Thursday, April 2, 2020

DOCTOR-TE LEH MEDICAL STAFF-TE TÂN I ŢAWNGŢAI ANG U... (Hripui laka kan him theih nân thinlung tihtak zetin ţawngţai-sak rawh)


Khawvêla Hripui hlauhawm tak lêng mêk, Covid-19 chuan, kan Ram India pawh a rawn rûn ţan ve ta! He Hripui laka kan him theih nân, Mizoram pawh theihtawpin a lo inbuatsaih a, Kohhran leh Sorkar ţangrualin, he Hripui hi kan bei mêk a ni.

Pathian khawngaihna leh vênhimna zarah, he Hripui hi kan hneh ngei ring ila, Thuawih takin, Fimkhur takin, Pathian lam hawiin i ţawngţai chhunzawm zêl ang u.

Hetianga Hripui hlauhawm a lo thlen hian, a do tura mi pawimawh zualte chu, Doctor-te leh Hospital-a thawktute an ni. Hripui hi a hlauhawm poh leh, Doctor-te leh Thawktute tân hian a hlauhawm zual sauh a. Hripui kaina chance an nei sâng ber bawk a ni. Mahse, chumi avanga an kiansan emaw, an tlâwmsan emaw a thiang lo! Anmahni ngei pawhin an duh ngai lovang!

Chuvangin, Doctor-te leh Hospital-a thawktute hian ţha taka Dam lo leh Hrivei-te an enkawl dam theih nân, damna leh hrisêlna, chakna leh himna an mamawh êm êm a ni. An Himna leh damna hi anmahni tân mai a ni lova, mipuite tân a ni zâwk mah awm e.

Kan Ram, Mizoram chhunga, Hospital-a Doctor-te leh Thawktute inpêkna leh, he Hripui Covid-19 lo thleng tur atâna an inbuatsaih dân hi lo ngaihthla ve teh. Hospital pakhat chauh hi entirnân ka'n lachhuak ang e. Hei hian i thinlung chhungril ber aţangin Pathian a auh-tir ngei che ka beisei.

Christian Hospital Serkawn chu, he Hripui lo thleng tur atân hian an inbuatsaih nasa hle. Covid-19 vei lo awm ta se Hospital In hi an pan hmasak ber tur a ni, tih hriain, an Doctor 1 chu, a thawmhnaw khai chhuah theih mai turin a pack fel vek tawh a, Hospital-ah hian Covid-19 positive an admit dâwn a nih chuan, haw leh tawh lo turin, a thawmhnaw nên Hospital-a lut nghal turin a inpeih tawh a ni.

Hospital Group-ah "Tute nge Front line-a duty thei tur"? tiin an in-zâwt a, an chhâng ta tliar tliar a, Front-line-a duty thei tura inpe-te hi - nau thla 6 mi vêl pawm te, pasal nei hlim te, chhangchhe nu te, pasal nei mai tur te an ni nawk mai. Kan Ram Mizoram tân, Zofate tân, nangmah leh keima himna atâna an inpêkna hi ava ropui êm!

Tunge râl hmatawnga awm-a silaimu-in a den hmasak tur tih inhre miah lovin, phûr takin Hospital lam an pan dâwn chu a ni ber a. An duty hi an ţan a nih chuan an haw leh lawk tawh dâwn lo, a ţhen phei chu an haw ngai tawh loving. An Chhungten an hmuh leh tawh loh turin, Hospital-ah hian, midangte damna atân an lut dâwn a ni (Wuhan-a Fam- Dr. Li Wenliang leh Dr. Peng Yinhua te kha hre reng ila).

Chuvangin, Mizoram chhunga Medical Staff zawng zawngte tân thinlung tihtak zetin ţawngţai rawh le.

Tukinah, ka Fanuin uluk taka lecture min pêk aţangin ka rawn luang-liam a ni e.

*LALPA, KAN RAM-A DOCTOR-TE LEH HOSPITAL-A THAWKTU ZAWNG ZAWNG-TE HI I THILTIHTHEIHNA-IN VÊNGHIM TLAT LA, KAN RAM TÂN MALSAWM ANG CHE, AMEN!*

DrJohn24:03:2020

0 comments :

Popular Posts