO RAWH!

0 comments :

Popular Posts